ខេត្តកំពង់ធំះ នៅរសៀលថ្ងៃទី១២ខែធ្នូឆ្នាំ២០១៦នេះ មានប្រជាពលរដ្ឋជាង៣០នាក់ បានលើកគ្នាមកឈរតវ៉ា នៅខាងមុខសាលាខេត្តកំពង់ធំ ដោយមានបំណង សុំឲ្យឯកឧត្តម អភិបាលខេត្តកំពង់ធំជួយរកយុត្តិធម៍ដល់លោកយាយ ហ៊ី ហូរ អាយុ៧៨ឆ្នាំមានជំងឺប្រចាំកាយ នៅភូមិស្វាយសរ ឃុំកំពង់ចិនត្បូង ស្រុកស្ទោង ខេត្តកំពង់ធំ កំពុងប្រឈមនិងការរំលោភយកដីផ្ទះ ពីសំណាក់ក្មួយបង្កើត។
ប្រភពព័តមានពីប្រជាពលរដ្ឋ ដែលមកតវ៉ានៅមុខសាលាខេត្តកំពង់ធំ បាននិយាយប្រាប់ថា ពួកគាត់ជាង៣០នាក់បាននាំគ្នា ជិះរថយន្តមកពីស្រុកស្ទោង ព្រមទាំងវេចបាយកញ្ចប់មកផង ដោយគោលបំណងចង់ឲ្យ ឯកឧត្តម អភិបាលខេត្តកំពង់ធំ ជួយរកដំណោះស្រាយ លើករណីដែលក្មួយស្រីបង្កើតឈ្មោះ សៀន សៀងហៃ បានប្តឹងទាមទារ យកដីលំនៅដ្ឋានរបស់លោកយាយហ៊ី ហូរ មានទំហំ១០មX៧០ម ស្ថិតនៅក្នុងភូមិស្វាយសរ ឃុំកំពង់ចិនត្បូង ស្រុកស្ទោង ដែលត្រូវបានតុលាការចាប់ពីថ្នាក់ខេត្តដល់ថ្នាក់កំពូល កាត់ឲ្យទៅក្មួយស្រីឈ្មោះសៀន សៀងហៃ ដាក់ថាជាអំណោយផ្តាច់ របស់លោកយាយហ៊ី ហូរបានប្រគល់ឲ្យខ្លួន ទើបតែនៅថ្ងៃទី១២ខែធ្នូនេះ ពួកគាត់បានស្នើសុំឲ្យអាជ្ញាធរខេត្ត មេត្តាជួយរកដំណោះស្រាយជូនគាត់ផង។
លោកអ៊ឹម សារឿន នាយករដ្ឋបាលសាលាខេត្តកំពង់ធំ ក៏បានប្រាប់ដល់ក្រុមអ្នកតវ៉ានោះថា សូមឲ្យបងប្អូនវិលត្រឡប់ទៅផ្ទះសិន ហើយប្រមូលឯកសារពាក់ព័ន្ធលើរឿងនេះ ដើម្បីដាក់ជូនឯកឧត្តម អភិបាលខេត្ត លោកនឹងឲ្យក្រុមការងារចុះពិនិត្យ ស្រាវជ្រាវជាក់ស្តែង ទន្ទឹមគ្នានេះ លោកសាយណូរ៉ា ព្រះរាជអាជ្ញារងសាលាដំបូងខេត្តកំពង់ធំ បានឲ្យដឹងថា ខ្លួនលោកគ្រាន់តែជាមន្ត្រីអនុវត្តន៏តាមការសម្រេចរបស់តុលាការកំពូលទេ តែរឿងចុះអនុវត្តន៏ថ្ងៃទី២៣ខែធ្នូនេះ សូមឲ្យពួកគាត់រកមេធាវី ឲ្យបានត្រឹមត្រូវនិងរកសាក្សីច្បាស់លាស់ ដើម្បីឆ្លើយបំភ្លឺ ពីការពិត ហើយយ៉ាងណាៗនោះ មេធាវី របស់គាត់ក៏អាចស្នើសុំពន្យាពេលបាន បើសិនមានហេតុផលត្រឹមត្រូវ៕
