ខេត្តស្ទឹងត្រែង៖ លោក ចាន់ ពិសិដ្ឋ និងភរិយាឈ្មោះ អែល ទីរៀម ដែលជាអាជីវករនៅផ្សារស្ទឹងត្រែង បានសំណូមពរយ៉ាងទទូចដល់ឯកឧត្តម ម៉ុំ សារឿន អភិបាលខេត្តស្ទឹងត្រែង មេត្តាជួយដោះស្រាយតូបរបស់លោកទៅតាមទំហ៊ុំចាស់ដែលមាន៣១.៣៥មែត្រការ៉េ ហើយបច្ចុប្បន្ន គណកម្មាធិការដោះស្រាយតូបផ្សារស្ទឹងត្រែង គ្រោងនឹងឲ្យលោកតែទំហ៊ុំ១៦មែត្រការ៉េតែប៉ុណ្ណោះ ដែលជាភាពអយុត្តិធម៏យ៉ាងក្រៃលែង ខណៈដែលលោកត្រូវខាតបង់ទ្រព្យសម្បត្តិនូវពេលឆេះផ្សារ កន្លងមកផង អីលូវមកបាត់បង់ទំហ៊ុំតូបថែមទៀត ដែលជាទុក្ខជាន់លើទុក្ខ ពុំមានអារម្មណ៏និងនរក្នុងការរកទទួលទានចិញ្ចឹមគ្រួសារនោះឡើយ។
លោក ចាន់ ពិសិដ្ឋ និងភរិយាឈ្មោះ អែល ទីរៀម បានឲ្យដឹងថា កាលពីនៅផ្សារស្ទឹងត្រែងចាស់មិនទាន់ឆេះ លោកមានតូបចំនួន៤(លេខ១៨១ - ១៨២ - ១៨៧ - ១៨៨)មានបណ្តោយប្រវែង៦ .៦០ម ទទឹង៤. ៧៥មដែលមានទំហ៊ុំសរុបចំនួន៣១. ៣៥ម៉ែត្រការ៉េ ប៉ុន្តែ គណកម្មាធិការដោះស្រាយតូប បែរជាប្រគល់ឲ្យលោកចំនួន៤តូប ដែលមានទំហ៊ុំតែ១៦ម៉ែត្រការ៉េប៉ុណ្ណោះ ដែលលោកពុំអាចទទួលយកបានឡើយ ព្រោះវាមានភាពអយុត្តិធម៏ខ្លាំងណាស់ ហើយពេលនេះលោក ចាន់ ពិសិដ្ឋ និងភរិយាឈ្មោះ អែល ទីរៀម បានសំណូមពរចំពោះឯកឧត្តមអភិបាលខេត្ត និង ឯកឧត្តម ញ៉ែម សារី អភិបាលរងខេត្តស្ទឹងត្រែង និងជាប្រធានគណកម្មាធិការដោះស្រាយតូបផ្សារស្ទឹងត្រែង ជួយត្រួតពិនិត្យមើលទំហ៊ុំតូបឲ្យបានសមស្រប ដោយសុំត្រឹមតែ២៤ម៉ែត្រការ៉េ និងសូមជួយដោះស្រាយក្នុងពេលឆាប់នេះ ដើម្បីបានធ្វើតូបនិងមានកន្លែងលក់ដូរនិងគេ។
ទន្ទឹមនិងនោះ លោក ចាន់ ពិសិដ្ឋ និងភរិយាឈ្មោះ អែល ទីរៀម ដែលជាអាជីវករ សូមថ្លែងនូវការដឹងគុណដ៏ជ្រាលជ្រៅចំពោះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកត្តិព្រិទ្ធបណ្ឌិត ប៊ុន រ៉ានី ហ៊ុនសែន ដែលបានជួយសាងសង់ផ្សារថ្មី មានឈ្មោះថាផ្សារសាមគ្គីស្ទឹងត្រែង ឲ្យអាជីវករមានកន្លែងលក់ដូរសមរម្យ ហើយសូមជូនពរសម្តេចមានសុខភាពល្អ បន្តដឹកនាំប្រទេសឲ្យមានសុខសន្តិភាពនិងរីកចំរើន។
គួររំលឹកថា នាពេលកន្លងមក ផ្សារស្ទឹងត្រែងចាស់ត្រូវបានភ្លើងឆេះខ្ទេច ដោយយល់ពីទុក្ខលំបាករបស់អាជីវករ ទើបសម្តេចតេជោ ហ៊ុន សែន បានជួយសាងសង់ផ្សារស្ទឹងត្រែងថ្មីឡើងវិញត្រូវតាមស្តង់ដា ជូនអាជីវករ ដោយអ្នកមានតូបទំហ៊ុំប៉ុនណាទទួលបានប៉ុនណោះវិញ។
តាមប្រភពព័តមានបានឲ្យដឹងថា មានអាជីវករមួយចំនួនបាននិងកំពុងត្អូញត្អែ និងមិនពេញចិត្តចំពោះដំណោះស្រាយទំហ៊ុំតូប ចំពោះអ្នកមានតូបធំបែរជាបានតូបតូច ចំណែកអ្នកមានតូបតូចបែជាបានតូបធំទៅវិញ ហាក់បីដូចជាមានភាពមិនប្រក្រតីនៅក្នុងការបែងចែកតូប ហើយពួកគាត់សំណូមពរឯកឧត្តមអភិបាលខេត្ត មេត្តាជួយពិនិត្យនិងដោះស្រាយដោយភាពយុត្តិធម៏ចំពោះបញ្ហានេះផង។
ពាក់ពន្ធ័ពត័មានខាងលើ អ្នកយកពត័មានបានទូរសព្ទ័ទៅលោក សែន វុទ្ធី រដ្ឋបាលសាលាខេត្តដើម្បីសុំការបំភ្លឺ ប៉ុន្តែលោកបានបង្វែរឲ្យសួរទៅឯកឧត្តម ញ៉ែម សារី អភិបាលរងខេត្ត និងជាប្រធានគណកម្មាធិការដោះស្រាយតូបវិញ តែខលចូលគ្មានអ្នកលើក៕
