ភ្នំពេញ ៖ប្រធានភូមិភាគគយ គ្រប់គ្រងចំនួន៥ខេត្តគឺ៖ កំពង់ស្ពឺ កោះកុង ព្រះសីហនុ កំពត និងកែប ត្រូវបាន អគ្គនាយកនៃអ គ្គនាយកដ្ឋានគយនិងរដ្ឋករកម្ពុជា តែងតាំង លោក កែវ អង្កាម អនុប្រធានការិយាល័យ ដែលត្រូវជាប្អូនប្រុសបង្កើតរបស់លោក កែវ សុឃាង ប្រធាននាយកដ្ឋានគយបង្ក្រាបអំពើរត់គេចពន្ធ ឲ្យធ្វើជាប្រធានភូមិភាគគយ គ្រប់គ្រងចំនួន៥ខេត្តខាងលើ ។
ប្រភពព័ត៌មានដដែលបានបញ្ជាក់ថា ការតែងតាំងនោះ បានប្រឈមនឹងការរិះគន់យ៉ាងចាស់ដៃ ពីមន្ត្រីគយ គ្រប់លំដាប់ថ្នាក់ ព្រោះគេគិតថា ការផ្តល់តំណែងខ្លាញ់ទៅលោក កែវ អង្កាម នាពេលនេះ អាចផ្តើមចេញពីអំពើពុករលួយ បក្សពួកនិយម គ្រួសារនិយម ឬអាចនិយាយថា លោក កែវ អង្កាម បានឡើងបុណ្យឡើងសក្កិនេះ គឺតាមជើងខោបងប្រុស ។
មន្ត្រីអគ្គនាយកដ្ឋានគយ និងរដ្ឋាករបានអះអាងថា ក្រសួងស្ថាប័នភាគច្រើនក្នុងរាជរដ្ឋាភិបាល សម្តេច ហ៊ុន សែន បានធ្វើការកែទម្រង់ជាបន្តបន្ទាប់ហើយ តែអ្វីដែលសំខាន់នោះ គឺកំណែទម្រង់ការចាត់តាំងចៀសឲ្យផុតពីអំពើពុករលួយ ។ ផ្ទុយទៅវិញ សម្រាប់អគ្គនាយកដ្ឋានគយ គឺអត់មានទាន់កែទម្រង់អ្វីទាំងអស់ និយាយរួមកាលពីមុន អំពើពុករលួយប៉ិនណាមកដល់ពេលនេះ ពុករលួយនៅដដែល ឬកាន់តែរីកដំបៅធំថែមទៀតផង ។
ជាក់ស្តែងដូចជាការតែងតាំងលោក កែវ អង្កាម ប្អូនប្រុសបង្កើត លោកកែវ សុឃាង ធ្វើជាប្រធានភូមិភាគគយគ្រប់គ្រង ចំនួន៥ខេត្តនេះជាដើម ទោះជាគេថា មិនពុករលួយ ក៏យើងមើលទៅឃើញថា ពុករលួយបក្សពួកនិយមដែរ ។
ដូច្នេះទាមទារអោយរដ្ឋមន្ត្រីក្រសួងសេដ្ឋកិច្ចនិងហិរញវត្ថុ លោក អូន ព័ន្ធមុន្នីរ័ត្ន មេត្តាជួយពិនិត្យផង ដើម្បីធ្វើការបំបាត់នូវអំពើពុករលួយ បក្សពួកនិយមគ្រួសារនិយម ក្នុងអគ្គនាយកដ្ឋានដ៏សំបូរខ្លាញ់មួយនេះ ។
ពុំអាចសុំការបំភ្លឺពីអគ្គនាយកនៃអគ្គនាយកដ្ឋានគយ និងរដ្ឋករកម្ពុជាបានទេ ព្រោះគ្មានលេខទូរសព្ទ័៕
