កំពង់ធំ៖ រថយន្តនីសាន់ដឹកឈើប្រណិត១គ្រឿង ព្រមទាំងអ្នកបើកបរ ត្រូវបានកម្លាំងកងរាជអាវុធហត្ថ ស្រុកបារាយណ៍ ចាប់បញ្ជូនយកទៅកាន់ ផ្នែករដ្ឋបាលព្រៃឈើកំពង់ថ្ម បន្ទាប់ពីរថយន្ត១គ្រឿងនេះ បានលួចដឹកឈើប្រណិតខុសច្បាប់ ធ្វើចរាចរណ៍នៅតាមបណ្តោយផ្លូវជាតិលេខ៦ កាលពីរសៀលថ្ងៃទី១០ខែមករាឆ្នាំ២០១៧ នៅចំណុច ភូមិដំរីស្លាប់ ឃុំអណ្តូងពោធិ ស្រុកបារាយណ៏ ខេត្តកំពង់ធំ ។
ប្រភពព័ត៌មានពីសមត្ថកិច្ចអាវុធហត្ថស្រុកបារាយណ៏បានបង្ហើបឲ្យដឹងថា៖ នៅពេលដែលសមត្ថកិច្ចកំពុងតែចុះល្បាតតាមដងផ្លូវ ក៏បានប្រទះឃើញរថយន្តម៉ាកនីសាន់ចាស់១គ្រឿងនេះ បានធ្វើសកម្មភាពដឹកឈើទាំងកណ្តាលថ្ងៃ ដោយមិនខ្លាចញញឹតបន្តិចសោះ ខណៈពេលនោះ សមត្ថកិច្ចបានរាយការណ៍ជូនថ្នាក់លើ ហើយក៏បានឃាត់និងនាំយក រថយន្តដឹកឈើ និងអ្នកបើកបរម្នាក់ បញ្ជូនទៅកាន់ផ្នែករដ្ឋបាលព្រៃឈើកំពង់ថ្ម ដើម្បីធ្វើការវាស់វែងនិងចាត់ការបន្ត។
បើតាមចម្លើយពីអ្នកបើកបររថយន្ត ឈ្មោះ សៀម ហ៊ុច នៅឃុំសួង ស្រុកត្បូងឃ្មុំ ខេត្តកំពង់ធំ បានប្រាប់សមត្ថកិច្ចថា៖ ខ្លួនគេបានស៊ីឈ្នួលដឹកឲ្យគេ ចេញពីចំនុចព្រំប្រទល់ខេត្តសៀមរាប និងខេត្តកំពង់ធំ ក្នុងគោលដៅឆ្ពោះទៅភ្នំពេញ ក្នុង១ជើងបានឈ្នួលតម្លៃ ជាង១០០ដុល្លា ។
លោក ហេង កាមិច នាយសង្កាត់រដ្ឋបាលព្រៃឈើបារាយណ៏បានឲ្យដឹងថា៖ ឈើប្រណិតនៅក្នុងរថយន្តនីសាន់ មានចំនួន១៧ដុំ ស្មើនិង១;៣៥មែត្រគូប ជាឈើតាប់ជ្រុង ប្រភេទឈើធ្នង់ ចំពោះវត្ថុតាងមានរថយន្ត១គ្រឿងនិងឈើប្រណិត សមត្ថកិច្ចបានធ្វើការរឹបអូសជាសម្បត្តិរដ្ឋ ចំនែកតៃកុងរថយន្ត សមត្ថកិច្ចជំនាញបានកសាងសំណុំរឿង បញ្ជូនទៅតុលាការ ចាត់ការបន្តតាមច្បាប់ ៕
