ឧត្តរមានជ័យ៖ ឯកឧត្តម ស ថាវី អភិបាល ខេត្តឧត្តរមានជ័យ មានដឹងទេថាល្បែងបាញ់កាំជ្រួច គឺជាល្បែងមួយប្រភេទគ្រោះថ្នាក់បំផុត នៅប្រទេសថៃ សមត្ថកិច្ចគេហាមឃាត់មិនឲ្យលេងទេ ចំលែកអីនៅច្រកអន្តរជាតិជាំ បានបើកលេងជាចំហរ ឱ្យជនជាតិថៃ ចូលមកលេងល្បែងភ្នាល់បាញ់កាំជ្រួចដោយសេរី ដែលផ្សែងកាំជ្រួច កំពុងតែបង្កការបំពុលបរិយាកាស បរិស្ថាន ដូចជា រំសេវ និងសំបកកាំជ្រួច ដែលធ្លាក់មកក្រោម អាចនឹងបង្កជាគ្រោះថ្នាក់គ្រប់ពេលវេលា ដល់ប្រជាពលរដ្ឋដែលមានភូមិ នៅតាមជើងភ្នំដងរែក។
សកម្មភាពដែលជនជាតិថៃ ចូលមកបាញ់កាំជ្រួច នៅក្នុងទឹកដីកម្ពុជា បានធ្វើឡើង ជារៀងរាល់ថ្ងៃសៅរ៍ និងថ្ងៃអាទិត្យ ដែលមានចំងាយប្រហែលជា ៦គីឡូម៉ែត្រ ស្ថិតនៅចំណុចភូមិអូរថ្មរ ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
គេដឹងថា ក្រុមហ៊ុនអភិវឌ្ឍន៍ផ្សារ នៅមាត់ច្រកអន្តរជាតិជាំ ជាអ្នករៀបចំ ព្រមទាំងមានអាជ្ញាប័ណ្ណច្បាប់ របស់រាជរដ្ឋាភិបាល ឲ្យលេងល្បែងបាញ់កាំជ្រួច តែក្រុមហ៊ុនគិតតែពីផលប្រយោជន៍ផ្ទាល់ខ្លួន ហើយបានមិនគិតពីផលប៉ះពាល់ទៅលើប្រជាពលរដ្ឋ ដូចជា សំបកកាំជ្រួចធ្លាក់ទៅលើលំនៅដ្ឋាន និងដីស្រែចំការរបស់ពួកគាត់។ ហើយកន្លងមក មានសំបកកាំជ្រួច បានធ្លាក់ទៅលើដីចំការប្រជាពលរដ្ឋ ជាប្រភេទបំពង់ទីបជ័រ និងដើមឬស្សី ដែលមានប្រវែង ពី ៥ម៉ែត្រទៅ ៦ម៉ែត្រ ហើយខ្លះទៀតមានប្រវែង ទៅដល់ ៨ម៉ែត្រ ទៅ៩ម៉ែត្រ ក៏មានដែរ ហើយជាសំណាង ដែលប្រជាពលរដ្ឋពុំមានគ្រោះថ្នាក់នោះ។
តាមប្រភពពីមន្រ្តីមាត់ច្រកអន្តរជាតិជាំ បាននិយាយថា ការបាញ់កាំជ្រួចភ្នាល់ ចាក់លុយ នៅទីតាំងខាងលើ គេលក់សំបុត្រឱ្យពលរដ្ឋខ្មែរ និងពលរដ្ឋថៃ ក្នុងម្នាក់ ៥០០បាតថៃ ហើយនៅប្រទេសថៃ គេមានច្បាប់ ហាមឃាត់មិនឱ្យ មានបាញ់កាំជ្រួចលេង ព្រោះនៅប្រទេសថៃ កន្លងមកធ្លាប់កើត មានគ្រោះថ្នាក់ ដែលសំបកកាំជ្រួច បានធ្លាក់ចំមនុស្សស្លាប់ ហើយធ្លាក់ទៅលើលំនៅដ្ឋានឆេះ និងគ្រោះថ្នាក់ធ្លាក់ទៅកន្លែងឆ្ងាយៗទៀត ដែលរយៈកំពស់ក្នុងកាំជ្រួចមួយដើម អាចហោះបាន ចាប់ពី ១ពាន់ម៉ែត្រ ទៅ២ពាន់ម៉ែត្រ ហើយផ្សែងកាំជ្រួច ក៏ប៉ះពាល់ដល់បរិស្ថានធ្ងន់ធ្ងរផងដែរ។
វាជាប្រការគួរឲ្យអាម៉ាស់ ដែលសមត្ថកិច្ចថៃមិនឲ្យលេងល្បែងភ្នាល់បាញ់កាំជ្រួចនៅក្នុងទឹកដីថៃ តែថៃអាចចូលមកលេងក្នុងដីខ្មែរដោយសេរី ដែលជាប្រភេទល្បែងស៊ីសងផង និងបណ្តាលឲ្យមានគ្រោះថ្នាក់ ដល់ពលរដ្ឋខ្មែរដែលរស់នៅតំបន់នោះផង ឫមួយអ្នកធំខ្មែក៏ឆ្កួតនិងល្បែងនេះដែរ?៕
