ខេត្តកំពង់ស្ពឺ៖ ក្រោយពីមានការអំពាវនាវរបស់ថ្នាក់ដឹកនាំ ក៏ដូចជាការយកចិត្តទុកដាក់របស់ឯកឧត្តម វ៉ី សំណា ជាមេបញ្ជាការកងឯកភាពខេត្តកំពង់ស្ពឺ ស្តីអំពីបញ្ហាបង្រ្កាបបទល្មើសព្រៃឈើនៅកម្ពុជា សមត្ថកិច្ចខេត្តកំពង់ស្ពឺ
កំពុងតែដុតដៃដុតជើង ហើយឈានទៅបង្ក្រាបទីតាំងលាក់ឈើរបស់ក្រុមឈ្មួញជាច្រើនកន្លែង។
ជាក់ស្តែងនៅយប់ ថ្ងៃទី០៨ ខែកុម្ភៈ ឆ្នាំ២០១៧ វេលាម៉ោង០៧៖៣០ កម្លាំងបរិស្ថានចំណុចស្រែកិន ក្រុមទី០៥ ដឹកនាំដោយលោក កង ញឹប បានចុះបង្ក្រាបទីតាំងដាក់ឈើមួយកន្លែង ដែលក្រុមឈ្មួញយកមកលាក់ទុក នៅខាងក្រោយផ្ទះអ្នកស្រុកស្ថិតនៅ ភូមិស្រែកិន ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។
ជាលទ្ធផលបង្ក្រាបទីតាំងខាងលើនេះ កំម្លាំងមន្ត្រីបរិស្ថានបានរកឃើញឈើចំនួន១៧ដុំ ជាប្រភេទឈើផ្ចឹកនិង គគីរ មានមុខកាត់៣០ជុំ៤០ជុំ ប្រវែង ៣ម៉ែត្រទៅ៥ម៉ែត្រ។
បើតាមសំដីលោក កង ញឹប បាននិយាយប្រាប់អ្នកសារព័ត៍មានថា៖ ឈើទាំង១៧ដុំនេះ លោកត្រូវយកមករក្សាទុកនៅស្នាក់ការរបស់លោក ដើម្បីចាត់ការតាមនិតិវិធីច្បាប់។
ប្រជាពលរដ្ឋសង្ឃឹមថា យុទ្ធនាការនិងធ្វើដូចជាភ្លៀងរលឹម អស់ពីកំលាំងកាយចិត្ត ដើម្បីការពារព្រៃឈើដែលនៅសេសសល់អោយបានគង់វង្ស៕
