ខេត្តពោធិសាត់៖ ទោះបីមានការបង្រ្កាបដ៏ខ្លាំងក្លាពីរាជរដ្ឋាភិបាលក៏ដោយ ក៏ចែផល្លី នៅតែជាឈ្មួញយ៉ាងសកម្ម ចាំប្រមូលទិញឈើនៅក្នុងស្រុកវាលវែង ទុកលក់បន្តឲ្យឈ្មួញធំ២នាក់ទៀត គឺឈ្មួញឈ្មោះ ស ជាកូនមន្ត្រីអាវុធហត្ថ ខេត្តកំពង់ស្ពឺ និងឈ្មួញឈ្មោះ ខ្នា មកពីខេត្តកំពង់ស្ពឺ ដែលមានខ្នងបង្អែកក្រាស់ជាងស្បែកក្របីទៅទៀត នេះបើតាមប្រភពពីមន្ត្រីអង្គការក្រៅរដ្ឋាភិបាល និងប្រជាពលរដ្ឋក្នុងស្រុកវាលវែង ខេត្តពោធិ៍សាត់ បានឲ្យដឹង។
ប្រជាពលរដ្ឋរិះគន់ថា ការបង្ក្រាបបទល្មើសព្រៃឈើ របស់សមត្ថកិច្ចអាវុធហត្ថជាបន្តបន្ទាប់កន្លងទៅនេះ ពុំមានប្រសិទ្ធភាពខ្ពស់នោះទេ ព្រោះ គេបង្ក្រាបតែឈើ ហើយព្រលែងឈ្មួញម្ចាស់ឈើនៅតែអាច គេចផុតពីសំណាញ់ច្បាប់ដដែល។
ដូចជាពេលកន្លងមក នៅតំបន់ស្រុកវាលវែង ខេត្តពោធិ៍សាត់ សមត្ថកិច្ចអាវុធហត្ថបង្ក្រាប បទល្មើសព្រៃឈើ ច្រើនលើកមកហើយ ប៉ុន្តែជាក់ស្តែងឈ្មួញឈ្មោះ ស និងឈ្មោះ ខ្នា នៅតែអាចដឹកជញ្ជូនឈើពីស្រុកវាលវែង ចូលខេត្តកំពង់ស្ពឺ ហើយដឹកចេញទៅស្រុកយួន តាមច្រកព្រំដែនព្រែកចាក និងច្រកតន់ហន់ ស្រុកកំពង់ត្រាច ខេត្តកំពត ម៉ាសេរី។
រថយន្តដឹកឈើចេញពីស្រុកវាលវែង ខេត្តពោធិ៍សាត់ ចូលមកស្រុកឱរ៉ាល់និងស្រុក ភ្នំស្រួច ខេត្តកំពង់ស្ពឺ ត្រូវបានសមត្ថកិច្ចចម្រុះឬ សមត្ថកិច្ចអាវុធហត្ថចាត់វិធានការបង្ក្រាប ជាបន្តបន្ទាប់ ក៏ប៉ុន្តែឈ្មួញម្ចាស់ឈើ មិនត្រូវបានសមត្ថកិច្ចឃាត់ខ្លួន យកទៅចាត់ការតាមច្បាប់នោះទេ។
សកម្មភាពដឹកជញ្ជូនឈើចេញពីខេត្តពោធិ៍សាត់ ចូលខេត្តកំពង់ស្ពឺ នៅតែបន្តកើតមានឥតឈប់ឈរ ជាពិសេសឈ្មួញឈើម្នាក់ឈ្មោះ ចែ ផល្លី ល្បីល្បាញខាងដឹកជញ្ជូនឈើខុសច្បាប់ ជាង១០ឆ្នាំមកហើយ មិនដែលមានមន្ត្រីជំនាញ ឬសមត្ថកិច្ចពាក់ព័ន្ធណា ចាត់វិធានការបង្ក្រាបឡើយ។
ចំណែកឈ្មួញឈើឈ្មោះ ស និងឈ្មោះ ខ្នា ក៏នៅតែធ្វើសកម្មភាព ដឹកជញ្ជូនឈើខុសច្បាប់យ៉ាងគឃ្លើនដែរ ដោយសារមានការឃុបឃិតពីមន្ត្រីរដ្ឋបាលព្រៃឈើ មន្ត្រីបរិស្ថាន និងសមត្ថកិច្ចពាក់ព័ន្ធជាច្រើនស្ថាប័នទៀត។
នៅយប់ថ្ងៃទី០៩ ខែមីនា ឆ្នាំ២០១៧ កម្លាំងអាវុធហត្ថខេត្តពោធិ៍សាត់ និងកម្លាំងអា វុធហត្ថស្រុកវាលវែងប្រមាណ១៨នាក់ ស្ទាក់ចាប់បានរថយន្តប្រភេទយីឌុបភ្លៅ៥ចំនួន១ គ្រឿង និងឡោមព័ទ្ធទីតាំងស្តុកឈើរបស់ឈ្មោះ ហេង ផល្លី នៅក្នុងភូមិស្ទឹងថ្មី ឃុំប្រមោយ ស្រុកវាលវែង ខេត្តពោធិ៍សាត់ ហើយបានរកឃើញគំនរឈើជាច្រើនម៉ែត្រគូប។
ប្រជាពលរដ្ឋក្នុងឃុំប្រមោយបានឲ្យដឹងថា ឈ្មួញឈើឈ្មោះចែ ផល្លី គឺជាឈ្មួញដឹកជញ្ជូនឈើឡើងដុះស្លែ នៅក្នុងស្រុកវាលវែង ខេត្តពោធិ៍សាត់ ហើយកន្លងមកមន្ត្រីជំនាញនិងសមត្ថកិច្ចពាក់ព័ន្ធទុក ឲ្យឈ្មួញម្នាក់នេះធ្វើអ្វីៗតាមអំពើចិត្ត។
បញ្ហានេះលោក វេង សាខុន រដ្ឋមន្ត្រីក្រសួងកសិកម្ម គួរពិនិត្យឡើងវិញខ្លះផង ព្រោះមេរដ្ឋបាលព្រៃឈើក្នុងខេត្ត ពោធិ៍សាត់ និង ខេត្តកំពង់ស្ពឺ មិនយកចិត្តទុកដាក់បង្ក្រាបបទល្មើសព្រៃឈើនោះឡើយ ជាពិសេសនាយឧត្តមសេនីយ៏ សៅ សុខា ប្រធានគណកម្មាធិការបង្រ្កាបបទល្មើសធនធានធម្មជាតិ គួរបង្រ្កាបពួកមេឈ្មួញទើបផ្តាច់ឫសពួកបំផ្លាញព្រៃឈើបាន៕
