រាជធានីភ្នំពេញ ៖ លោក កឹម សុខា ប្រធានស្តីទីគណបក្សប្រឆាំង ដែលទើបទទួលការលើកលែងទោស បានចាប់ផ្តើមចុះមូលដ្ឋានជាថ្មី ដើម្បីគៀងគររកសម្លេងគាំទ្របន្ទាប់ពីមានការអាក់ខានប្រជុំ រវាងក្រុមភាគច្រើននិងភាគតិចនៅរដ្ឋសភា។ ប៉ុន្តែអ្វីដែលគួរឲ្យភ្ញាក់ផ្អើលនោះលោកបានប្រាប់អ្នកគាំទ្រតាមមូលដ្ឋានថា ឲ្យរៀបចំខ្លួនសម្រាប់ការផ្លាស់ប្តូរវិជ្ជមាននៅក្នុងការបោះឆ្នោតជាបន្តបន្ទាប់នាពេលខាងមុខ ។
ប្រធានស្តីទីនៃគណបក្សសង្គ្រោះជាតិលោក កឹម សុខា បានចាប់ផ្តើមជាលើកទីមួយចុះទៅខេត្ត ព្រះសីហនុ និងខេត្តកោះកុង ដើម្បីជួបជាមួយសកម្មជន និងសមាជិកអ្នកគាំទ្របក្សប្រឆាំង ហើយបានរម្លឹកឡើងវិញនូវពាក្យផ្លាស់ប្តូរៗ ដែលបានស្ងប់ស្ងាត់មួយរយះមកហើយ ក្រោយពីការបោះឆ្នោតឆ្នាំ២០១៣ ។ ទន្ទឹមនោះលោក កឹម សុខា បាននិយាយថា ប្រសិនបើគណបក្សកាន់អំណាចពួកគេមិនត្រូវការជួបចរចាជាមួយយើង យើងត្រូវទៅជជែកជាមួយប្រជាពលរដ្ឋនៅថ្នាក់មូលដ្ឋានវិញប្រសើរជាង ។
លោក កឹម សុខា បានប្រាប់សមាជិកនៅខេត្តព្រះសីហនុថា តាមការវាស់ស្ទង់មតិទូទៅប្រជាពលរដ្ឋខ្មែរភាគច្រើនបំផុតចង់ឲ្យមានការផ្លាស់ប្តូរវិជ្ជមាន ។ ដូច្នេះយើងជាគណបក្សសង្គ្រោះជាតិត្រូវត្រៀមទទួលយកបំណងប្រាថ្នារបស់ប្រជាពលរដ្ឋខ្មែរដោយសារប្រជាពលរដ្ឋខ្មែរភាគច្រើនបំផុតសង្ឃឹមលើ គណបក្សសង្គ្រោះជាតិ ។
តាមសំដីរបស់លោក កឹម សុខា គឺលោកចង់ផ្លែផ្កាដាក់គណបក្សកាន់អំណាចដែលផ្អាកការជួបសន្ទនាគ្នាតាមរយះវប្បធម៌ ហើយងាកទៅរកវិធីបញ្ចប់តំណែងរបស់លោកទៅវិញ ។ មើលទៅលោក កឹម សុខា មិនចាត់ទុកការចរចាជាមួយបក្សកាន់អំណាចសំខាន់នោះទេ ប៉ុន្តែអ្វីដែលសំខាន់គឺជួបប្រជាពលរដ្ឋរួមទាំងការប្រមូលសម្លេងគាំទ្រប្រជាពលរដ្ឋ ព្រោះពេលវេលានៃការបោះឆ្នោតកាន់តែខិតជិតមកដល់ ៕
