ភ្នំពេញ ៖រាជរដ្ឋាភិបាលបានប្រើកណ្តាប់ដៃដែក មិនមែននិយាយតែមាត់ទេ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃ បានធ្វើដំណើរតាមឧទ្ធម្ភាគចក្រជាលើកដំបូង ត្រួតពិនិត្យបទល្មើសនេសាទនៅលើបឹងទន្លេសាប អមដំណើរដោយលោកនាយឧត្តមសេនីយ៍នេត សាវឿន លោករដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងមន្ត្រីមួយចំនួនទៀតកាលពីថ្ងៃទី២៥ មករា ។
សូមរម្លឹកថា សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅក្នុងពិធីបិទសន្និបាត បូកសរុបលទ្ធផលការងារ ប្រចាំឆ្នាំ២០១៦ និងលើកទិសដៅ ឆ្នាំ២០១៧ របស់សាលាខេត្តសៀមរាប កាលពីថ្ងៃទី២៨ ខែធ្នូ ឆ្នាំ២០១៦ កន្លងមក បានព្រមានដកអភិបាលខេត្តនៅជុំវិញបឹងទន្លេសាប បើខេត្តណា នៅតែមានបទល្មើសនេសាទ កើតមានច្រើន ។ សម្តេចបានសង្កត់ធ្ងន់ថា នឹងបន្តសកម្មភាព បង្ក្រាបបទល្មើសនេសាទ ជាលក្ខណៈទ្រង់ទ្រាយធំ ជាបន្តបន្ទាប់ ដើម្បីដោះស្រាយឲ្យបាន នូវបញ្ហាបទល្មើលនេសាទ នៅក្នុងបឹងទន្លេសាបនេះ ។
សម្តេចក្រឡាហោម ស ខេង ក៏បានបញ្ជាក់អោយដឹងថា ដើម្បីបង្ក្រាបបទល្មើសនេសាទ នៅក្នុងបឹងទន្លេសាប ដោយប្រើប្រាស់ ទូកល្បឿនលឿន ប្រភេទរ៉ូយ៉ាល់ ហើយសកម្មភាពនេះ ធ្វើជាប្រចាំ ដោយសម្តេច និងជិះយន្តហោះពិនិត្យមើល ពីខាងលើក្នុង ២សប្តាហ៍ម្តង ឬ១ខែម្តង ។
ការត្រួតពិនិត្យដោយជិះឧទ្ធម្ភាគចក្ររកឃើញថា នៅខេត្តកំពង់ធំ និងកំពង់ឆ្នាំងបទល្មើសនេសាទកើតមានច្រើន ខណៈនៅបាត់ដំបង សៀមរាប ពោធិ៍សាត់មិនសូវកើតមានទេ
ដូច្នេះសម្តេចក្រឡាហោមស ខេង បានសម្រេចកោះអញ្ជើញ អភិបាលខេត្តទាំងពីរមកភ្នំពេញ ដើម្បីជួបប្រជុំរកដំណោះស្រាយ នៅថ្ងៃទី២៨ មករា ចំពោះខេត្តសៀមរាប បាត់ដំបង ពោធិ៍សាត់ វិញអញ្ជើញត្រឹមអភិបាលរងខេត្តមកចូលរួម ។
មុនដំណើរត្រួតពិនិត្យបទល្មើសនេសាទតាមឧទ្ធម្ភាគចក្រ ពីសម្តេចក្រឡាហោម ស ខេង គឺកម្លាំងបង្ក្រាបបទល្មើសនេសាទបានចុះទៅត្រួតពិនិត្យសកម្មភាពល្មើសនានា តាំងពីថ្ងៃទី១៧ មករា ដោយរកឃើញអួនដាក់ត្រីជិត១០វង់នៅក្នុងខេត្តក្រចេះ ។
នៅថ្ងៃទី២៤ មករាកន្លងទៅ សមត្ថកិច្ចចម្រុះរបស់ក្រសួងបានបង្ក្រាបបទល្មើសនេសាទក្នុងភូមិសាស្ត្រខេត្តពោធិ៍សាត់ ដែលប្រើប្រាស់ឧបករណ៍អួនក្រឡាញឹក ប្រើប្រាស់ម៉ាស៊ីនអូសទាញ និងឧបករណ៍យ៉ាំងកាវជាច្រើនវង់ និងចាប់ឃាត់ខ្លួនមនុស្ស៤១នាក់ ៕
