ខេត្តរតនគិរី៖ ជំលោះរវាងអ្នកម៉ៅការប្រមូលសំរាម និងក្រុមហ៊ុនវិនិយោគ បណ្តាលឲ្យប៉ះពាល់របររកស៊ីប្រចាំថ្ងៃ របស់បងប្អូនអាជីវករនៅផ្សារបានលុង ដោយសារតែព្រឹកលឹម ថ្ងៃទី១៩ ខែមករា ឆ្នាំ២០១៧ ក្រុមហ៊ុនម៉ៅការប្រមូលសំរាម បានដឹកសំរាមជាច្រើនរថយន្ត មកចាក់គរនៅមុខស្នាក់ការផ្សារបានលុង បង្កការកកស្ទះចរាចរណ៍យ៉ាងខ្លាំង និងមានសភាពរញ៉េរញ៉ៃ ដល់ក្រុមអាជីវករចូលមកលក់ដូរក្នុងផ្សារបានលុង និងអ្នកធ្វើដំណើរចេញចូលផ្សារទិញសម្ភារៈផ្សេងៗ។
ទាក់ទិននឹងករណីខាងលើនេះ លោកឧកញ៉ាសា លាង ប្រធានក្រុមហ៊ុនវិនិយោគផ្សារ បានឲ្យដឹងថា ដោយមូលហេតុពួកគេយកសម្រាមចាក់មុខផ្សារយ៉ាងច្រើនបែបនេះ គេទាមទារថាខាងក្រុមហ៊ុនជំពាក់លុយ ក្រុមហ៊ុនម៉ៅការប្រមូលសំរាម។
លោកឧកញ៉ាសា លាងបន្តថា ក្រុមហ៊ុនមិនបានជំពាក់លុយដូចការអះអាង របស់ក្រុមហ៊ុនម៉ៅការប្រមូលសំរាម(លោកជា គួង) នោះទេ ហើយថ្លៃប្រមូលសំរាមកន្លងមក ខាងក្រុមហ៊ុនទួទាត់អោយអស់ហើយ ពោលគឺ១ខែ៣លានរៀល និងកម្មករប្រមូលសំរាមខាងៗផ្សារក្នុង១ខែ១លាន៨០ម៉ឺនថែមទៀតផង ហើយនៅពេលនេះដែរ ខាងលោកជា គួង បញ្ជាឲ្យកម្មករប្រមូលសំរាមប្រមាណជាង១០នាក់ និងរថយន្តដឹកសំរាមចំនួន៣គ្រឿងយកសំរាមមកចាក់គរនៅមុខស្នាក់ការផ្សារ និងរថយន្តដឹកសំរាម៣គ្រឿងតំរៀបគ្នាដើម្បីបិទផ្លូវ។
ជាការកត់សំគាល់ក្នុងព្រឹកកើតហេតុថ្ងៃទី១៩ ខែមករា ឆ្នាំ២០១៧ ពុំឃើញមានអាជ្ញាធរក្រុងបានលុង និងស្ថាប័នពាក់ព័ន្ធ ចុះមកធ្វើការសម្របសម្រួល ដើម្បីអោយក្រុមអាជីវករចូលលក់ដូររបររកស៊ីប្រចាំថ្ងៃរបស់ពួកគាត់នោះទេ។
មន្ត្រីរាជការ និងប្រជាពលរដ្ឋក្រុងបានលុង មានមតិលើកឡើងស្រដៀងគ្នាថា សូមអោយប្រមុខរាជរដ្ឋាភិបាល លុបចោលកិច្ចសន្យារវាងក្រុមហ៊ុនទាំង២ខាងលើ ព្រោះថាបង្កបញ្ហាមិនចេះចប់មិនចេះហើយ ដើម្បីផលប្រយោជន៍របស់ពួកគាត់រៀងៗខ្លួន បើទោះបីប្រមុខរាជរដ្ឋាភិបាលចេញសារាចរណែនាំ អោយបញ្ឈប់យកភាស៊ីការលក់ដូរតាមកញ្ច្រែង កញ្ជើ ល្អី ជាដើម ប៉ុន្តែក្រុមហ៊ុនទាំងពីរខាងលើ នៅតែបន្តយកជារៀងរាល់ថ្ងៃ ហើយចោទដាក់គ្នាទៅវិញទៅមក។
ទាក់ទិនទៅនឹងជំលោះរវាងក្រុមហ៊ុនម៉ៅការប្រមូលសំរាម និងក្រុមហ៊ុនវិនិយោគផ្សារបានលុងខាងលើនេះដែរ មិនអាចសុំ ការបំភ្លឺពីលោកជា គួង ប្រធានក្រុមហ៊ុនម៉ៅការប្រមូលសំរាមបានទេ ៕
