ក្រចេះ៖ នៅថ្ងៃទី19 ខែកុម្ភៈ ឆ្នាំ2017 នៅវេលាម៉ោង8.00ព្រឹក មានបើកការដ្ឋាន ធ្វើផ្លូវមួយខ្សែ ក្រាលគ្រួស ក្រហម ដែលមានប្រវែង1031ម៉ែត្រ នឹងទទឹង4ម៉ែត្រ ឧបត្ថម្ភថវិកាផ្ទាល់ខ្លួន របស់សប្បុរសជន ឯកឧត្តម គង់ ក្រឹង ដោយមានការចូលរួមពី លោកអភិបាលនៃគណអភិបាលស្រុកស្នួល លោក គង់ គឹមនី ជាគណអធិបតីដ៏ខ្ពង់ខ្ពស់ អភិបាលរង ព្រមទាំងមន្រ្តីរាជការជាច្រើនទៀត។
ក្នុងឱកាសនោះដែរ លោកអភិបាលស្រុក បានមានប្រសាសន៍សំណេះសំណាល ជាមួយប្រជាពលរដ្ឋ ដែលបានចូលរួមប្រកប ដោយភាពស្និទ្ធស្នាលជាទីបំផុត លោកបានពន្យល់ប្រាប់បងប្អូន អោយចូលរួមយល់ដឹង ពីបញ្ហាភូមិឃុំមានសុវត្តិភាពទាំង9ចំណុច ប្រាប់ប្រជាពលរដ្ឋ អោយយល់ដឹងពីបញ្ហាគ្រោះថ្នាក់ចរាចរ នឹងណែនាំអោយពលរដ្ឋទៅបោះឆ្នោតជ្រើសរើសមេឃុំ នៅខែ6ខាងមុខនេះ អោយបានគ្រប់ៗគ្នា។
លោកក៏បានថ្លែងអំណគុណដល់ ឯកឧត្តម គង់ ក្រឹង ដែលតែងតែចំណាយថវិកាផ្ទាល់ខ្លួន ជួ យឧបត្ថម្ភដល់ប្រជាពលរដ្ឋ ដែលខ្វះខាតពិតប្រាកដ មិនថាផ្លូវថ្នល់ សាលារៀន អណ្តូងទឹក ចាស់ជរា។ល។
ក្នុងកម្មវិធីនេះដែរ ក៏មានការផ្តល់ជាថវិកា ដល់គ្រួសារចំនួន6គ្រួសារ ដែលត្រូវបានភ្លើងឆេះផ្ទះ កាលពីយប់ថ្ងៃទី14 កុម្ភៈ ឆ្នាំ2017 កន្លងទៅ នូវថវិកាមួយគ្រួសារបានចំនួន1500000រៀល(មួយលានហាសិបម៉ឺនរៀល) ក្នុងនោះឯកឧត្តម គង់ ក្រឹង ជួយមួយគ្រួសារ1000000រៀល(មួយលានរៀល) គណបក្សប្រជាជនថ្នាក់កណ្តាល ប្រចាំស្រុកស្នួល ជួយ300000រៀល(សាមសិបម៉ឺនរៀល) មូលនិធិឥស្លាមស្រុកស្នួល ជួយ200000រៀល(ម្ភៃម៉ឺនរៀល) ក្រោយពីប្រគល់ថវិកា ជូនប្រពលរដ្ឋទាំងប្រាំមួយគ្រួសាររួច លោកអភិបាលបានប្រាប់ពលរដ្ឋទាំងប្រាំមួយគ្រួសារថា បើសិនជាធ្វើផ្ទះឡើងវិញ កុំភ្លេចទៅភូមិឃុំនិងស្រុក ដើម្បីអោយជួយធ្វើច្បាប់ដឹកជញ្ជូនឈើ អោយងាយស្រួល ក្នុងការដឹកជញ្ជូនយកមកធ្វើផ្ទះ។ ទាំងនេះសអោយឃើញថា ស្រុកតែងតែយកចិត្តទុកដាក់ នូវរាល់សុខទុក្ខ របស់ប្រជាពលរដ្ឋយ៉ាងខ្លាំង៕
