ខេត្តរតនគីរី ៖ អ្នកកាសែតម្នាក់បែកក្បាលហូរឈាមស្រោចមុខ ដោយប្រធានបរិស្ថានស្រុកលំផាត់ លោក ជន់ គឹមឡេង បានវាយបណ្ដាលឲ្យបែកក្បាល បន្ទាប់ពីអ្នកកាសែតរូបនោះនិយាយពាក់ព័ន្ធដល់ការងារផ្ទៃក្នុងរបស់បរិស្ថានស្រុក ។ ជម្លោះនោះកើតឡើងក្នុងវង់ផឹកស៊ីតែម្តង ខណៈដែលអ្នកកាសែតបានប្រាប់ប្រធានបរិស្ថានថា កុំចាប់ឈើពេក ហើយកុំចាប់ប្រជាជនរកស៊ីឈើបន្តិចបន្តួច ចំណែកអារកស៊ីធំៗ អត់ចាប់នោះ ។
ជម្លោះផឹកស៊ីនាំឲ្យមានការវ៉ៃបែកក្បាលនេះ បានកើតនៅក្នុងបន្ទាយយោធាស្រុកលំផាត់ កាលពីវេលាម៉ោង៧យប់ ថ្ងៃទី៥ ខែមីនា ឆ្នាំ២០១៧ ។ ជនរងគ្រោះឈ្មោះ រាជ សម្បត្តិ ហៅ ផល ជាភ្នាក់ងារកាសែត គំនិតខ្មែរ ទីលំនៅក្នុងទីរួមស្រុកលំផាត់ ។ ចំណែកជនបង្កពិតជាមន្ត្រីបរិស្ថានមែន តែបានរត់គេចខ្លួនហើយ ចំណែកនគរបាលស្រុកឃាត់បានតែរថយន្តប៉ុណ្ណោះ នេះជាសម្តីរបស់លោក ថេង ចាន់ធី អធិការនគរបាលស្រុកលំផាត់ បានប្រាប់អ្នកសារព័ត៌មាន។
តាមប្រភពសមត្ថកិច្ចបានឲ្យដឹងថា ប្រធានបរិស្ថានស្រុក និង អ្នកកាសែតសុទ្ធតែមនុស្សស្គាល់គ្នា ពេលកំពុងផឹកស៊ីស្រាប់តែមានជម្លោះពាក្យសម្តីកើតឡើង រហូតប្រធានបរិស្ថានស្រុកលំផាត់បានទាញកៅអីវាយអ្នកកាសែតរូបនោះរហូតដល់បែកក្បាល ។ ក្រោយកើតហេតុសមត្ថកិច្ចទៅដល់ ចាប់បានតែឡានទេ ដោយឡែកប្រធានបរិស្ថានរូបនេះ មិនទាន់ត្រូវបានចាប់ខ្លួននៅឡើយទេ ។
លោក រាជ សម្បត្តិ ហៅផល បានឲ្យដឹងថា ដោយសារតែជាបងប្អូននឹងគ្នា ទើបលោកមិនបានប្តឹងផ្តល់នោះទេ ហើយបានបញ្ចប់រឿង ថែមមិនទាមទារសំណងថ្លៃព្យាបាលថែមទៀតផង ។
តាមច្បាប់ជនបង្កត្រូវប្រឈមនឹងបណ្តឹងអាជ្ញា មិនអាចរួចខ្លួនឡើយ បើទោះបីជាជនរងគ្រោះមិនដាក់ពាក្យប្តឹងក៏ដោយចុះ គេរង់ចាំមើលតើពិរុទ្ធជនអាចរួចខ្លួនឬទេ៕
