រាជធានីភ្នំពេញ ៖សម្តេចនាយករដ្ឋមន្ត្រី បានអំពាវនាវជាថ្មីទៀតដោយបង្ហាញនូវឆន្ទៈដ៏មុះមុតថា រាជរដ្ឋាភិបាលបានដាក់ចេញរួចហើយ នូវការកំណត់ឲ្យមានអភិបាលរងខេត្តជាស្ត្រី តែបច្ចុប្បន្នមិនទាន់មាន អភិបាលខេត្ត ឬអភិបាលរាជធានីជាស្ត្រីនៅឡើយ ។ សម្តេច ហ៊ុន សែន បានស្នើឲ្យមានការរៀបចំកំណត់ ខេត្តណាមួយដាក់ស្ត្រីជាអភិបាលខេត្ត ហើយបើបានពីរខេត្តរឹតតែល្អ ។
សម្តេចតេជោ ហ៊ុន សែន អំពាវនាវស្ទើររាល់ឆ្នាំ ឲ្យតែដល់ទិវា៨មិនាម្តងៗ រឿងលើកតម្កើងតួនាទីស្ត្រីក្នុងស្ថាប័នរដ្ឋ ប៉ុន្តែមកដល់ពេលនេះ មិនទាន់ឃើញមានការផ្លាស់ប្តូរនោះទេ ខណៈដែលស្ត្រីមិនទាន់បានកាន់តំណែងក្នុងស្ថាប័នសំខាន់ៗ របស់រដ្ឋនៅឡើយ ហើយនេះជាចំណងដៃ ទិវាសិទ្ធនារី សម្តេចតេជោ ហ៊ុន សែន អំពាវនាវ រឿងលើក តម្កើងតួនាទី ស្ត្រីក្នុងស្ថាប័នរដ្ឋ។
ទន្ទឹមនោះ សម្តេចក៏បានថ្លែងជំរុញ ឲ្យដាក់បេក្ខភាពស្ត្រីក្នុងតួនាទីសំខាន់ៗនៅតាមក្រសួង ស្ថាប័ននានារបស់រដ្ឋផងដែរ ។ ដូចជាដាក់បេក្ខភាពស្ត្រី ជាអគ្គមេបញ្ជាការរង ជានាយសេនាធិការរង ដូចគ្នានឹងអង្គភាពកងកម្លាំងប្រដាប់អាវុធ នៅតាមបណ្តាខេត្តផងដែរ ។
ចាំមើលលើកនេះមើល តើមានការផ្លាស់ប្តូរដែរទេ ឬក៏ការអំពាវនាវបានត្រឹមតែស្តាប់ឮ ប៉ុន្តែពុំមានការអនុវត្តដោយមានប្រសិទ្ធិភាព ៕
