ខេត្តស្វាយរៀង៖ រហូតមកដល់ថ្ងៃទី១៣ ខែកុម្ភៈ ឆ្នាំ២០១៧ កងកម្លាំងចម្រុះ នៃគណកម្មការបង្ក្រាបបទល្មើសថ្នាក់ជាតិ និងថ្នាក់ខេត្ត រួមទាំងមេព្រៃចុះមកពីក្រសួង ដឹកនាំបញ្ផាដោយលោកព្រះរាជអាជ្ញាអមសាលាដំបូងខេត្តស្វាយរៀងផងនោះ បានចុះឆែកឆេរឃ្លាំងឈើ ៣កន្លែង ស្ថិតនៅក្នុងខេត្តស្វាយរៀង ចាប់តាំងពីថ្ងៃទី១០ ខែកុម្ភៈ ឆ្នាំ២០១៧មកម្លេះ ។
ជាក់ស្ដែងការចុះឆែកឆេនេះ ឃើញឈើនៅលើរថយន្តអាវេអង ចំនួន៧រថយន្តកន្លះ សង្ស័យថាមានភាពមិនប្រក្រតី តែប្រពន្ធ លោកសាយ បានអះអាងថា សុទ្ធសឹងតែឈើមានច្បាប់។ សូមបញ្ជាក់ថា ឃ្លាំងឈើទី១-ឈ្មោះសាយ បានយកទៅផ្ញើរក្នុងដេប៉ូឈើ ឈ្មោះ ឯក ស៊ីថា ចំនួនជាង៣រថយន្តកន្លះ ស្ថិតក្នុងភូមិតាណែង និងឃ្លាំងទី២-បានទុកនៅចំណុចការាសសាំង ខ្លួនឯង ឃ្លាំងសាយ មានចំនួនជាង៤រថយន្ត អាវេអង ស្ថិតនៅក្នុងភូមិពោន នៅក្នុងឃុំសង្កែ ស្រុករំដួល ខេត្តស្វាយរៀងដូចគ្នា។ ចំណែកដេប៉ូទី៣- មានម្ចាស់ឈ្មោះ លាភ ជាក់ស្ពែងពុំមានឈើនៅលើរថយន្តនោះទេ តែមានឈើដុលៗ ធំៗ វែងៗ ជាច្រើនសង្ស័យថាលើសប៉េសេ ច្បាប់ដឹកជញ្ជូន មាន ប្រហែល១០០ម៉ែត្រគូប តែម្ចាស់បានអះអាងថា ជាឈើមានច្បាប់ត្រឹមត្រូវ ។
បើយោងតាមការប៉ាន់ប្រមាណពីមហាជនបានឱ្យដឹងថា ឈើនៅលើរថយន្ត អាវេអងជាង៧រថយន្តនោះ មានចំនួនមិនក្រោមពីចំនួន៤០០ម៉ែត្រគូបនោះទេ បើវាស់វែងត្រឹមត្រូវ។ តែប្រជាពលរដ្ឋ មានការព្រួយបារម្មណ៍ ខ្លាចក្រែងមាន សមត្ថកិច្ចខិលខូចខ្លះ លួចស៊ិសស៊ុះ ឃុបឃិតគ្នា ជាមួយពួកឈ្មួញ មុខឌឺ ទាំងនោះ លួចទទួលសំណូក ឬលាភសក្ការៈផ្សេងៗ ហ៊ានភូតកុហក់លាក់បាំងជាមួយថ្នាក់លើ ធ្វើរបាយការណ៍ បន្ធូបន្ថយចំនួនឈើដែលខុសច្បាប់ ដើម្បីជួយសម្រាលដល់ពួកឈ្មួញ ក្នុងការចូលខ្លួនទៅបង់ពិន័យ ជូនរដ្ឋឱ្យបានត្រឹមត្រូវទៅតាមផ្លូវច្បាប់។
សង្ឃឹមថាថ្នាក់លើនឹងចាត់វិធានការ រឿងខាងលើនេះយ៉ាងម៉ឺងម៉ាត់បំផុត ទៅតាមផ្លូវច្បាប់ មិនយោគយល់ ចំពោះបុគ្គលណា ដែលហ៊ានយកឋានៈ និងតួនាទីទៅប្រឡូកប្រឡាក់ ឬពាក់ព័ន្ធក្នុងរឿងអំពើពុករលួយ នេះជាដាច់ខាត ព្រោះនេះជាបទបញ្ជាដ៏ខ្ពង់ខ្ពស់ របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា៕
