កោះកុង ៖ ប្រជាពលរដ្ឋចំនួន ៣៣ គ្រួសារ រស់នៅក្នុង ភូមិអូរជ្រៅ ឃុំបឹងព្រាវ ស្រុកស្រែអំបិល ខេត្តកោះកុង លើកដៃសំពះសុំសម្ដេចនាយករដ្ឋមន្រ្តីហ៊ុន សែន ជួយអន្តរាគមន៍ពីរឿងដីធ្លីរបស់ពួកគាត់ ដែលត្រូវបានរំលោភយកយ៉ាងអយុត្តិធ័ម ពីអ្នកមានលុយ មានអំណាច អាងខ្សែ អាងខ្នងធំៗនៅពីក្រោយ ធ្វើបាបប្រជាពលរដ្ឋក្រីក្រស្លូតត្រង់ ដែលពួកគាត់ មិនសូវយល់ដឹងពីច្បាប់គ្រប់គ្រាន់ទេសព្វថ្ងៃនេះ។ ពួកគាត់បានបន្តថា សព្វថ្ងៃនេះនៅស្រុកខ្មែរយើង ឲ្យតែអ្នកមានលុយមួយចំនួន តែងតែទៅរកអ្នកមានអំណាចមានខ្សែខ្លាំងៗ ឃុបឃិតគ្នាធ្វើបាបគេឯង ហើយរំលោភយកដីកសិករក្រីក្រតែម្ដង។
ប្រជាពលរដ្ឋ បាននិយាយទាំងអួលដើមកនឹងហូរទឹកភ្នែក ប្រាប់ចំពោះមុខអ្នកសាព័ត៍មានថា ពួកគាត់ទាំងអស់គ្នា បានរស់នៅលើដីនេះទាំងពីឆ្នាំ១៩៩៩មក ហើយធ្វើស្រែចំកានៅលើដីនេះរហូត មានកូនពូនជាចៅអស់ហើយ ពួកគាត់សព្វថ្ងៃពឹងទៅលើការបង្កបង្កើនផលធ្វើចំការស្រែ ជាអ្នកកសិករទោះបី ក្រីក្រលំបាកយ៉ាងណា ក៍ពួកគាត់តស៊ូដើម្បីចិញ្ចឹមជីវិតនិងគ្រួសារដែរ។
ពួកគាត់បាននិយាយបន្ដទៀតថា ស្រាប់តែនៅថ្ងៃទី១៧ ខែឧសភាឆ្នាំ២០១៦នេះ លេចមុខឈ្មោះទូច ស្រូយ ភេទប្រុស អាយុ៥៣ឆ្នាំ មានទីលំនៅសព្វថ្ងៃ ភូមិថ្មធំ សង្កាត់រាម ខណ្ឌព្រៃនប់ ក្រុងព្រះសីហនុ ខេត្តព្រះស៊ីហនុ បានយកគ្រឿងចក្រមកឈូសឆាយ ហ៊ុំពទ្ធ័លើដីចំការរបស់ប្រជាពលរដ្ឋចំនួន៣៣គ្រួសារ បំរុងយកដីទាំងអស់ ហើយឈ្មោះទូចស្រូយ បានយកកងកម្លាំងប៉េអឹមមក អមមកជាមួយគ្រឿងចក្រនោះផងដែរ។
ប្រជាពលរដ្ឋបានបន្ដថា ពួកគាត់បានប្រមូលគ្នាមកជាច្រើននាក់ មកតវ៉ាសួរនាំពីរឿងដីធ្លីនេះ ក្រោយមកពួកគេបានឃើញប្រជាពលរដ្ឋមកច្រើនពេក ក៍ដកគ្រឿងចក្រយកទៅវិញបាត់។
ប្រជាពលរដ្ឋបានបន្តទៀតថា បន្ទាប់មកពួកគាត់បាននាំគ្នាផ្ដឹតមេដៃតវ៉ាទៅលោកមេភូមិ នឹងលោកមេឃុំ បឹងព្រាវ លោកឈឹម ថាវ បានទទួលស្គាល់ថា មេដៃប្រជាពលរដ្ឋពិតប្រាកដ ហើយបានទាំង ប្រថាប់ត្រានឹងចុះហត្ថលេខាទៀតផង។
បន្ទាប់មកទៀត នៅថ្ងៃទី២២ ខែវិឆ្ឆិកា ឆ្នាំ២០១៦ ឈ្មោះខាងលើក៍បានយកបង្គោល ដើរបោះ លើដីរបស់ពួកគាត់ម្ដងទៀត។
ពាក់ព័ន្ធក្នុងរឿងនេះ អ្នកសាព័ត៍មានយើងមិនអាចសុំការបំភ្លឺ ពីលោកអភិបាលស្រុកស្រែអំបិលបានទេ ដោយទូរសព្ទតេមិនចូល។
ការឃុបឃិតគ្នារវាងអ្នកមានលុយនឹងអំណាច រំលោភយកដីធ្លីប្រជាពលរដ្ឋ តែងតែមានមិនចេះអស់មិនចេះហើយ ដែលធ្វើឲ្យសម្ដេចតេជោ ហ៊ុន សែន ប្រមុខរាជរដ្ឋាភិបាល ឈឺក្បាលវិលមុខជារៀងរាល់ថ្ងៃ ដោយសារអ្នកមានអំណាចថ្នាក់ក្រោម មិនគោរពតាមអនុសាសន៏សម្តេច នៅតែគាបសង្កត់ប្រជាពលរដ្ឋតូចតាច គួរតែសម្ដេចតេជោសែន ដាក់កម្លាំងសម្ងាត់ចុះស៊ើបអង្កេត ចាប់ជនឃុបឃិតគ្នាជាប្រពន្ធ័យកមកអប់រំដាក់គុកតែម្ដង។
ជាចុងក្រោយ ប្រជាពលរដ្ឋទាំងអស់សូមលើកដៃសំពះអង្វរដល់ សម្ដេចតេជោនាយករដ្ឋមន្រ្តីហ៊ុនសែន នឹងសម្តេចកត្តិព្រឹទ្ធបណ្ឌិតប៊ុនរានី ហ៊ុនសែន មេត្តាជួយអន្តរាគមន៏ដល់ពួកគាត់ ដែលជាកសិករក្រីក្រមានដីបន្តិចបន្តួចសម្រាប់ចិញ្ចឹមជីវិត តែត្រូវអ្នកមានប្រាក់ប្រើអំណាចរំលោភយកផង មានតែ សម្ដេចទេដែលពួកគាត់សង្ឃឹមយ៉ាងខ្លាំង នឹងជឿទុកចិត្តសម្ដេចអស់ពីដួងចិត្ត ព្រោះសម្តេចទាំងពីរគឺជាទីពំនាក់របស់ប្រជាពលរដ្ឋទូទាំងប្រទេស៕ ( ដោយយួនឈីវ)
