ខេត្តកំពង់ធំ៖ សាខាកាំកុងត្រូលខេត្តកំពង់ធំ សហការជាមួយមន្ទីរពាណិជ្ជកម្មខេត្តចុះត្រួតពិនិត្យឆែករកឃើញផលិតផល ខូចគុណភាពមួយចំនួន មានទឹកក្រូចផលិតនៅវៀតណាម និងម្ស៉ៅប៊័រ ផលិតផល នៅប្រទេសថៃ ដែលសមត្ថកិច្ចជំនាញ បានរកឃើញនៅផ្សារកំពង់ធំ ក្រុងស្ទឹងសែន ខេត្តកំពង់ធំ នៅព្រឹកថ្ងៃទី២៤ខែមករាឆ្នាំ២០១៧នេះ។
សមត្ថកិច្ចបានឲ្យដឹងថា៖ នៅក្នុងប្រតិបត្តិការចុះត្រួតពិនិត្យផ្សារកំពង់ធំនេះ លទ្ធផលបានឆែករកឃើញ ទំនិញខូចគុណភាពមានដូចជា ប៊័រផលិតនៅប្រទេសថៃទាំងតូចធំចំនួន២៨ដុំ ទឹកក្រូចដបតូចធំចំនួន៣ដប និងផលិតផលមួយចំនួនទៀត សមត្ថកិច្ចបានធ្វើការអប់រំ ណែនាំឲ្យក្រុមអាជីវករ ឲ្យដូរយកផលិតផលថ្មីវិញ។
លោក លៀង សុភា ប្រធានសាខាកាំកុងត្រូលខេត្តកំពង់ធំ បានបញ្ជាក់ថានៅក្នុងប្រតិបត្តិការចុះឆែកត្រួតពិនិត្យទំនិញខូចគុណភាពនៅផ្សារកំពង់ធំនេះ សមត្ថកិច្ចបានចុះធ្វើតេស្សនៅលើគ្រឿងសមុទ្រដូចជាម៉ឹក បង្កង ដើម្បីស្វែងរកសារជាតិហ្វាលម៉ុល ដែលហាមឃាត់ តែរកមិនឃើញ បន្ទាប់មកសមត្ថកិច្ច ក៏បានណែនាំពន្យល់ដល់ក្រុមអាជីវករ ឲ្យយល់ពីការបរិច្ឆេទ លើផលិតផលដែលពួកគាត់ បានទិញមកលក់បន្តឲ្យគេ ព្រមទាំងចុះបិទ Poster ដើម្បីផ្សព្វផ្សាយបញ្រ្ជៀប ដល់អាជីវករនៅតាមផ្សារ ទាំងប្រជុំជននិងជនបទ ឲ្យមានអនាម័យល្អ លោកបានបន្តថា ត្រណាប់ដូងម៉ាកថាញ់បិញ ផលិតនៅប្រទេសវៀតណាម គឺហាមមិនឲ្យលក់ដូរ លើទីផ្សារទេ ព្រោះមានសារធាតុកៅស៊ូ បណ្តាលឲ្យប៉ះពាល់ដល់សុខភាពមនុស្សគ្រប់រូប គ្រប់វ័យ ។
ជាមួយគ្នានេះ ក្រុមអាជីវករនៅជុំវិញផ្សារ ក៏ដូចជាមហាជន បានសាទរ ចំពោះចំណាត់ការរបស់សមត្ថកិច្ចកាំកុងត្រូលកំពង់ធំ ដែលបានយកចិត្តទុកដាក់ទៅលើបញ្ហាសុខភាព របស់ពលរដ្ឋ ព្រោះអាជីវករមួយចំនួន ពួកគាត់មិនដឹងច្បាស់អំពីផលិតផលខូចគុណភាព រឺក្លែងក្លាយទេ ៕
