ខេត្តកំពង់ស្ពឺ៖ បទល្មើសកាប់ឈើនិងដឹកជញ្ជូនឈើ ចេញពីតំបន់ដែនជម្រកសត្វព្រៃភ្នំឱរ៉ាល់ និងតំបន់អភិរក្សការពារជួរភ្នំក្រវ៉ាញ នៅតែបន្តកើតឡើងឥតឈប់ឈរ ដោយសារមន្ត្រីបរិស្ថាន ស្រុកឱរ៉ាល់ និងមន្ត្រីរដ្ឋបាលព្រៃឈើផ្លោច ខេត្តកំពង់ស្ពឺ គឺជាអ្នកចាំបើកភ្លើងខៀវ អោយក្រុមឈ្មួញ ចូលកាប់បំផ្លាញព្រៃឈើជារៀងរាល់ថ្ងៃ។
បញ្ហានេះលោក សាយ សំអាល់ រដ្ឋមន្ត្រីក្រសួងបរិស្ថាន និងលោក វេង សាខុន រដ្ឋមន្ត្រីក្រសួងកសិកម្ម គួរណាស់ពិនិត្យមើល ភាពអសកម្មរបស់មន្ត្រីក្រោមឱវាទរបស់ខ្លួនខ្លះផង ក្នុងខណៈដែលបទល្មើសបំផ្លាញព្រៃឈើនៅក្នុងខេត្តកំពង់ស្ពឺ កំពុងកើតឡើងយ៉ាងរាលដាល បើមិនដូច្នេះទេ ព្រៃឈើក្នុងតំបន់ដែនជម្រកសត្វព្រៃភ្នំឱរ៉ាល់ និងព្រៃឈើក្នុងតំបន់ការពារអភិរក្សជួរភ្នំក្រវ៉ាញ ចៀសមិនផុតពីសេចក្ដីវិនាសឡើយ។
ជាក់ស្តែងនៅយប់ថ្ងៃ២០ ខែមករា ឆ្នាំ២០១៧ មានគោយន្តកន្តៃ្រដឹកឈើមូលជាច្រើនគ្រឿង នៅមុខមេព្រៃផ្លោច ដែលដឹកចេញពីចំណុចស្ពានដែក ហើយនិងច្រកស្រែកិន ឆ្លងកាត់មុខស្នាក់ការមេព្រៃផ្លោច ដែលស្ថិតនៅក្នុងឃុំត្រពាំងជោ ស្រុកឱរ៉ាល់ខេត្តកំពង់ស្ពឺ ជារៀងរាល់យប់ ដើម្បីយកទៅលក់បន្ត អោយមេឈ្មួញបន្តនៅស្រុកថ្ពង។
នៅក្នុងរឿងនេះដែរ មានប្រជាពលរដ្ឋម្នាក់សូមមិនបញ្ចេញឈ្មោះ ដែលរស់នៅជិតកន្លែងស្នាក់ការមេព្រៃផ្លោចនោះ បានបង្ហើបអោយដឹងថា រូបលោក ឧស្សាហ៍ឃើញមានគោយន្តដឹកឈើ ចេញជារៀងរាល់យប់ សឹងថាមិនខានយប់ណាទេ ហើយអ្វីដែលសំខាន់នោះ គឺក្រុមនាក់ដឹកឈើ តាមគោយន្តកន្ត្រៃទាំងនេះ នៅពេលដែលមកដល់មុខមេព្រៃផ្លោច ត្រូវតែឈប់បង់លុយជាមុនសិន ទើបទៅមុខបាន តែបើមិនបង់លុយជូនអស់លោកមេព្រៃផ្លោចវិញទេ ពួកលោកមេព្រៃផ្លោចតែងតែនិយាយថា មិនអោយទៅមុខ និងឃាត់ទុក។
នៅក្នុងរឿងនេះដែរ គួរណាស់ថ្នាក់ខេត្ត សូមលោកមេត្តាជួយពិនិត្យមើលផង ព្រោះខេត្តកំពង់ស្ពឺ មិនទាន់បានទប់ស្កាត់ ការបំផ្លាញព្រៃបាននៅឡើយទេ មូលហេតុដោយមានមន្ត្រីពាក់ពន្ធ័មួយក្តាប់តូច ដែលមិនយកចិត្តទុកដាក់ ហើយយើងទាំងអស់គ្នា និងសង្ឃឹមថា ឯកឧត្តមអភិបាលខេត្តកំពង់ស្ពឺ លោក និងមានចំណាត់ការ ទៅលើមន្ត្រីជើងដប់ទាំងនោះ៕
