ខេត្តរតនគីរី៖ ព័ត៌មានមិនប្រក្រតីមួយបានបែកធ្លាយ គឺនៅក្រោយពេលគេប្រទះឃើញ មានបទល្មើសព្រៃឈើ កាលពីថ្ងៃទី១៥ ខែកុម្ភៈ ឆ្នាំ២០១៧ ដែលដាក់ពង្រាយក្នុងព្រៃ នៅខាងក្រោយស្នាក់ការដែនជម្រកសត្វព្រៃស្រុកលំផាត់ ចំងាយប្រហែលជា១៥០ម៉ែត្រទៅ២០០ម៉ែត្រ ស្ថិតនៅក្នុងភូមិអូរល្វាក់ ឃុំជ័យឧត្ដម ស្រុកលំផាត់ ខេត្តរតនគិរី។
ប្រភពពីពលរដ្ឋបានឲ្យដឹងថាមន្ត្រីបរិស្ថាន ប្រចាំនៅដែនជម្រកសត្វព្រៃលំផាត់ បានក្លាយជាមន្ត្រីក្នុងជំនួញបទល្មើសព្រៃឈើយ៉ាងសកម្ម ក្នុងខេត្តរតនគិរី។
ប្រភពអះអាងថា មន្ត្រីអនុរក្សដែលមានតួនាទីការពារព្រៃដែលរាជរដ្ឋាភិបាលប្រគល់តួនាទីឲ្យ តែពួកគេបែជាក្នុងម្នាក់ៗ មានរណាយន្តរៀងៗខ្លួន ដាក់កម្លាំងចូលទៅកាប់អារឈើ នៅក្នុងព្រៃដែនសមត្ថកិច្ចរបស់ខ្លួន យ៉ាងអនាធិបតេយ្យ។
ប្រជាពលរដ្ឋនៅតំបន់នោះបានអះអាងថា ឈើប្រភេទឈើធ្នង់និងសុក្រំ ត្រូវគេដឹកជញ្ជូនជារៀងរាល់ថ្ងៃ ទៅលាក់ពង្រាយ នៅខាងក្រោយស្នាក់ការដែនជម្រកសត្វព្រៃ ទុកលក់ទៅឲ្យក្រុមឈ្មួញ។
អ្នកដែលកាប់ឈើដឹកទៅលាក់ពង្រាយ ខាងក្រោយស្នាក់ការបរិស្ថាននោះ គឺជាបក្សពួកសាច់សាលោហិតរបស់មន្ត្រីបរិស្ថាន ដែលមានឈ្មោះសុខឡេង មានតួនាទីជា ប្រធានក្រុមល្បាត ប្រចាំស្នាក់ការដែនជម្រកសត្វព្រៃលំផាត់ និងបក្សពួក២នាក់ទៀត ដែលស្គាល់ឈ្មោះធី និងឈ្មោះរ៉ុន ជាមន្ត្រីបរិស្ថានប្រចាំការនៅទីនោះជាមួយគ្នា។
គំនរឈើដែលលាក់ពង្រាយនៅក្រោយស្នាក់ការនោះ គឺជាឈើដែលមន្ត្រីបរិស្ថានប្រមូលទិញ ពីប្រជាពលរដ្ឋ ហើយបើសិនជាប្រជាពលរដ្ឋណា មិនលក់ឈើឲ្យក្រុមមន្ត្រីបរិស្ថានខាងលើនោះ គឺពួកគេត្រូវចាប់ឃាត់ទុកដើម្បីជាការព្រមាន។
សេចក្ដីរាយការណ៍បានបន្តឲ្យដឹងថា ក្រោយពីមានការបែកធ្លាយពីការស្តុកឈើនេះ ដើម្បីដោះបន្ទុក ក្រុមបរិស្ថានទាំងនោះបានបង្វែសាច់រឿង ទៅជាឈើចាប់បង្ក្រាបទៅវិញ។
បើទោះប្រធានក្រុមល្បាតបរិស្ថាន ប្រចាំការដែនជម្រកសត្វព្រៃលំផាត់ លោក សុខឡេង បញ្ជាក់ប្រាប់អ្នកកាសែត កាលពីព្រឹកថ្ងៃទី១៦ខែកុម្ភៈកន្លងទៅនេះថា ឈើទាំងនោះ.មិនមែនលោកជាអ្នករកស៊ីទិញដូរអីទេ គឺឈើទាំងនោះត្រូវបានលោកចាប់ឃាត់ពីក្រុមឈ្មួញ ដែលយកមកលាក់ក្បែរផ្លូវចូល ភូមិអូរល្វាក់ ចម្ងាយប្រហែល៧គីឡូម៉ែត្រ ពីទីស្នាក់ការដែនជម្រក។
ប៉ុន្តែបើយោងសេចក្ដីរាយការណ៍ថា មានរថយន្តដឹកឈើតែងតែធ្វើសកម្មភាព ដឹកជញ្ជូនឈើចេញនិងចូល ជារៀងរាល់ថ្ងៃ យូរខែ យូរឆ្នាំមកហើយ នៅក្រោយស្នាក់ការបរិស្ថាននោះ៕
