ខេត្តរតនគីរី៖ អ្នកសារព័ត៌មានក្នុងស្រុកមកពីអង្គភាពចំនួន៦ និងអង្គភាពការពារបរិស្ថានមួយរូប រួមមានគ្នា ៧នាក់ នៅតែបន្តអំពាវនាវសុំឲ្យសមត្ថកិច្ចនៃអាជ្ញាធរខេត្តរតនគិរី ស៊ើបអង្កេតឲ្យបានហ្មត់ចត់ ពាក់ព័ន្ធមនុស្សមួយក្រុម ដែលបានប្រើអំពើហិង្សាវាយប្រហារលើរថយន្តរបស់ពួកគាត់ ក្នុងពេលចុះយកព័ត៌មានពាក់ព័ន្ធបទល្មើសព្រៃឈើក្នុងស្រុកវើនសៃ ខេត្តរតនគីរី និងប្តេជ្ញា ប្រឈមតស៊ូ តាមផ្លូវច្បាប់ ខណៈ
សមត្ថកិច្ចប៉ូលីសស្រុកវើនសៃ បញ្ចប់ការស៊ើបអង្កេតបឋមទៅលើពាក្យបណ្ដឹងរបស់ក្រុមអ្នកកាសែត និងសកម្មជនបរិស្ថាន ដែលសង្ស័យមានអ្នកជំនួញឈើម្នាក់ ថាជាប់ពាក់ព័ន្ធគម្រោងធ្វើឃាតពួកគេ ពេលព្យាយាមស៊ើបអង្កេតបទល្មើសព្រៃឈើ នៅទីរួមស្រុកវើនសៃ។
លទ្ធផលនៃការស៊ើបអង្កេតបឋម សមត្ថកិច្ចមិនទាន់វាយតម្លៃបានជាក់លាក់នៅឡើយ គ្រាដែលសមត្ថកិច្ចបន្តសុំគោលការណ៍ទៅមន្ត្រីអយ្យការ ដើម្បីស៊ើបអង្កេតបន្ថែម នេះបើតាមការផ្សាយរបស់វិទ្យុក្នុងស្រុកមួយ។
សូមរំលឹកថា រថយន្តអ្នកកាសែតពីរគ្រឿងក្នុងចំណោមរថយន្តបីគ្រឿង ត្រូវបានមនុស្សពីរក្រុម មួយក្រុមព្យាយាមបើកគោយន្តបុករថយន្តអ្នកកាសែត បន្ទាប់មកមនុស្សមួយក្រុមទៀត បានយកឈើបង្កប់ដែកគោលដាក់លើផ្លូវ ដើម្បីបញ្ឈប់រថយន្ត ហើយមនុស្សប្រមាណ ១០នាក់ប្រដាប់ដោយដំបងឈើ ដំបងដែក និងញញួរ ព្រួតគ្នាវាយបំបែកកញ្ចក់រថយន្តអ្នកកាសែត កាលពីថ្ងៃទី១ ខែកុម្ភៈ ខណៈក្រុមអ្នកកាសែតព្យាយាមរត់គេចពីការវាយប្រហារនេះ។
លោក សុខ សុវណ្ណ ប្រធានក្រុមប្រឹក្សាសារព័ត៌មានកម្ពុជា ចាត់ទុកសកម្មភាពទាំងពីរលើកនេះ ថាជាគម្រោងប៉ងធ្វើឃាតក្រុមអ្នកកាសែតពីសំណាក់ឈ្មួញរកស៊ីឈើខុសច្បាប់មួយរូបនៅតំបន់នោះ។ លោកកត់សម្គាល់ថា អំពើហិង្សានេះ កើតមានឡើង បន្ទាប់ពីក្រុមអ្នកកាសែតរកឃើញឈើត្រូវបានគេដឹកជញ្ជូនតាមទូកនៅតំបន់នោះ ចំណែកក្រុមអ្នកដឹកជញ្ជូនឈើបញ្ជាក់ថា ជាឈើរបស់បុរសឈ្មោះ ម៉េង មុខរបរប្រមូលទិញឈើខុសច្បាប់ ដែលប្រជាពលរដ្ឋលួចកាប់ពីក្នុងព្រៃ។
លោក សុខ សុវណ្ណ បាននិយាយថា លោកនឹងប្រឈមតស៊ូតាមផ្លូវច្បាប់ដោយមិនបញ្ចប់នោះឡើយ ប្រសិនបើគេចង់បង្វែររឿងនេះឲ្យវិវត្តទៅជារឿងផ្សេង ដើម្បីឲ្យជនសង្ស័យរួចខ្លួន។
អ្នកកាសែតទាំងប្រាំពីរនាក់ គឺជានាយក នាយករង និងជាអ្នកយកព័ត៌មានរបស់អង្គភាពក្រុមប្រឹក្សាអ្នកសារព័ត៌មានកម្ពុជា កាសែតភ្នំពេញប្រ៉ែស កាសែតថ្ងៃនេះ សមាគមអ្នកសារព័ត៌មានប្រជាធិបតេយ្យ អង្គការអភិរក្សឃ្លាំមើលធនធានធម្មជាតិ កាសែតជួយខ្មែរ និងមជ្ឈមណ្ឌលព័ត៌មានថ្ងៃនេះ។
កាលពីថ្ងៃទី៣ ខែកុម្ភៈ លោក សុខ សុវណ្ណ បានធ្វើរបាយការណ៍ដាក់ជូនរដ្ឋមន្ត្រីក្រសួងព័ត៌មាន ស្ដីពីអំពើហិង្សាលើក្រុមអ្នកសារព័ត៌មាន ដើម្បីសុំឲ្យសាមីក្រសួងជួយអន្តរាគមន៍ ទាក់ទិនការប្រើអំពើហិង្សារំលោភសិទ្ធិអ្នកសារព័ត៌មាននេះ។
បន្ទាប់មក រដ្ឋមន្ត្រីក្រសួងព័តមាន បានសំរេចបង្កើតគណកម្មាធិការចំពោះកិច្ចមួយ ដើម្បីសិក្សា ស្រាវជ្រាវនិងស្វែងរកការពិតករណីកើតមានឡើងខាងលើ ដើម្បីដាក់ជូនឯកឧត្តមរដ្ឋមន្ត្រីពិនិត្យនិងសម្រេច។
របាយការណ៍បឋមរបស់ប៉ូលិសស្រុកវើនសៃ ឲ្យដឹងថា បាតុភាពដែលកើតមានចំពោះអ្នកកាសែត ទីមួយគឺជាគ្រោះថ្នាក់ចរាចរណ៍ដែលបង្កឡើងដោយរថយន្តដាច់ហ្វ្រាំង និងទីពីរ គឺបង្កឡើងដោយយុវជនទំនើងមកពីក្រុងបានលុង នេះបើតាមការផ្សាយរបស់វិទ្យុក្នុងស្រុក។
សាធារណជនមានទស្សនៈថា កន្លងមក ពួកឈ្មួញរកស៊ីឈើខុសច្បាប់ ដែលមានអ្នកមានអំណាចនៅពីក្រោយ មិនចេះចុះញ៉មច្បាប់រដ្ឋឡើយ ក្នុងការកាប់បំផ្លាញព្រៃឈើយ៉ាងរង្គាល ហើយគេរង់ចាំមើល តើអ្នកកាសែតទទួលបានយុត្តិធម៏ដែឬទេ? ក្នុងការប៉ុនប៉ងធ្វើឃាតពីសំណាក់ឈ្មួញរកស៊ីឈើខុសច្បាប់ ដែលមានអ្នកមានអំណាចនៅពីក្រោយ៕
