កីឡា៖ Zinedine Zidane បាននិយាយឆ្លើយតបនឹងព័ត៌មានរឿងមិនបង់ពន្ធរបស់ Cristiano Ronaldo ថា កូនក្រុមរបស់លោកមិនត្រឹមជាកីឡាករល្អប៉ុណ្ណោះទេ តែគេក៏ជាពលរដ្ឋល្អមួយរូបដែរ។
ប្រតិកម្មខាងលើកើតឡើង ក្រោយពេលក្រុមហ៊ុន Gestifuteតំណាងឲ្យខ្សែប្រយុទ្ធសញ្ជាតិព័រទុយហ្គាល់ បានបញ្ចេញឯកសារដែលជាភស្តុតាងដ៏សំខាន់ ពាក់ព័ន្ធនឹងការបង់ពន្ធទាំងអស់របស់ Ronaldo មានន័យថារូបគេមិនបានគេចមិនបង់ពន្ធដូចការចោទប្រកាន់ទេ។
យ៉ាងណាក៏ដោយ នៅក្នុងសន្និសីទសារព័ត៌មាន មុនជំនួបក្រុម Deportivo La Coruna លោក Zidane បាននិយាយការពារកូនក្រុមថា៖ “មុនជាកីឡាករ Ronaldo ក៏ជាពលរដ្ឋសាមញ្ញម្នាក់ ហើយថែមទាំងជាពលរដ្ឋល្អទៀត។ ពេលខ្លះមនុស្សតែងបង្កើតពាក្យចចាមអារ៉ាមកើតឡើង ហើយរឿងទាំងនោះ វាប៉ះពាល់ដល់ពួកយើង ។ ខ្ញុំសង្ឃឹមថាគ្រប់យ៉ាងនឹងឆាប់បញ្ចប់ទៅវិញ ហើយកីឡាករទាំងអស់នឹងអាចផ្ដោតអារម្មណ៍យកឈ្នះការប្រកួត”៕
