ខេត្តក្រចេះ ៖ សេចក្តីរាយការណ៍ពីប្រជាពលរដ្ឋបានអោយដឹងថា មានឈើអាររាងបួនជ្រុងទ្រវែងប្រភេទសុក្រម ជាច្រើនរយកំណាត់ ត្រូវបានពួកគាត់ប្រទះឃើញ នៅក្នុងតំបន់សហគមន៍ ប្រាសាទព្រៃទឹកខ្មៅ ចំនុចត្រពាំងថ្វាង ភូមិទន្សោងធ្លាក់ ឃុំកំពង់ចាម ស្រុក សំបូរ ខេត្ត ក្រចេះ កាលពីថ្ងៃទី12 ខែ មិនា ឆ្នាំ 2017ហើយបានរាយការណ៍ទៅមន្ទីបរិស្ថាន ប៉ុន្តែខាងមន្ត្រីជំនាញបរិស្ថានបានឆ្លើយតបថា មិនស្ថិតក្រោមការគ្រប់គ្រងរបស់សមត្ថកិច្ចបរិស្ថានទេ វាជាដែនគ្រប់គ្រងរបស់សហគមន៍ ពិសេសគឺស្ថិតក្រោមការគ្រប់គ្រងរបស់រដ្ឋបាលព្រៃឈើ ។
ប្រជាពលរដ្ឋបានរាយការណ៍បន្តទៅរដ្ឋបាលព្រៃឈើ ខាងរដ្ឋបាលព្រៃឈើបាននិយាយថា ឈើនោះកាប់ចេញពីព្រៃឡង់ មិនមែនកាប់ក្នុងព្រៃសហគមន៍ប្រាសាទព្រៃទឹកខ្មៅឡើយ ហើយក្រុមលោកមិនហ៊ានចាប់ទេ ព្រោះហួសសមត្ថភាព។
ទន្ទឹមនិងសេចក្តីរាយការណ៍ខាងលើ អាជ្ញាធរមូលដ្ឋានបានឲ្យដឹងថា គំនរឈើទាំងនោះ មានរហូតដល់ទៅ277ដើម មានមុខកាត់តូចធំ ប្រវែង2-3ម៉ែត្រ ដាក់រាយប៉ាយកណ្តាលព្រៃសហគមន៍ព្រៃប្រាសាទទឹកខ្មៅ ហើយត្រូវបញ្ជាក់យ៉ាងច្បាស់ថា លោក ទាវ អូន ប្រធានសហគមន៍ និងមានបក្សពួកពីរនាក់ក្នុងនោះ មានលោក កុយ រី និង លោក នន់ នឿន អតីតប្រធានសហគមន៍តែម្តង ដែលបានប្រព្រិត្តបទល្មើសខាងលើនេះ។
ក្រុមសហគមន៍មូលដ្ឋានបានរាយការណ៍ បញ្ហាបទល្មើសព្រៃឈើទ្រង់ទ្រាយធំនោះទៅ មន្រ្តីជំនាញបរិស្ថាន តែមន្រ្តីបរិស្ថានថា មិនស្ថិតក្រោមសមត្ថកិច្ចពួកគេឡើយ ក្នុងនោះអាជ្ញាធរមូលដ្ឋានបានបញ្ជាក់បន្ថែមថា បើមិនមែនដែនសមត្ថកិច្ចក៏មិនមែនចុះ ចឹងហេតុអី បានជាមានឡានយីឌុបធុនយក្ស ចូលមកដឹកឈើនៅទីនោះបាន ឬ មួយឡានយីឌុបនោះ ចេះសីលបំបាំងកាយ ពេលចូលតាមផ្លូវមកដល់មុខ មន្រ្តីប្រចាំការនៅតាមស្នាក់ការចំនុចកំពោតគយ ផ្លូវបំបែកក្រុមហ៊ុន ឈុនហុង និង ក្រុមហ៊ុនកូរ៉េ ឬមួយក៏មន្រ្តីបរិស្ថានទទួលបានលាភសក្ការៈពីគេ ឆ្លើយយករួចតែខ្លួនមួយគ្រាសិន ឆ្លើយហើយដើរចេញ ប្រកែកថាគ្មានសមត្ថភាពបង្រ្កាបដូច្នោះទៅវិញ។
អាជ្ញាធរមូលដ្ឋាន បានត្រឹមអស់សង្ឃឹម ជាមួយនិងមន្រ្តីជំនាញ ដោយពោលពាក្យថា មិនចាំបាច់ការពារអភិរក្សអីបន្តទៀតទេ ទុកវាឲ្យរលាយអស់តែម្តងទៅ ព្រោះអ្នកភូមិខំធ្វើការស្ម័គ្រចិត្ត ចំណាយទាំងកម្លាំងកាយ ចិត្ត ថវិកាផ្ទាល់ខ្លួន ដើម្បីចុះល្បាត និងការពារ ពេលជួបរាយការណ៍ទៅជំនាញ គ្មានអ្នកណាអើពើ បែជានាំគ្នាឆ្លើយទម្លាក់ទៅវិញទៅមក មិនមានការទទួលខុសត្រូវ ជាពិសេសប្រធានសហគមន៍ខ្លួនឯង ជាអ្នកប្រព្រិត្តបទល្មើសតែម្តង។
ចំណែកលោក ឆាយ ដួងសាវុធ ប្រធានមន្ទីបរិស្ថានខេត្តក្រចេះ បានឆ្លើយនិងបណ្តាញព័តមានក្នុងស្រុកថា ព័ត៌មាននៃការស្តុកឈើខាងលើ លោកបានដឹងយូរដែរ ដោយក្រុមសហគមន៍រាយកាណ៍ ហើយឥឡូវ លោកបានចាត់កម្លាំងត្រៀមចាំស្ទាក់ចាប់រួចហើយ។
ក្រុមសកម្មជនបណ្តាញព្រៃឡង់ បានលើកឡើងថា ឈើទាំង277ដើម ត្រូវបានក្រុមឡានយីឌុបដែលមានបិទស្លាកសម្គាល់រូបសត្វមុខកាប៊ិន ពាក់ស្លាកលេខភ្នំពេញ3C-3003 ក្បាលស ទៅលើកដឹកអស់ពាក់កណ្តាលហើយ បានបើកចេញពីព្រៃសហគមន៍ប្រាសាទទឹកខ្មៅ មកសម្ងំនៅចំនុចជុប តាមផ្លូវលំក្រុមហ៊ុនកូរ៉េ ជិតដល់ចំនុចស្នាក់ការកំពតគយ ដែលមានមន្រ្តីបរិស្ថាននៅយាមប្រចាំការ ចឹងពួកគាត់រង់ចាំមើលថា តើមន្រ្តីជំនាញ អាចចាប់ឡានដឹកឈើពេញឡានយីឌុបនោះបានឬអត់ រីឯឈើដែលនៅសេសសល់គឺ មានឡានមួយគ្រឿងផ្សេងទៀត កំពុងលើកដាក់ឡាន បំរុងដឹកចេញឲ្យអស់តែម្តង ហើយដល់ពេលនោះគឺនាះគ្នាចាប់ខ្យល់តែម្តង៕
