ខេត្តរតនគីរី៖តាមសេចក្តីរាយការណ៏បានឲ្យដឹងថា ខេត្តរតនៈគីរី គឺជាខេត្តដែលសំបូរទៅដោយឧក្រិដ្ឋកម្មព្រៃឈើឆ្លងដែន ទោះបីសម្តេចតេជោ ប្រមុខរាជរដ្ឋាភិបាល បានបង្កើតគណកម្មាធិការជាតិបង្រ្កាបបទល្មើស សម្រាប់ទប់ស្កាត់ការនាំឈើចេញដោយខុសច្បាប់ក៏ដោយ ក៏ខេត្តមួយនេះនៅតែមានឈើហូរចេញទៅស្រុកយួន ដូចគេហែរកថិនទាន ជាពិសេសតាមច្រកអូរយ៉ាដាវ។
ពួកឈ្មួញដែលជាឧក្រិដ្ឋជនបំផ្លាញព្រៃឈើ កំពុងផ្តុំក្បាលគ្នានៅខេត្តរតនៈគីរី ដោយមានការឃុបឃឹត និងសម្របសម្រួលពីមន្ត្រីជំនាញពាក់ពន្ធ័នាំឈើចេញទៅក្រៅ ទើបបណ្តាលឲ្យមានលំហូរកាប់បំផ្លាញព្រៃឈើយ៉ាងគំហុគ នៅក្នុងស្រុកដោយមិនអាចទប់ស្កាត់បាន។
ទន្ទឹមនោះ ក៏មានមេឈ្មួញជើងខ្លាំងម្នាក់ឈ្មោះ ម៉េង ដែលល្បីរកស៊ីឈើខុសច្បាប់ដុះស្លែនៅខេត្តរតនៈគីរី មានអ្នកកាងជាអ្នកធំនៅខេត្ត ទើបឈ្មោះ ម៉េង ហ៊ានរកស៊ីឈើខុសច្បាប់ដោយរលូន ជំនាញពាក់ពន្ធ័មិនហ៊ានក្អកជាមួយ បែជាសម្របសម្រួលចាំទទួលលាភសក្ការៈទៅវិញ។
តាមប្រភពពត័មានឲ្យដឹងថា ឈ្មោះ ម៉េង មានឃ្លាំងស្តុបឈើមួយកន្លែងនៅភូមិ កាចូនលើ ឃុំកាចូន ស្រុកវើនសៃ និងមានរថយន្តសំរាប់ដឹកជញ្ជូនឈើចំនួន 3គ្រឿង តោយន្តច្នែ១គ្រឿង រថយន្តបាឡែន២គ្រឿង និងសាំយ៉ុង៣គ្រឿង សំរាប់ធ្វើសកម្មភាពដឹកឈើរាល់ថ្ងៃ ដើម្បីយកទៅលក់នៅប្រទេសយួន តាមច្រកទ្វារអន្តរជាតិអូរយាដាវ ដែលមានលោក អ៊ី ចំរើន ជាប្រធានច្រក ទទួលការរិះគន់ថាបានបើកច្រក ឲ្យឈ្មោះម៉េងនាំឈើចេញទៅយួន ។
ឈ្មោះ ម៉េង បានប្រមូលទិញឈើ ពីតំបន់កោះទាក់ ស្រុកវ៉ឺនសៃ មានប្រភេទឈើធ្នង់ នាងនួន រួចនាំចេញទៅស្រុកយួន ដោយមានអាងខ្សែអ្នកធំខេត្តចាំជួយនៅពីក្រោយ សូម្បីលោកអភិបាលខេត្ត ក៏ឈ្មោះនេះមិនញញើតដែរ។
ប្រជាពលរដ្ឋរំពឹងថា នាយឧត្តមសេនីយ៏ សៅ សុខា ប្រធានគណកម្មាធិការបង្រ្កាបបទល្មើស ដែលទទួលបានដាវអាជ្ជាសឹក ពីសម្តេចតេជោ នឹងបញ្ជាកម្លាំងបង្រ្កាបមេឈ្មួញឈើឈ្មោះ ម៉េង ដែលកំពុងប្រព្រិត្តបទល្មើសឧក្រិដ្ឋកម្មព្រៃឈើឆ្លងដែន ប្រមូលនិងដឹកឈើចេញទៅយួន និងមន្ត្រីមួយចំនួនដែលឃុបឃឹតជាមួយឈ្មួញរូបនេះ ទៅតាមនីតិវិធីច្បាប់ ៕
