កំពង់ឆ្នាំង៖ តាមប្រភពពត័មានពីប្រជាពលរដ្ឋឲ្យដឹងថា មានសង្វៀនបញ្ជល់មាន់មួយកន្លែង នៅស្រុកកំពង់ត្រឡាច ខេត្តកំពង់ឆ្នាំង កំពុងលួចលេងយ៉ាងកក្រើក ក្រោយពីឈប់បានប្រមាណជាដប់ថ្ងៃ ដោយសង្វៀនខាងលើក៏មានបង្កប់ល្បែងស៊ីសង មានបៀរ អាប៉ោង ចាក់ភ្នាល់ស៊ីសងធំៗផងដែរ
ហើយត្រូវបានគេដឹងថា គ្រប់គ្រងដោយឈ្មោះ ឆង ជាទាហានពាក់សក្តិ៤កន្លះ ផ្នែកគីមីសាស្ត្រ នៅលង្វែក។
សង្វៀនជល់មាន់របស់ឈ្មោះឆង បានបើកដំណើរការជាច្រើនឆ្នាំមកហើយ ប៉ុន្តែមិនដែលឃើញសមត្ថកិច្ចណាម្នាក់ទៅរំខានឡើយ ហើយការបើកភ្នាល់ជល់មួយគូរ សុទ្ធតែរាប់លានរៀល ដោយម្ចាស់សង្វៀនជើងខ្លាំង បានបង្កើតទីតាំងចំនួន3កន្លែងសំរាប់ចល័ត ដែលមានព្រំប្រទល់បីស្រុកជាប់គ្នា និងមានអ្នកចូលលេងយ៉ាងគគ្រឹកគគ្រេង ។
ឈ្មោះ ឆង កំពុងរកស៊ីកាក់កបណាស់ អ្នកលក់ដូរក្នុងសង្វៀនមាន់ ក៏ត្រូវបង់លុយប្រចាំខែដល់ម្ចាស់សង្វៀនម្នាក់រាប់រយដុល្លា ចំណែកអាប៉ោងមួយវង់ក៏បង់ប្រាក់ក្នុង១ថ្ងៃ300ដុល្លាដែរ ដូច្នេះសង្វៀនជល់មាន់របស់ឈ្មោះ ឆង រកប្រាក់ចំណូលក្នុង១ខែៗ ប្រមាណជាខ្ទង់ម៉ឺនដុល្លាឯណោះ នេះមិនទាន់គិតពីប្រាក់កំរៃបានមកពីការបញ្ជល់មាន់ទៀតផង ។
សង្វៀនមាន់បង្កប់ដោយល្បែងស៊ីសងស្ទើគ្រប់ប្រភេទ របស់ឈ្មោះឆងលេងដោយរលូន ដោយគ្មានការរំខានពីសំណាក់សមត្ថកិច្ចបែបនេះ ត្រូវគេសង្ស័យថា ម្ចាស់សង្វៀនពិតជាបង់លុយប្រចាំខែ ជូនដល់ថ្នាក់លើ ទើបអាចលេងបានម៉ាសេរី។
ពាក់ព័ន្ធនឹងករណីនេះដែរ លោកឧត្តមសេនីយ៍ ស្នងការនគរបាលខេត្តកំពង់ឆ្នាំង ឡុច វណ្ណារ៉ា កន្លងមក លោកធ្លាប់បញ្ជាក់ថា លោកនឹងបង្ក្រាបឱ្យអស់រាល់សកម្មភាព ដែលទាក់ទងនឹងបទល្មើសទាំងឡាយ ប៉ុន្តែចំពោះករណីថា មានគេលួចបង្កើត សង្វៀនជល់មាន់ឬល្បែងស៊ីសង ក្នុងតំបន់ដែលលោកកាន់កាប់មែននោះ លោកនឹងចាត់ឱ្យកូនចៅចេញទៅបង្ក្រាបតែម្តង។
ទាក់ទិននឹងការបើកសង្វៀនជល់មាន់បង្កប់ល្បែង បៀរ អាប៉ោង ខាងលើ លោក ម៉ាត់ លី អធិការនគរបាលស្រុកកំពង់ត្រឡាច បានប្រាប់អ្នកយកព័ត៌មានក្នុងស្រុកមួយថា ភូមិសាស្ត្ររបស់លោក ពុំដែលលេចឮថាមានបទល្មើសបញ្ជល់មាន់ ឬប្រភេទល្បែងស៊ីសងផ្សេងៗឡើយ ក្រែងអាចមានក្នុងភូមិសាស្ត្រស្រុកពញាឮ ខេត្តកណ្តាលក៏មិនដឹង ។ ដោយឡែក អធិការនគរបាលស្រុកពញាឮ ក៏បានបញ្ជាក់យ៉ាងច្បាស់ថា ក្នុងតំបន់ភូមិសាស្ត្រដែលលោកគ្រប់គ្រង គីដាច់ខាចអត់មានល្បែងស៊ីសងអ្វីទាំងអស់ ប៉ុន្តែ លោកធ្លាប់ឮថាសង្វៀនជល់មាន់ ពិតជាបានបង្កើតនៅក្នុងទឹកដី ឃុំលង្វែក ស្រុកកំពង់ត្រឡាច ខេត្តកំពង់ឆ្នាំង ឯណោះវិញទេ បើចង់ដឹងច្បាស់សាកសួរសមត្ថកិច្ចក្នុងតំបន់នោះទៅ ។បញ្ហានេះវាពិតដូចពាក្យចាស់លោកពោលថា គ្នាច្រើនអន្សមខ្លោច គ្នាដូចស្រមោចអន្សមឆៅ។
ទោះជាបែបណា ពលរដ្ឋបាននាំគ្នារិះគន់ខ្លាំងៗ មកលើសមត្ថកិច្ច ដែលគ្រប់គ្រងក្នុងតំបន់ខាងលើ ដែលបណ្តោយឲ្យមាន ការបើកបនល្បែងរបស់ឈ្មោះឆងយូរឆ្នាំមកហើយ បែរជាសមត្ថកិច្ចថាមិនដឹង ហើយបែរជាឆ្លើយយករួចខ្លួន ដោយសំអាងលើភូមិសាស្ត្របើកល្បែង ជាចំណុចព្រំប្រទល់បីខេត្ត គី កំពង់ឆ្នាំង កណ្តាលនិងកំពង់ស្ពឺ ទើបបានជាសមត្ថកិច្ចមិនសូវខ្វល់ខ្វាយនិងឆ្លើយយករួចខ្លួនបែបនេះ ហើយមានតែ អគ្គស្នងការនគរបាលជាតិលូកដៃចូលទេ ទើបអាចបង្រ្កាបសង្វៀនមាន់ឈ្មោះឆងបាន។
យើងពុំអាចសុំការបំភ្លឺពី សមត្ថកិច្ចស្រុកកំពង់ត្រឡាចបានទេ ព្រោះពុំមានលេខទូរសព្ទ័៕
