ខេត្តកំពង់ធំ៖ នៅព្រឹកថ្ងៃទី១៦ខែមករាឆ្នាំ២០១៧នេះ តំណាងអយ្យការ អមសាលាដំបូងខេត្តកំពង់ធំ បានធ្វើពិធីប្រគល់សត្វសំពោចចំនួន៣ក្បាល អោយទៅអង្គការវាយអេត និងមន្ត្រីអភិរក្សសត្វ ប្រចាំភ្នំតាម៉ៅ បន្ទាប់ពីសមត្ថកិច្ចកងរាជអាវុធហត្តស្រុកសន្ទុក បានឃាត់ខ្លួនស្ត្រីម្នាក់ កាលពីរសៀលថ្ងៃទី១៣ខែមករាឆ្នាំ២០១៧ នៅពេលស្ត្រីម្នាក់នេះ បានទិញសត្វសំពោចចំនួនបីក្បាល ដឹកជញ្ជូនតាមផ្លូវជាតិលេខ៦ ក្នុងភូមិសាស្ត្រស្រុកសន្ទុក បម្រុងយកទៅលក់បន្ត។
ប្រភពព័ត៍មានពីសមត្ថកិច្ចបានបង្ហើបអោយដឹងថា បន្ទាប់ពីសមត្ថកិច្ចបានធ្វើការឃាត់ខ្លួនស្ត្រីជួញដូរសត្វព្រៃ រួច ក៏បានបញ្ជូនទៅឲ្យមន្ត្រីរដ្ឋបាលព្រៃឈើកំពង់ថ្ម សាកសួរបន្តតាមនិតិវិធី សមត្ថកិច្ចបានបន្តថា បន្ទាប់ពីធ្វើការសាកសួរអស់រយៈពេលជិត២ម៉ោង ស្ត្រីម្នាក់នេះបានឆ្លើយត្រង់ៗថា គាត់បានសន្សំលុយជាច្រើនខែមកហើយ ទើបទិញបានសត្វសំពោច៣ក្បាលនេះ បើចាប់សត្វសំពោច ៣ក្បាលនេះ គាត់គ្មានប្រាក់ឯណាយកទៅចិញ្ចឹមកូនៗទេ ដូច្នេះគាត់សុខចិត្តជាប់គុក បើអស់សត្វបីក្បាលនេះ ទោះបីជាសមត្ថកិច្ច បានដោះលែងឲ្យត្រឡប់ទៅផ្ទះវិញក៏ដោយ ក៏គាត់មិនទៅដែរ ព្រោះជីវិតគាត់ពឹងលើលុយនេះ ដើម្បីយកទៅចិញ្ចឹមកូន។
លោក អ៊ិតសុធា ព្រះរាជអាជ្ញាសាលាដំបូងខេត្តកំពង់ធំ បានឲ្យដឹងនៅព្រឹកថ្ងៃទី១៦ខែមករានេះថា៖ សមត្ថកិច្ចបានលើកលែងទោសស្ត្រីជួញដូរសត្វសំពោចបីក្បាលនេះ ព្រមទាំងបានប្រគល់ប្រាក់ចំនួន ៤០ម៉ឺនរៀលឲ្យទៅស្ត្រីម្នាក់នេះទៀត ជាថ្នូរនឹងការសុំទិញសត្វសំពោចបីក្បាល ទើបស្ត្រីម្នាក់នេះបានព្រម ត្រឡប់ទៅផ្ទះវិញ ហើយសត្វព្រៃចំនួន៣ក្បាលនេះ ត្រូវសមត្ថកិច្ចបានធ្វើពិធីប្រគល់ឲ្យមន្ត្រីអភិរក្ស យកទៅព្យាបាលនៅរមណីយដ្ឋានភ្នំតាម៉ៅ ដើម្បីដោះលែងឲ្យមានសេរីភាព ដូចសត្វដ៏ទៃទៀត៕
គួររំលឹកថា ក្រៅពីការលើកលែងលែងទោសស្ត្រីម្នាក់នេះ លោកព្រះរាជអាជ្ញាខេត្តកំពង់ធំ ក៏បានលើកលែង ដល់ប្រជាពលរដ្ឋដែលដឹកជញ្ជូនសិប្បកម្ម បន្តិចបន្តួចនាពេលកន្លងមកនេះដែរ ៕
