ភ្នំពេញ:សម្តេច ហ៊ុន សែន នាយករដ្ឋមន្ត្រីនៃកម្ពុជា បានប្រកាសនៅក្នុងសភាថា លោក កឹម សុខាគឺជាដៃគូរពិភាក្សាការងារសភា ជាមួយសម្តេចក្រឡាហោម ស ខេង ហើយជាដៃគូរពិភាក្សារឿងប្រទេសជាតិ ជាមួយនិងសម្តេចផ្ទាល់ផងដែរ ។
សម្តេចតេជោ ហ៊ុន សែន បានបកស្រាយថា អ្វីដែលសម្តេចប្រធានសភាធ្វើការសម្រេចតែងតាំងនោះ ត្រឹមត្រូវ។ សម្តេចសុំអាន និងបកស្រាយឲ្យបានច្បាស់ទៅលើមាត្រាទី48នៃបទបញ្ជាផ្ទៃក្នុង ត្រង់កថាខណ្ឌមួយនិយាយថា ប្រធានក្រុមតំណាងរាស្ត្រ នៃគណបក្សនយោបាយក្រៅរាជរដ្ឋាភិបាល ដែលមានអាសនៈនៅក្នុងរដ្ឋសភាចាប់ពី25% ឡើងទៅ មានឈ្មោះហៅថា ប្រធានក្រុមមតិភាគតិច នៃរដ្ឋសភា។ ប្រធានក្រុមមតិភាគតិច ជាគូរសន្ទនាជាមួយប្រមុខរាជរដ្ឋាភិបាល ពាក់ព័ន្ធទៅនិងបញ្ហាប្រទេសជាតិ។ ប្រធានក្រុមមតិភាគតិចមានឋានៈស្មើ នាយករដ្ឋមន្ត្រី។
សម្តេចតេជា ហ៊ុន សែន បានបញ្ជាក់ថានៅក្នុងមាត្រាទី48 នេះ មិនតម្រូវឲ្យមានមនុស្ស2នាក់ កាន់តំណែងពីរដាច់ដោយឡែក ប្រធានក្រុមភាគតិចម្នាក់ និងប្រធានក្រុមតំណាងរាស្ត្រម្នាក់នោះទេ។ ហើយប្រសិនបើមិនអាចទទួល នៅការតែងតាំងនេះបាន គឺមានតែវិធីធ្វើវិសោធន៍កម្មមាត្រាទី48 ដែលដកចេញទាំងអស់នៅតួនាទីតំណែង។ហើយឥឡូវនេះលោក កឹម សុខា នឹងក្លាយជាដៃគូររបស់សម្តេចក្រឡាហោម ស ខេង ក្នុងឋានៈជាប្រធាននៃក្រុមតំណាងរាស្ត្រហើយធ្វើជាដៃគូរបស់សម្តេច ក្នុងឋានៈជាគូរពិភាក្សាលើបញ្ហាប្រទេសជាតិ។ ដូច្នេះសម្តេចមិនគិតថា មានអ្វីកើតឡើងទេ សូមបញ្ជាក់ជូនសាធារណៈមតិឲ្យបានច្បាស់ និងកុំមានការបកស្រាយខុស។
ចំណែកលោក កឹម សុខា ក៏បានថ្លែងថា បញ្ហាតំណែងតួនាទីមិនសំខាន់នោះទេ សំខាន់គឺត្រូវធ្វើយ៉ាងណានាំមកនូវការឯកភាពជាតិ និងនាំមកនូវប្រយោជន៍សម្រាប់ជាតិ ដូចដែលរូបលោកបានពិភាក្សាផ្ទាល់ ជាមួយសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ។
លោក កឹម សុខា បានបញ្ជាក់ថា លោកបានពិភាក្សាជាមួយសម្តេចនាយករដ្ឋមន្ត្រី ហើយបានរកឃើញគំនិតរួម មួយចំនួនសំរាប់អភិវឌ្ឍន៍សង្គម និងស្វែងរក ឯកភាពជាតិ។
លោកបន្តថា ការរិះគន់ប្រកបដោយស្ថាបនា និងរក្សាតម្លៃថ្លៃថ្នូរគឺស្វាគមន៍ ហើយលោកក៏សូមអរគុណ អង្គសភាទាំងមូលដែលបានដោះស្រាយបញ្ហាខ្មែរ និងខ្មែរ។
លោក កឹម សុខា ក៏សុំឲ្យប្រជាជនតាមដានមើលអំពីការធ្វើការ ដោយប្រុងប្រយ័ត្នអំពីទង្វើរបស់យើង លោកបានអំពាវនាវឲ្យមានការអត់ធ្មត់ និងបញ្ឈប់រាល់ការជេរប្រមាថ ដែលនាំឲ្យមានការបែកបាក់គ្នា ។
ជាបន្ទាន់នោះដែរ លោក សៀង ចែត មេឃុំស្រក មកពីគណបក្សប្រឆាំង ក៏ត្រូវបានលើកលែងទោសភ្លាមដែរ៕
