ក្រុងប៉ោយប៉ែត៖ប្រជាពលរដ្ឋនៅក្រុងប៉ោយប៉ែត ខេត្តបន្ទាយមានជ័យ ដែលមានយានយន្តចេញចូលរកស៊ីទំនាក់ទំនងនៅផ្សាររ៉ុងគឿ ស្រុកអារញ្ញប្រាថេត ខេត្តស្រះកែវ ប្រទេសថៃ មានការមិនពេញចិត្តយ៉ាងខ្លាំង ចំពោះប៉ូលីសអន្តោប្រវេសន៏ថៃ(ត.ម៉) ដែលយកលុយយានយន្តចេញចូលទៅក្នុងដីថៃ បើទោះបីជាយានយន្តទាំនោះបានបំពេញបែបបទត្រឹមត្រូវតាមច្បាប់កំណត់របស់ប្រទេសថៃក៏ដោយ។
ប្រជាពលរដ្ឋបានឲ្យដឹងថា ដើម្បីចូលទៅផ្សាររ៉ុងគឿ ទឹកដីថៃដោយស្របច្បាប់ ពួកគាត់ត្រូវបំពេញបែបបទចំពោះរថយន្តគឺត្រូវ1/ ធ្វើឯកសារចេញចូលមួយច្បាប់ មួយឆ្នាំតម្តងតម្លៃ១០០០បាត 2/ បរឌឺផាស់របស់ម្ចាស់រថយន្ត វាយរាល់ពេលចេញចូល 3/ ស្ទិកគរ័១ខែតម្តងតម្លៃ២០០បាត ហួសកំណត់១ថ្ងៃត្រូវបង់១០០០បាត កំណត់ត្រឹម១០០០០បាត ចំណែកម៉ូតូត្រូវ 1/បំពេញឯកសារចេញចូល១ច្បាប់ មួយឆ្នាំតម្តងតម្លៃ៦០០បាត 2/បរឌឺផាស់របស់ម្ចាស់ម៉ូតូ៧ថ្ងៃវាយម្តង 3/ម្ចាស់ម៉ូតូត្រូវធ្វើកាតពិសេសអស់១០០០បាត ប្រើបានរយៈពេល៦ខែ ផុតកំណត់ត្រូវបង់លុយជាថ្មី 4/កាតសំរាប់ម៉ូតូមួយខែធ្វើម្តងត្រូវបង់៣០០បាត 5/សំបុត្រពណ័លឿងមិនអាចប្រើបាន ត្រូវទិញសំបុត្ររៀងរាល់ថ្ងៃ 6/ស្ទិកគ័រត្រូវធ្វើមួយខែម្តង បង់ប្រាក់១០០បាត ហួសកំណត់១ថ្ងៃត្រូវបង់១០០០បាត កំណត់ត្រឹម១០០០០បាត ទើបអាចឆ្លងចូលដីថៃបាន។
ប៉ុន្តែអ្វីដែលធ្វើឲ្យប្រជាពលរដ្ឋមានការរអ៊ូរទាំ គឺថាក្រៅពីការចំណាយបំពេញបែបបទស្របច្បាប់រួចហើយ ពួកគាត់ត្រូវបង់លុយមួយគន្លាក់ទៀត គឺរថយន្តចូលត្រូវបង់លុយ២៥បាត ចេញមកវិញបង់២៥បាត ចេញរឺចូលម្តងបង់ប្រាក់ម្តង ចំណែកម៉ូតូចូលបង់១០បាត ចេញ១០បាត ចេញចូលម្តងបង់ប្រាក់ម្តង ដែលគេអះអាងថា ប៉ូលីសអន្តោប្រវេសន៏ថៃបញ្ជាឲ្យយក និងមានជនជាតិខ្មែរឈ្មោះ ហ៊ីម ជាអ្នកគ្រប់គ្រងប្រមូលលុយឲ្យត.ម៉ថៃ ហើយបើតាមតួលេខក្រៅផ្លូវការ មានរថយន្តនិងម៉ូតូចេញចូលមិនក្រោមមួយពាន់គ្រឿងទេក្នុងមួយថ្ងៃ។
ប្រជាពលរដ្ឋបានរិះគន់ទៀតថា ការគៀបយកលុយរថយន្តនិងម៉ូតូពីត.ម៉ថៃ បានធ្វើឲ្យប៉ះពាល់ដល់សេដ្ឋកិច្ចគ្រួសារពួកគាត់ដែលចូលទៅរកស៊ីនៅផ្សាររ៉ុងគឿ ហើយល្បិចកន្ទេលធំបន្លំដេកនេះ គឺខ្មែរជាអ្នកបង្រៀនតម្រួតថៃឲ្យចេះរកកំរៃក្រៅ មួយវិញទៀត ប្រជាពលរដ្ឋនិយាយថា លោក ហ៊ីម បានម៉ៅការប្រមូលលុយចេញចូលយានជំនិះពីត.ម៉ថៃទៀតផង។
សមាជិកសភាពាណិជ្ជកម្មខេត្តស្រះកែវ ប្រទេសថៃមួយរូប បានឲ្យដឹងថា ពុំមានច្បាប់ណាចែងឲ្យយកលុយនូវយានជំនិះចេញចូលផ្សាររ៉ុងគឿទឹកដីថៃនោះឡើយ ហើយការយកលុយខាងលើវាខុស ព្រោះគេបានបង់តាមច្បាប់កំណត់របស់ថៃរួចរាល់ហើយ ដូច្នេះតាមផ្លូវច្បាប់គឺអត់មានទេ។
ចំណែកលោក ហ៊ីម អ្នកគ្រប់គ្រងប្រមូលលុយឲ្យត.ម៉ថៃ បានបំភ្លឺប្រាប់អ្នកសារព័តមានយើងថា ចំពោះការយកប្រាក់លើយានយន្តចេញចូលទឹកដីថៃរបស់ត.ម៉ថៃ គឺគេមានច្បាប់របស់គេ ហើយការបង់លុយនេះ គឺធ្វើតែចំពោះថ្ងៃឈប់សំរាកថ្ងៃសៅរ៏និងថ្ងៃអាទិត្យ ចំណែកថ្ងៃធម្មតាគឺគេយកតែនៅម៉ោងឈប់សំរាក ពេលព្រឹកពីម៉ោង៦ដល់ម៉ាង៨កន្លះ ពេលថ្ងៃត្រង់ពីម់ោង១២ដល់ម៉ោង១ និងពេលល្ងាចពីម៉ោង៤កន្លះដល់ម៉ោង១០យប់ ហើយគេយកមិនត្រឹមតែខ្មែរទេ សូម្បីជនជាតិថៃក៏គេយកដែរ។ចំពោះព័តមានដែលថាលោកម៉ៅការពីត.ម៉ថៃនោះ គឺជារឿងមិនពិតទេ លោកពុំមែនជាអ្នកម៉ៅការនោះទេ លោកគ្រាន់តែជាកូនចៅធ្វើការឲ្យគេស៊ីប្រាក់ខែទេ គ្មានសិទ្ធទៅម់ៅការផ្តាច់នោះឡើយ។
ទោះបីយ៉ាងណា ប្រជាពលរដ្ឋដែលរកស៊ីនៅផ្សាររ៉ុងគឿដីថៃកំពុងត្អូញត្អែថា រថយន្តនិងម៉ូតូមានច្បាប់ត្រឹមត្រូវចូលដីថៃហើយ នៅតែត្រូវតម្រួតថៃបង្ខំឲ្យបង់លុយចេញចូលទៀត ដែលធ្វើឲ្យប៉ះពាល់ដល់ជីវភាពនិងសេដ្ឋកិច្ចរបស់ពួកគាត់៕
