សត្វដង្កូវរហូតទៅដល់៦៧ ត្រូវបានក្រុមគ្រូពេទ្យជំនាញ នៃមន្ទីរពេទ្យព្រះអង្គឌួង យកចេញពីច្រមុះបុរសម្នាក់កាលពីថ្ងៃទី១៣ និងថ្ងៃទី១៤ កុម្ភៈ ឆ្នាំ២០១៧ កន្លងទៅនេះ។
លោកវេជ្ជបណ្ឌិត អ៊ុង នរិន្ទ នៃមន្ទីរពេទ្យព្រះអង្គឌួង បានឲ្យដឹងថា អ្នកជំងឺមានអាការៈឈឺច្រមុះ និងឈឺក្បាលអស់រយៈពេល១ឆ្នាំមកហើយ។ អ្នកជំងឺតែងធុំក្លិនស្អុយ ហើយក៏តែងឈាមច្រមុះ នៅពេលនោះក៏មានដង្កូវធ្លាក់មក ទើបគាត់មកពិនិត្យ រួចក្រុមគ្រូពេទ្យក៏បានថតឆ្លុះ និងរកឃើញមានដង្កូវនៅក្នុងច្រមុះរបស់គាត់។
តាមលោកវេជ្ជបណ្ឌិត ការយកដង្កូវចេញ គឺធ្វើឡើងពីរលើក ដោយលើកទី១នៅថ្ងៃទី១៣ កុម្ភៈ ដោយយកចេញបានចំនួន១២ ហើយក្រុមគ្រូពេទ្យក៏បន្តយកចេញនៅថ្ងៃទី១៤ កុម្ភៈ ទៀត ដោយរកឃើញដង្កូវសរុបចំនួន៦៧។
លោកវេជ្ជបណ្ឌិតបានបញ្ជាក់ថា មូលហេតុដែលបណ្តាលឲ្យមានដង្កូវទៅក្នុងរន្ធច្រមុះ ហើយពេលខ្លះនៅនឹងត្រចៀក ឬភ្នែក គឺវាបង្កដោយសត្វរុយ។ លោកថា នៅពេលដែលចម្រុះ ឬត្រចៀកមានសាច់ស្អុយ រុយនឹងទៅទុំ រួចវានឹងជម្រុះពងដែលវានឹងវិវឌ្ឍន៍ទៅជាដង្កូវ។ ហើយដង្កូវទាំងនោះអាចរស់ធំធាត់បានដោយសារតែវាស៊ីសាច់ស្អុយពីក្នុងច្រមុះ ឬត្រចៀកយើង។ ប្រសិនបើវាស៊ីយូរទៅ វានឹងអាចប៉ះពាល់ដល់ប្រព័ន្ធប្រសាទ ឬធ្វើឲ្យភ្នែករបស់យើងពិការទៀតផង៕
