ខេត្តកំពង់ធំ៖ សកម្មភាពឈូសឆាយដីព្រៃ នៅតែបន្តកើតឡើងយ៉ាងអាណាធិបតេយ្យ នៅក្នុងស្រុកសន្ទុកបើទោះបីជារាជរដ្ឋាភិបាល បានដាក់វិធានការរឹតបន្តឹងទៅតាមបណ្តាខេត្តនីមួយៗក៏ដោយ ។
ជាក់ស្តែងនៅល្ងាចថ្ងៃទី៧ ខែធ្នូ ឆ្នាំ២០១៦នេះ គ្រឿងចក្រអេស្ការវូទ័រ១គ្រឿង កំពុងតែឈូសឆាយដីព្រៃ ត្រូវបានលោក សាយ ណូរ៉ា ព្រះរាជអាជ្ញារងខេត្តកំពង់ធំ ដឹកនាំកម្លាំងសមត្ថកិច្ចចុះឃាត់ចាប់ នៅតំបន់តាម៉ម ស្ថិតក្នុងភូមិអូរគគីរ ឃុំជ្រាប់ ស្រុកសន្ទុក ខេត្តកំពង់ធំ ។
ប្រភពព័ត៌មានពីសមត្ថកិច្ច បានបង្ហើបឲ្យដឹងថា៖ បន្ទាប់ពីទទួលបានព័ត៌មានពីបណ្តាញថា មានគ្រឿងចក្រកំពុងតែធ្វើសកម្មភាពឈូសឆាយដីព្រៃអត់ច្បាប់ នៅក្បែជើងភ្នំសន្ទុក ខណៈពេលនោះ សមត្ថកិច្ចដែលដឹកនាំដោយលោក សាយ ណូរ៉ា ព្រះរាជអាជ្ញារង ខេត្តកំពង់ធំ បានចុះទៅដល់គោលដៅភ្លាមៗ ក៏បានប្រទះឃើញគ្រឿងអេស្កាវូទ័រ កំពុងតែធ្វើសកម្មភាពឈូសឆាយដី ដោយពុំឃើញមានលិខិតស្នាមបន្តិចសោះ ទើបសមត្ថកិច្ចបានបញ្ជាឲ្យបញ្ឈប់សកម្មភាព និងយកមករក្សាទុកនៅផ្ទះលោកមេភូមិ អូរគគី រង់ចាំប្រគល់ឲ្យទៅផ្នែករដ្ឋបាលព្រៃឈើកំពង់ថ្ម នៅព្រឹកថ្ងៃទី៨ ខែធ្នូ ឆ្នាំ២០១៦នេះ ដើម្បីសាកសួររកឯកសារ ការឈូសឆាយ និងលិខិតប្លង់ដីជាក់លាក់ បើពុំដូច្នោះទេ សមត្ថកិច្ចនិងចាត់វិធានការតាមផ្លូវច្បាប់ហើយ។
ជាមួយគ្នានេះ លោកអ៊ុំដែលជាកម្មករចាំដីឲ្យគេ បានប្រាប់សមត្ថកិច្ចថា គឺជាដីឈ្មោះ តាភានផ្ទេរឲ្យកូនរបស់គាត់ឈ្មោះផុយ តែគ្មានប្លង់កម្មសិទ្ធទេ គ្រាន់តែបានទទួលស្គាល់ពីលោកមេភូមិ និងមេឃុំ លោកអ៊ុំម្នាក់នេះបានបន្តថា៖ គាត់បានជួលគ្រឿងចក្រឈូសឆាយក្នុង១ហិចតាតម្លៃ៥០០ដុល្លា មានគម្រោងឈូសឆាយដីតែ៥ហិចតាទេ ហើយគ្រឿងចក្រនេះគាត់បានជួលពីម្ចាស់ឈ្មោះ អ៊ែល ប្រពន្ធឈ្មោះ ចេង នៅភូមិ តាំង គោក ឃុំសូយោង ស្រុកបារាយណ៏ ។
ចំនែកម្ចាស់គ្រឿងចក្រនេះបានឆ្លើយថា គាត់មិនបានធ្វើច្បាប់ឈូសឆាយទេ ព្រោះបានជំរាបភូមិឃុំហើយ នឹកស្មានថាដីនេះគេមានប្លង់ត្រឹមត្រូវ ទើបលោកហ៊ានជួលគ្រឿងចក្រឲ្យមកគេមិនដឹងថា៖ មានរឿងអញ្ជឹងសោះ ហើយថ្ងៃនេះលោកបានជួលគ្រឿងចក្របន្តឲ្យគេ ដោយយក១ថ្ងៃតម្លៃតែ៤០ម៉ីនរៀលប៉ុណ្ណោះ ទើបតែមកឈូសឆាយដីព្រៃនេះបានចំនួនបីថ្ងៃទេ ក៏ត្រូវបានសមត្ថកិច្ចប្របួចជាប់តែម្តង ៕
