កំពង់ធំៈ ផ្លូវលំក្រាលគ្រួសក្រហមមួយខ្សែ ត្រូវបានខូចខាតយ៉ាងដំណំ ដោយសាររថយន្តធុនយក្យ ដឹកឈើ ដឹកកៅស៊ូ បំផ្លាញខួបប្រាំង ខួបវស្សា បង្ករឲ្យខូចដាច់ បង្ករឲ្យការធ្វើចរាចរណ៍ រថយន្តធុនតូចធំនិងប្រជាពលរដ្ឋធ្វើដំណើរ រងគ្រោះ ការធ្វើដំណើរឆ្លងកាត់ផ្លូវមួយខ្សែនេះ ដែលលាតសន្ធឹងពីឃុំក្រយា ស្រុកសន្ទុក ទៅឃុំទំរីង ស្រុកសណ្តាន់ ខេត្តកំពង់ធំ តែទោះជាមានការដាក់កុងត្រូល ចាំយកលុយពីឡាន ដែលដឹកឆ្លងកាត់ចំនុចផ្លូវដាច់ទាំងនេះ ក៏អាជ្ញាធរ ស្រុក អាជ្ញាធរឃុំ ពុំមានវិធានការជួសជុល បែរជាបណ្តែតបណ្តោយឲ្យផ្លូវខូច រួមដៃបើកឧកាសឲ្យមានការកាក់រថយន្តយកលុយពីអ្នកធ្វើដំណើរ ។
តាមប្រភពព័ត៌មានពីប្រជាពលរដ្ឋ បានបញ្ជាក់ថា ផ្លូវមួយខ្សែនេះអោយតែដល់រដូវខែភ្លៀងធ្លាក់ តែងតែមាន អ្នកភូមិនាំយកត្រាក់ទ័រ គោយន្ត មកចាំសណ្តោងអូសឆ្លងកាត់ផ្លូវដាច់ ក្នុងរថយន្តមួយគ្រឿង៤ម៉ឺនរៀលរថយន្តធំ៨ម៉ឺនរៀល ម៉ូតូ៥ពាន់រៀល ដែលជាពេលឆ្មក់ឳកាសរកស៊ីលើផ្លូវសាធារណៈ ដោយពុំមានវិធានការ ទប់ស្កាត់និងហាមឃាត់នោះទេ ទើបបណ្តាលឲ្យក្លាយជាទម្លាប់ប្រពៃណីរបស់ស្រុកសន្ទុក នៅចំនុចអូតាព្រំ ឃុំត្រពាំងឬស្សី ស្រុកសន្ទុក ខេត្តកំពង់ធំ ។
អ្នកស្រី សួរ សុភាព ដែលជាប្រជាពលរដ្ឋ ចាំកាក់យកលុយពីរថយន្តដែលឆ្លងកាត់ទីតាំងផ្លូវដាច់ បានឲ្យដឹងថា ក្រោយពីអ្នកស្រីបានឃើញពីទុក្ខលំបាក របស់ប្រជាពលរដ្ឋ ដែលបានធ្វើដំណើរឆ្លងកាត់ទីនេះ មានផលលំបាកពេក អ្នកស្រីបានរួបរួមគ្នាជាមួយអ្នកជិតខាង៤នាក់ នាំគ្នាទិញជំនៀរឈើពុះ យកមកដាក់ក្រាលផ្លូវ នៅចំនុចផ្លូវដាច់ ហើយចំណូលដែលបានមក គឺស្រេចតែមនោសញ្ចេតនារបស់ អ្នកធ្វើដំណើរ ខ្លះឲ្យ២ពាន់ រថយន្តធំ៥ពាន់ ហើយយកមកចែកគ្នា អ្នកស្រីបានបន្តថា ការដាក់ក្រាលឈើដើម្បីឲ្យរថយន្តបើកបរបាន ស្រួលនេះ គឺក្នុងគោលបំណងជួយសម្រួលការធ្វើដំណើរ ប្រជាពលរដ្ឋជាច្រើន បានសំណូមពរឲ្យពួក គាត់ជួយរៀបចំផ្លូវ ហើយក៏ពុំមានការពាក់ព័ន្ឋនឹងស្ថាប័នខាងណាឲ្យដាក់ដែរ ។
ពាក់ព័ន្ឋនិងការចោទប្រកាន់ថា អាជ្ញាធរស្រុកសន្ទុក ពុំមានការអើពើ និងទប់ស្កាត់ការដឹកជញ្ជូនលើសទម្ងន់ បណ្តាលឲ្យផ្លូវខូច ពិបាកក្នុងការធ្វើដំណើរនេះ អ្នកសារព័ត៌មាន យើងពុំអាចធ្វើការទំនាក់ទំនងបានទេដោយសារខលចូលលេខទូរស័ព្ទលោក យស់ បញ្ញារិទ្ធ អភិបាលស្រុកសន្ទុកជាច្រើនលើក តែពុំមានការទទួលទូរស័ព្ទ តែទោះជាយ៉ាងណានោះ ក៏ប្រជាពលរដ្ឋសំណូមពរ ឲ្យគណៈបញ្ជាការស្រុកជួយមើលផ្លូវនេះផង៕
