ខេត្តក្រចេះ៖ សមត្ថកិច្ចនៅខេត្តក្រចេះ ហាក់ដូចជានៅមិនទាន់មានចំណាត់ការបង្រ្កាប ក្រុមហ្វូងរថយន្តសាំយ៉ុងដឹកឈើនៅឡើយទេ បើទោះបីហ្វូងរថយន្តដឹកឈើ ទាំងនេះ ជារៀងរាល់យប់ នៅតែបន្តដឹកជញ្ជូនក្នុងមួយយប់ៗ មិនក្រោមពី១០០រថយន្ត ថែមទាំងបង្កគ្រោះថ្នាក់តាមដងផ្លូវជាញឹកញាប់យ៉ាងណាក្តី។
សន្ឋឹកនៃការដឹកជញ្ជូនឈើតាមរថយន្តសាំយ៉ុង ពីក្រុមឈ្មួញដែលគេស្គាល់ថា សុទ្ឋសឹងរស់នៅខេត្តត្បូងឃ្មុំ បានមកប្រកបរបររកស៊ីដឹកឈើខុសច្បាប់ ចេញពីស្រុកសំបូរ ខេត្តក្រចេះ នាំឆ្ពោះទៅលក់នៅតាមដេប៉ូខុសច្បាប់នានានៅខេត្តព្រៃវែង និងខេត្តកំពង់ចាមនោះ គឺនៅតែមានការដឹកជញ្ជូនជាហ្វូងៗ បើកប្រដេញគ្នាប្រសាច ពេញផ្លូវដូចហ្វូងស្រមោច មិនក្រោមពី១០០ឡានទេក្នុង១យប់ៗ មិនត្រឹមតែប៉ុណ្ណោះ ថែមទាំងបង្កគ្រោះថ្នាក់ជាញឹកញាប់ដល់អ្នកធ្វើដំណើរ និងពលរដ្ឋរស់នៅក្បែរចិញ្ចើមផ្លូវ ជាញឹកញាប់ទៀតផង។
ក្រៅតែពីការធ្លាប់បង្កគ្រោះថ្នាក់ បុកចូលផ្ទះប្រជាពលរដ្ឋ បង្កឲ្យមានគ្រោះថ្នាក់ម្ចាស់ផ្ទះទាំងមិនដឹងខ្លួន បើកក្រឡាប់ដោយខ្លួនឯងបង្កឲ្យអ្នកដ៍ទៃរងគ្រោះថ្នាក់ និងការបើកបុកកៀរលើ រថយន្តសមត្ថកិច្ច នៅក្បែរចិញ្ចើមផ្លូវបង្កឲ្យខូចខាត ដោយមិនមានអ្នកទទួលខុសត្រូវនោះ នៅយប់ថ្ងៃទី១ ខែកុម្ភះ មានរថយន្តសាំយ៉ុង១គ្រឿង ដែលមានដឹកឈើក្នុងចំណោមក្រុម ហ្វូងរថយន្តជិត១០០គ្រឿង បានបើកប្រដេញនិងជែងគ្នាឡើងស្ពានពាមទេ ក្នុងសង្កាត់រការកណ្តាល ក្រុងក្រចេះ បណ្តាលឲ្យបុកបង្កាន់ដៃស្ពាន ជាប់និងចំរឹងដែកទៅមុខលែងរួច។
ការបើកបុកបង្កាន់ដៃស្ពាន របស់រថយន្តដឹកឈើមួយគ្រឿងនេះ ក៏ត្រូវបានគេលើកឡើងថា ដោយសារតែពពួករថយន្តទាំងនេះ បានបើកប្រដេញជែងគ្នាឡើងស្ពានដែកបាឡេតូចមួយ ខណះដែលព្យាយាមបើកគេចពីការប្រដេញកាក់ទារលុយ ពីក្រុមសមត្ថកិច្ចក្នុងក្រុងក្រចេះ។
ជាមួយនិងសកម្មភាពការបើកដឹកជញ្ជូនឈើពីហ្វូងរថយន្តទាំងនេះ ដែលទន្លាប់ការ បើកបរក្នុងល្បឿនលឿនបើកវ៉ាជែងគ្នាមិនថា តែនៅលើស្ពានលើផ្លូវជាតិក៏ដូចជាក្នុងទីប្រជុំ ជនដែលងាយនិងបង្កគ្រោះថ្នាក់ដោយប្រការណាមួយនោះ។ ក្នុងការដឹកជញ្ជូនរបស់ពួកគេ គឺបានដឹកជាហ្វូងៗជាច្រើនខ្សែរ ហើយការបើកបរគឺមានតែរថយន្តខាងមុខមួយគ្រឿង ត្រូវបើកភ្លើងបំភ្លឺក្រៅពីនោះរថយន្តជាច្រើនគ្រឿង ដែលរត់តាមពីក្រោយត្រូវបិទភ្លើង បំភ្លឺទាំងអស់ដើម្បីកុំអោយសមត្ថកិច្ចមើលឃើញ។
សកម្មភាពបើកជាលក្ខណះប្រថុយប្រថានបែបនេះ បានធ្វើឲ្យពលរដ្ឋមានការព្រួយបារម្ភ ពីសុវត្ថភាពចរាចរណ៍របស់ពួកគាត់ ។ កន្លងមកពលរដ្ឋ ជាអ្នកធ្វើដំណើរតាមផ្លូវ ក៏ដូចជាពលរដ្ឋ ដែលមានរបរលក់ដូរនៅពេលយប់ ពិសេសពលរដ្ឋដែលមានលំនៅជាប់ផ្លូវជាតិ កំពុងតែមានការព្រួយបារម្ភពីគ្រោះថ្នាក់ បង្កឡើងដោយប្រការណាមួយ ពីពពួករថយន្តទាំងនេះ និងក៏អំពាវនាវឲ្យសមត្ថកិច្ច មានវិធានការទប់ស្កាត់នូវពពួករថយន្តទាំងនេះ។ តែបើទោះជាមានការលើកឡើងបែបណាក្តី ក៏សមត្ថកិច្ចក្នុងខេត្តត្រូវគេមើលឃើញថា បានបញ្ចេញវិធានការបង្រ្កាបតែមួយអន្លឺតែប៉ុណ្ណោះ រហូតមកទល់ពេលនេះ សកម្មភាពនៃការដឹកជញ្ជូនរបស់ក្រុមឈ្មួញ បានធ្វើឡើងលើសដើម។
ជុំវិញការលើកឡើងនេះ លោក ប៊ួយ រតនា នាយផ្នែករដ្ឋបាលព្រៃឈើក្រចេះ បានឲ្យដឹងនៅថ្ងៃទី២ កុម្ភះ នេះថា វិធានការបង្រ្កាបលើក្រុមរថយន្តទាំងនេះ គឺទាល់តែមានការ ជួយសហការ ពីកងកម្លាំងប្រដាប់អាវុធ ជាមួយនិងរដ្ឋបាលព្រៃឈើ ពិសេសគឺនគរបាល ចរាចរណ៍តែម្តងទើបអាចធ្វើទៅបាន។ លោកនាយផ្នែកបានលើកឡើងទៀតថា កន្លងមក សមត្ថកិច្ចធ្លាប់បានសហការ ចាប់បង្រ្កាបជាបន្តបន្ទាប់នៅពេលថ្ងៃ។ ហើយវិធានការសម្រាប់ បង្រ្កាបបន្តនោះក៏កំពុងតែរៀបចំធ្វើ៕
