ខេត្តឧត្តរមានជ័យ៖យោងតាមព័តមានឲ្យដឹងថា ការិយាល័យប្រឆាំងបទល្មើសសេដ្ឋកិច្ច នៃស្នងការនគបាលខេត្ត ឧត្តរមានជ័យ បង្ក្រាបឈើគ្រញូង បានយកវត្ថុតាងទៅរក្សាទុកជាច្រើនថ្ងៃ ទើបនឹងប្រគល់ ឱ្យទៅជំនាញ ចំពោះបញ្ហានេះ ដែលគេសង្ស័យថា សមត្ថកិច្ចចង់ស៊ីដាច់វត្ថុតាង ។
តាមឱ្យដឹងពីលោក អ៊ឹម សារិត នាយខ័ណ្ឌរដ្ឋបាលព្រៃឈើខេត្តឧត្តរមានជ័យ បានប្រាប់ តាមទូរស័ព្ទ នៅព្រឹកថ្ងៃទី ២០ ខែធ្នូ ឆ្នាំ២០១៦ នេះថា៖ ខ័ណ្ឌរដ្ឋបាលព្រៃឈើ ទទួលបាន វត្ថុតាងឈើគ្រញូងចំនួន ១៣ដុំ ស្មើរនឹង១២០គីឡូក្រាម ដែលការិយាល័យនគបាលប្រឆាំងបទល្មើសសេដ្ឋកិច្ច នៃស្នងការនគរបាលខេត្ត បានប្រគល់ទៅឱ្យមន្រ្តីរដ្ឋបាលព្រៃឈើ នៅស្នាក់ការខេត្ត កាលពីព្រឹកថ្ងៃទី១៩ ខែធ្នូ ឆ្នាំ២០១៦ ។
សូមបញ្ជាក់ថា ករណីបង្រ្កាបបទល្មើសឈើគ្រញូងស្ទើរតែដាច់វត្ថុតាង ដែលលោកវរសេនីយ៍ត្រី កុល វិបុល នាយការិយាល័យប្រឆាំងបទល្មើសសេដ្ឋកិច្ច នៃស្នងការខេត្ត បានធ្វើការបង្ក្រាប ពលរដ្ឋខ្មែរ ដែលស្ពាយឈើគ្រញូងចុះពីភ្នំ ជិត ២០នាក់ កាលពី យប់ ថ្ងៃ ទី១៦ ឈានចូលដល់ថ្ងៃទី១៧ ខែធ្នូ ស្ថិតនៅចំណុចអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ។
ក្នុងនោះដែរ សមត្ថកិច្ចម្នាក់បានប្រាប់ថា៖ លោក កុល វិបុល បានរឹបអូសឈើគ្រញូងជាង ៤០ដុំ ដោយដឹកចំនួន ០៣ រថយន្តកាមរី។ ហើយរហូតដល់ព្រឹកថ្ងៃទី១៩ ខែធ្នូ ទើបកម្លាំង របស់លោក កុល វិបុល បានបញ្ជូនឈើគ្រញូងចំនួន ១៣ដុំ ទៅឱ្យរដ្ឋបាលព្រៃឈើ។
ជាមួយគ្នានេះដែរ ចំពោះភាពមិនប្រក្រតីវត្ថុតាងឈើគ្រញូង លោក កូយ កាន់យ៉ា ព្រះរាជអាជ្ញាខេត្តឧត្តរមានជ័យ ក៏បានបញ្ជាក់ប្រាប់អ្នកសារព័ត៌មានតាមទូរស័ព្ទ កាលពីព្រឹកថ្ងៃទី១៨ ខែធ្នូ កន្លងមកនេះថា ករណីបង្ក្រាបឈើគ្រញូងខាងលើ ខាងប៉ូលីសសេដ្ឋកិច្ច បានរាយការណ៍ទៅលោកថា បង្ក្រាបបានឈើគ្រញូងចំនួន ២១ដុំតូចៗ ដោយលោកប្រាប់ប្រគល់ទៅជំនាញ ធ្វើទៅតាមច្បាប់ ។
ករណីបង្ក្រាបបទល្មើសឈើគ្រញូង ដែលសង្ស័យចង់ស៊ីដាច់វត្ថុតាង នៅក្នុង ភេក សង្គមហ្វេសបុក របស់មន្ទីរកសិកម្ម រុក្ខប្រមាញ់ និងនេសាទខេត្តឧត្តរមានជ័យ ហើយក៏ជាប្រធានគណៈកម្មការបង្ក្រាបបទល្មើសព្រៃឈើ ដែលបានបង្ហោះកាលពីថ្ងៃទី១៩ ខែធ្នូ វេលាម៉ោង ៩ និង០៩នាទីយប់ ដោយបានសសេរថា ខណ្ឌរដ្ឋបាល ព្រៃឈើទទួល បានវត្ថុតាងឈើគ្រញូងប្រភេទ ក្រាក់ ចំនួន ១៤ដុំ ស្មើរនឹង ១២០គីឡូក្រាមនិងឈើធ្នង់ ១ដុំ ស្មើរនឹង ៣គីឡូក្រាម តែប៉ុណ្ណោះ ៕
