ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នឹងផ្តល់កិត្តិយសអញ្ជើញជួបជុំជាមួយអ្នកសារព័ត៌មានក្នុងស្រុកប្រមាណ ១៣០០នាក់ នៅ សណ្ឋាគារសុខា រាជធានីភ្នំពេញ នៅល្ងាចថ្ងៃទី១៤ ខែមករា ឆ្នាំ២០១៧ នេះ ។
សមាសភាពអ្នកចូលរួមក្នុងកម្មវិធីជួបជុំរួមមាន ឥស្សរជនជាអតីតអ្នកសារព័ត៌មាន, អ្នកកាសែតក្នុងស្រុកល្បីៗ និពន្ធនាយក អ្នកថតរូប អ្នកអត្ថាធិប្បាយវិទ្យុ ទូរទស្សន៍ ថតវីដេអូ ទស្សនាវដ្តី អ្នកនាំពាក្យ តាមស្ថាប័ន ក្រសួង រាជធានីខេត្ត ប្រធានមន្ទីរព័ត៌មានរាជធានី-ខេត្ត ។
ជំនួបរវាង សម្តេចតេជោនាយករដ្ឋមន្រ្តីនិងអ្នកសារព័ត៌មាន គឺចាត់ទុកជាប្រវត្ថិសាស្រ្តមួយនៅក្នុងវិស័យសារព័ត៌មាន ដែលជាឱកាសឲ្យអ្នកសារព័ត៌មាន បានជួបជុំជាមួយអ្នកសារព័ត៌មានដូចគ្នា មកពីបណ្តាខេត្ត និងក្នុងរាជធានីភ្នំពេញបាន ជជែកពិភាក្សាគ្នា ទៅវិញទៅមក។
សម្តេចតេជោ ក៏សូមអភ័យទោសជំនួសរដ្ឋមន្ត្រីព័ត៌មាន ផងដែរ ដែលបងប្អូនសារព័ត៌មានមួយចំនួនមិនបានអញ្ជើញចូលរួមនៅថ្ងៃនេះ។ យើងសម្រេចយកថ្ងៃទី ១៤ មករា ជារៀងរាល់ឆ្នាំដើម្បីប្រារព្ធពិធីជួបជុំអ្នកកាសែតក្នុងស្រុក។ សម្តេច បានបន្តថា ឆ្នាំក្រោយគឺយើងអាចអញ្ជើញបងប្អូនអ្នកសារព័ត៌មាន ពី៣ទៅ៤ពាន់នាក់ ក្នុងនោះ គឺយើងនឹងអញ្ជើញសារព័ត៌មានបក្សប្រឆាំងចូលរួមពេញទីនៅទីនេះ។ យើងរស់នៅក្នុងប្រទេសតែមួយ ទោះបីយើងមានទស្សនៈខុសគ្នា ដូចជាអ្នកខ្លះគាំទ្ររដ្ឋាភិបាល អ្នកខ្លះគាំទ្របក្សប្រឆាំង គឺយើងអាចជួបគា្នបាន។ សូមក្រសួងមន្ទីរ និងជាពិសេសគឺខេត្ត ត្រូវរៀបចំអ្នកនាំពាក្យឲ្យបានត្រឹមត្រូវ និងពង្រឹងគេហទំព័រតាមក្រសួង មន្ទីរអោយបានល្អ និងហ្វេសប៊ុក ។ កន្លងមកក្រសួង មន្ទីរ និងខេត្តមួយចំនួនពុំមានព័ត៌មានទាន់ពេលវេលា ។
សម្តេចតេជោ បានមានប្រសាសន៍ថា សំខាន់ណាស់សម្រាប់អ្នកសារព័ត៌មាន គឺត្រូវតែនិយាយការពិត និងទាន់ហេតុការណ៍។ គ្មានអ្នកណាអានព័ត៌មានផ្អូមទេ។ អ្នកសារព័ត៌មានគឺមិនត្រូវធ្វើខ្លួន ជាអ្នកអត្ថាធិប្បាយផង ជាព្រះរាជអាជ្ញា និងជាចៅក្រមផង។ ត្រូវស្គាល់តួនាទីខ្លួន កុំធ្វើការសន្និដ្ឋានបិទផ្លូវ។ អ្នកសារព័ត៌មានគឺកុំធ្វើការដោះដូរបំបិទព័ត៌មានជាមួយនឹងលុយកាក់។ ទន្ទឹមនឹងនេះ សូមអ្នកសារព័ត៌មានត្រូវរៀនអំពីរបៀបសួរសំណួរ។ សូមបន្តពង្រឹងការបណ្តុះបណ្តាលធនធានអ្នកសារព័ត៌មាន។ សារព័ត៌មានល្អ បើមានការថ្លោះធ្លោយគឺត្រូវការសុំកែតម្រូវ។ ចំណុចដែលខ្ញុំបានលើកឡើងទាំងអស់នេះ គឺខ្ញុំចង់បានសារព័តមានយើងល្អ ជាគ្រួសារតែមួយ។ –
ការអញ្ជើញផ្តល់កិត្តិយសពី សម្តេចតេជោនាយករដ្ឋមន្រ្តី និង សម្តេចកិត្តិព្រឹទ្ឋបណ្ឌិត ល្ងាចនេះ គឺបានបញ្ជាក់យ៉ាងច្បាស់អំពីការយកចិត្តទុកដាក់ដ៏ខ្ពង់ខ្ពស់ របស់ប្រមុខរាជរដ្ឋាភិបាលចំពោះអ្នកសារព័ត៌មាន ដើម្បីបង្កើនទំនាក់ទំនងល្អក្នុងការជួយជំរុញការអភិវឌ្ឍប្រទេសជាតិអោយកាន់តែរីកចម្រើន៕
