ខេត្តកំពង់ឆ្នាំង៖ ពលរដ្ឋនៅស្រុកទឹកផុសបានប្រាប់ថា៖ ការដឹកជញ្ជូនឈើ និងជន្លង់ម្រេចនៅតែកើតមានដដែល បើទោះបីមានការប្ដេជ្ញាបង្ក្រាប ការពារ និងបង្កើតក្រុមចម្រុះពីអភិបាលខេត្ត យ៉ាងណាក៏ដោយការដឹកជញ្ជូនឈើនៅចំនុចពេជោ ឃុំគ្រាំងស្គា ស្រុកទឹកផុស ទៅ ស្រុកសាមគ្គីមានជ័យក្នុង ខេត្តកំពង់ឆ្នាំង នៅតែមានការដឹកឈើបន្តយ៉ាងគគ្រឹកគ្រេង ។
ជាក់ស្ដែងនៅយប់ថ្ងៃទី២៣ ខែមករា នេះ គេកត់សម្គាល់ឃើញថា មានការដឹកជញ្ជូនឈើ តាមគោយន្ដកន្ត្រៃយ៉ាងស្រស្រាក់ស្រស្រាំ ក្រុមចម្រុះដែលបង្កើតឡើងដោយ អភិបាលខេត្តកំពង់ឆ្នាំង មិនមានប្រសិទ្ធិភាពទេ។
គេសង្កេតឃើញការឈរជើងរបស់ក្រុមចម្រុះ មានការស៊ីសស៊ុះសូកប៉ាន់ទើបក្រុមឈ្មួញដឹកឈើ ដឹកជន្លង់ម្រេចឆ្លងកាត់បានយ៉ាងរលូន ។
កន្លងមកមានការប្ដឹងទៅអង្គភាពប្រឆាំងអំពើពុករលួយថា ក្រុមចម្រុះចាស់នៅឈរជើងមុន មានការឃុបឃិតប្រព្រឹត្តអំពើពុករលួយ ជាមួយក្រុមឈ្មួញរកស៊ីដឹកឈើទាំងនោះ ក្រោយមកគេបានឃើញអភិបាលខេត្ត បានបង្កើតក្រុមចម្រុះថ្មីមួយទៀតដើម្បីទប់ស្កាត់ ប៉ុន្តែគ្មានប្រសិទ្ធភាពការងារទេ គឺការដឹកឈើឆ្លងកាត់ នៅចំនុចខាងលើ នៃបទល្មើសដឹកឈើទាំងនោះនៅដដែល ។
ប្រជាពលរដ្ឋរងចាំមើល អភិបាលខេត្តមានចំណាត់ការបែបណា ការដឹកជញ្ជូនឈើទាំងនោះ ប្រហែលជាត្រូវរ៉ូវគ្នាហើយ បានជាគ្មានការបង្ក្រប មានតែការបង្កើនបទល្មើសថែមទៀត ដឹកយ៉ាងគគ្រឹកគគ្រេង ឆ្លងកាត់ពីចំនុចពេជោឃុំគ្រាំងស្គា ទៅស្រុកសាមគ្គីមានជ័យ ។
សំណូមពររបស់ប្រជាពលរដ្ឋដល់អភិបាលខេត្ត មើលក្រុមសមត្ថកិច្ចចម្រុះដែលបង្កើតឡើង គឺទៅឈរចាំយកតែលុយទេ បិទអ្នកតូចតាច តែបើកផ្លូវឲ្យក្រុមឈ្មួញធំៗធ្វើការដឹកជញ្ជូនដដែល៕
