ខេត្តរតនគិរី៖ កាលពីល្ងាចថ្ងៃទី២៦ខែកុម្ភៈឆ្នាំ២០១៧ មន្ត្រីសាធារណៈការផ្នែកជញ្ជីងថ្លឹងរថយន្ត បានឃាត់រថយន្តយីឌុបដឹកដំឡូងមី ប្រមាណជិត៨០គ្រឿង ដែលផ្ទុកលើសទម្ងន់ ដើម្បីធ្វើការផាកពិន័យ ចំនួនទម្ងន់ដែលលើសកំណត់។
ចំណែកម្ចាស់រថយន្តយីឌុបខាងលើ បានប្រមូលផ្តុំគ្នាធ្វើការតវ៉ា និងមន្ត្រីជញ្ជីងថ្លឹងរថយន្ត ដែលស្ថិតនៅចំណុចភូមិត្រពាំងក្រហម ឃុំត្រពាំងក្រហម ស្រុកកូនមុំ ខេត្តរតនគិរី។
ពលរដ្ឋដែលជាម្ចាស់រថយន្តយីឌុបដឹកដំឡូងមីខាងលើ បានអោយដឹងថា ជារៀងរាល់ដង ក្រុមមន្ត្រីជញ្ជីងថ្លឹងរថយន្ត នៅចំណុចឃុំត្រពាំងក្រហម ស្រុកកូនមុំ បានទាមទាតម្លៃបង់ការដឹកជញ្ជូនដំឡូងមី ក្នុងមួយរថយន្តយីឌុប ជាប្រាក់ចំនួន៥០០០០រៀល ទៅ៦០០០០រៀលប៉ុណ្ណោះ មិនដែលឡើងត្រួតពិនិត្យ ឬឡើងជញ្ជីងថ្លឹងអ្វីនោះទេ តែពេលនេះ ស្រាប់តែឃាត់រថយន្តពួកគាត់ ផាកពិន័យតែម្តង ដោយពុំបានជូនដំណឹងជាមុនសោះ។
ប្រជាពលរដ្ឋ ដែលជាម្ចាស់រថយន្តយីឌុបដឹកដំឡូងមីខាងលើ បានអោយដឹងទៀតថា ដោយសារបច្ចុប្បន្ននេះ ផលិតផលដំឡូងមី កំពុងមានបញ្ហាធ្លាក់តម្លៃចុះថោកផងនោះ ពួកគាត់បានសុំសម្រួល ជាមួយនិងមន្ត្រីជញ្ជីងថ្លឹងរថយន្តប្រចាំការនៅទីនោះ ពួកគាត់សុំបង់លុយជូនរថយន្តដែលដឹកផ្ទុកលើសទម្ងន់ រថយន្តមួយគ្រឿងសុំបង់ត្រឹមតែ ៣០០០០០រៀល បានហើយ សូមយោគយល់និងអាណឹតដល់ពួកគាត់ ជាប្រជាពលរដ្ឋផង។
ក្រោយពីការសម្រួលពីក្រុមប្រជាពលរដ្ឋ និងមន្ត្រីជញ្ជីង រហូតមកដល់ល្ងាចថ្ងៃទី២៦ខែកុម្ភៈនេះ នៅមិនទាន់មានចម្លើយ ដល់ម្ចាស់រថយន្តនៅឡើយនោះទេ ហើយមតិសាធារណៈ មានចម្ងល់ថា ចុះរថយន្តយីឌុបដឹកឈើលើសទម្ងន់ឆ្លងកាត់ ស្ថានីយ៏ជញ្ជីងខាងលើធ្វើមើលមិនឃើញ ពិតជាពូកែរកលេខដាក់គ្មាន។
លោក ឃឹម រម្មនី អនុប្រធានមន្ទីសាធារណៈការនិងដឹកជញ្ជូនខេត្តរតនគិរីទទួលបន្ទុកផ្នែកខាងជញ្ជីងថ្លឹងរថយន្ត មិនអាចសុំការបំភ្លឺបាននោះឡើយ៕ដោយ លៀង ធាង
