ភ្នំពេញ ៖ ថ្លែងនៅក្នុងកិច្ចប្រជុំសភា នៅព្រឹកថ្ងៃទី៣១ ខែមករា សម្តេច ហ៊ុន សែន ប្រធានគណបក្សប្រជាជនកម្ពុជា បានបញ្ជាក់ថា រឿងដោះលែង ឬមិនដោះលែងទណ្ឌិតដែលជាមន្ត្រីសិទ្ធិមនុស្ស និង គ.ជ.ប រួមទាំងសកម្មជនគាំទ្រ បក្សប្រឆាំង គឺជាបញ្ហារបស់បក្សប្រឆាំង មិនមែនមកពីគណបក្សប្រជាជន ឬសម្តេចនោះទេ ។
សម្តេចនាយករដ្ឋមន្ត្រីបានបន្ថែមថា សម្តេចបាននិយាយជាមួយលោក កឹម សុខា រួចហើយថា រឿងអ្នកទាំងអស់នោះ គឺត្រូវរង់ចាំសាលក្រមចូលជាស្ថាពរសិន ចាំយើងពិនិត្យមើលថា តើអ្នកណាខ្លះដែលត្រូវស្នើសុំលើកលែងទោស ។ ប៉ុន្តែខាងបក្សប្រឆាំងបានលើកយកបញ្ហានេះមកស្នើក្នុងបៀបវារៈ ក្នុងការជួបពិភាក្សាជាមួយ CPP ( វប្បធម៌សន្ទនា ) ដើម្បីរារាំងឬជាចេតនាទម្លាក់កំហុសមកលើបក្សប្រជាជន ។ ប៉ុន្តែសូមអ្នកទាំងនោះត្រូវដឹងថា តើគណបក្សប្រឆាំងកំពុងធ្វើអ្វី? ។
ដោយឡែករឿងអ្នកទោស ដែលជាប់ពាក់ព័ន្ធនិងចលនាកុបកម្ម រួមទាំងលោក ហុង សុខហួរ និងលោក អ៊ុំ សំអាន មិនអាចលើកលែងបានទេ ព្រោះវាជារឿងធំហើយធ្ងន់ធ្ងរណាស់ ។ សម្តេចបានបន្តថា បញ្ហានោះបើកុំតែចាប់ខ្លួនអ្នកទាំងពីរនោះទាន់ កុំអីរឿងរ៉ាវមិនដឹងជារីកធំដល់ណាទៀតទេ ដូច្នេះមិនអាចលើកលែងឲ្យអ្នកទាំងពីរនោះបានឡើយ។
សម្តេច ហ៊ុន សែន ក៏បានប្រាប់ឲ្យលោក សម រង្ស៊ី ប្រធានគណបក្សប្រឆាំង ដែលកំពុងរត់គេចខ្លួននៅក្រៅប្រទេស ឲ្យត្រៀមលក់ទ្រព្យសម្បត្តិដែលមាននៅកម្ពុជា ដើម្បីយកមកសងជំងឺចិត្ត ដែលសម្តេចបានប្តឹងទាមទារសំណង១លានដុល្លារពីបទបរិហាកេរ្តិ៍ បន្ទាប់ពីលោក សម រង្ស៊ី បាននិយាយជាសារធាណៈថា លោកមិនខ្លាចគេប្តឹងទេ ហើយលោកចង់ឲ្យគេប្តឹងច្រើនជាងនេះទៀត ហើយប្តឹងច្រើនពេលណាវាល្អពេលនោះ ។
សម្តេច ហ៊ុន សែន ថ្លែងបញ្ជាក់ថា ករណីបណ្តឹងរបស់សម្តេចប្តឹងលោក សម រង្ស៊ី នោះគឺមិនធ្វើលេង ៗ ទេ តែធ្វើមែនទែន ប្តឹងយក១លានដុល្លារឲ្យបាន ហើយលោក សម រង្ស៊ី ត្រៀមលក់ទ្រព្យសម្បត្តិឲ្យហើយទៅ ព្រោះបណ្តឹងរបស់សម្តេចមិនដកថយនោះទេ សម្តេចឮថា ទីស្នាក់ការគណបក្សសង្គ្រោះជាតិសព្ថ្ងៃនេះដាក់ឈ្មោះលោក សម រង្ស៊ី រួមទាំងដីធ្លីជាច្រើនកន្លែងទៀតក៏មានឈ្មោះ សម រង្ស៊ី ដែរ ដូច្នេះមិនលំបាកទេ ឲ្យតែសាលក្រមចូលស្ថាពរ គឺអាចរិបអូសបានហើយ ។
សម្តេច ហ៊ុន សែន បញ្ជាក់បន្ថែមថា លុយដែលសម្តេចឈ្នះក្តីលើលោក សម រង្ស៊ី ប្រមាណ១លានដុល្លារនោះ សម្តេចនិងយកទៅសាងសង់ផ្ទះជូនអតីតយុទ្ធជនទាំងអស់ ។
សភាបានអនុម័តទាំងស្រុង ដោយសម្លេង៦៧លើ៦៧សម្លេង នូវបទបញ្ជាផ្ទៃក្នុងរដ្ឋសភា ប្រការ៤៨ថ្មី (បី) ដោយសម្លេង ៦៧លើ៦៧ ដោយក្លាយទៅជា ប្រការ៤៨ថ្មី (បួន) ។ ចំណែកខ្លឹមសារនៃជំពូក១២ ប្រកា៤៨ថ្មី(បួន) នៃបទបញ្ជាផ្ទៃក្នុងរដ្ឋសភា បានចែងថា សមាជិកសភា១០រូប មានសិទ្ធិបង្កើតជាក្រុមតំណាងរាស្ត្រមួយនៅក្នុងសភា ដោយមានប្រធានម្នាក់ និងអនុប្រធានម្នាក់ ។ គណបក្សទាំងឡាយណាដែលមានសមាជិកតិចជាង១០នាក់ នៅក្នុងសភា មានសិទ្ធិជ្រើសរើសយក ក្រុមណាមួយដើម្បីចូលរួម ។យ៉ាងណាក៏ដោយ តំណាងរាស្ត្រទាំងអស់នៃគណបក្សប្រឆាំង មិនបានចូលរួមក្នុងកិច្ចប្រជុំសភា ដើម្បីធ្វើវិសោធនកម្មបទបញ្ជាផ្ទៃក្នុងរដ្ឋសភាខាងលើនេះទេ ។
ជាថ្មីម្តងទៀត សម្ដេច ហ៊ុន សែន នាយករដ្ឋមន្ត្រីកម្ពុជាបានថ្លែងថា វប្បធម៌សន្ទនា នៅតែបន្ត ទោះបីជាគ្មាន ប្រធានក្រុមតំណាងរាស្ត្រ សំឡេងភាគច្រើន-ភាគតិចក្នុងរដ្ឋសភាក៏ដោយ៕
