ខេត្តឧត្តរមានជ័យៈ លោក កុល វិបុលនាយការិយាល័យប្រឆាំងបទល្មើសសេដ្ឋកិច្ច នៃស្នងការនគរបាលខេត្តឧត្តរមានជ័យ បានរងការចោទប្រកាន់ថា ធ្វើការបង្ក្រាបឈើគ្រញូង តែមិនទាន់ប្រគល់ឱ្យជំនាញមេព្រៃ ទើបខាងមេព្រៃបដិសេធថាមិនដឹង។
ពាក់ព័ន្ធនឹងការចោទប្រកាន់នេះ ត្រូវបានគេដឹងថា កាលពីយប់ថ្ងៃទី១៦ ឈានចូលថ្ងៃទី១៧ ខែធ្នូ ឆ្នាំ២០១៦ កន្លងមកនេះ កម្លាំងប៉ូលីស ដឹកនាំដោយ លោកវរសេនីយ៍ត្រី កុល វិបុល ដែលមានការចូលរួមពីកម្លាំងស្ថាប័នផ្សេងទៀត បានធ្វើការបង្ក្រាបសកម្មភាព បទល្មើសឈើគ្រញូង នៅចំណុចអូរស្វាយ ស្រុកត្រពាំងប្រាសាទ ខេត្តឧត្តរមានជ័យ។
យោងតាមសមត្ថកិច្ចម្នាក់ដែលបានចូលរួម បាននិយាយថា កម្លាំងប៉ូលីសសេដ្ឋកិច្ចបានធ្វើការបង្ក្រាប ប្រជាពលរដ្ឋខ្មែរប្រមាណចំនួន ២០នាក់ ដែលត្រឡប់មកពីអូសឈើគ្រញូងពីទឹកដីថៃ និងធ្វើការរឹបអូសបាន ឈើគ្រញូងជាង ៤០ដុំ ដោយលោក កុល វិបុល បានឱ្យកម្លាំងយករថយន្តកាមរីជញ្ជូនឈើគ្រញូង ចំនួន ៣ គ្រឿង ទើបដឹកឈើអស់។
តាមប្រភពពីសមត្ថកិច្ចម្នាក់ ក្នុងចំណោមកម្លាំងចូលរួមបង្ក្រាបបានលួចប្រាប់ថា ឈើគ្រញូងជាង ៤០ដុំ ខាងលើ គឺមានមន្រ្តីប៉ូលីសម្នាក់ឈ្មោះ ម៉ៅ គេបានរត់ការគ្រប់ស្ថាប័នអស់ហើយ ដែលគេដាក់ការសង្ស័យថា ការបង្ក្រាបឈើគ្រញូងនេះ ដោយសារមានការថ្នាំងថ្នាក់ដោយប្រការណាមួយ ទើបឈានទៅដល់លោក កុល វិបុល ចេញមុខបង្ក្រាប។
បណ្តាញព័តមានបានសុំការបំភ្លឺតាមទូរស័ព្ទ ទៅលោកវរសេនីយ៍ត្រី កុល វិបុល នាយការិយាល័យប្រឆាំងបទល្មើសសេដ្ឋកិច្ចនៃស្នងការខេត្ត នៅថ្ងៃទី១៨ ខែធ្នូ ឆ្នាំ២០១៦ ដោយលោកប្រាប់ថា ឈើគ្រញូងបានបញ្ជូនទៅឱ្យជំនាញនៅខេត្ត។
ដោយឡែកពាក់ព័ន្ធនឹងបញ្ហានេះ បានទំនាក់ទំនងទៅលោក អ៊ឹម សារិត នាយខណ្ឌរដ្ឋបាលព្រៃឈើខេត្ត ដែលទើបនឹងទទួលដំណែងថ្មី នៅថ្ងៃនោះដែរ ដោយលោកបានឆ្លើយថា មិនដឹងអ្វីទាំងអស់ ហើយក៏មិនឃើញមានសមត្ថកិច្ចណាប្រគល់ឈើគ្រញូង មកឱ្យជំនាញដែរ។ ចំណែកខាង លោក កូយ កាន់យ៉ា ព្រះរាជអាជ្ញាខេត្តឧត្តរមានជ័យ បានបញ្ជាក់ថា ប៉ូលីសសេដ្ឋកិច្ចបានរាយការណ៍ បង្ក្រាបបានឈើគ្រញូងចំនួន ២១ដុំតូចៗប៉ុណ្ណោះ គឺលោកបានប្រាប់ ប្រគល់ទៅឱ្យជំនាញរដ្ឋបាលព្រៃឈើ។បើដូច្នេះ ឈើគ្រញូងជាង២០ដុំទៀតមានស្លាបហោះ រឺមួយក៏ចេះហោះទាំងអស់៕
