ខេត្តក្រចេះ៖ នៅថ្ងៃទី០3 ខែធ្នូ ឆ្នាំ២០១៦ មន្រ្តីរាជការនិងប្រជាពលរដ្ឋខេត្តក្រចេះ បានជួបជុំគ្នា ប្រារព្ធពិធីរំលឹកខួបអនុស្សាវរីយ៍ ៣៨ឆ្នាំ នៃថ្ងៃកំណើតរណសិរ្សសាមគ្គីសង្រ្គោះជាតិ ដែលបច្ចុប្បន្នត្រូវបានប្តូរឈ្មោះថា «រណសិរ្សសាមគ្គីអភិវឌ្ឍន៍មាតុភូមិកម្ពុជា»។
ពិធីរំលឹកខួបអនុស្សាវរីយ៍បានរៀបចំធ្វើឡើង នៅចំណុចស្តោប2ធ្នូ ស្ថិតនៅភូមិ2ធ្នូ ឃុំ2ធ្នូ ស្រុកស្នួល ខេត្តក្រចេះក្រោមអធីបតីភាព ឯកឧត្តម ពេជ្យ ប៊ុនធិន រដ្ឋមន្ដ្រីមុខងារសាធារណៈនិងឯកឧត្តម សរ ចំរ៉ុង អភិបាលខេត្តក្រចេះនិងមន្ត្រីគណបក្សប្រជាជនកម្ពុជា កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋក្នុងខេត្តក្រចេះ សរុប ប្រមាណចំនួន1500នាក់ចូលរួម។
ឯកឧត្តម ពេជ្យ ប៊ុនធិន ថ្លែងទៅកាន់អង្គពិធីថា ថ្ងៃ 2 ធ្នូ ឆ្នាំ1978 ជាថ្ងៃដែលឥស្សរជន និងអ្នកស្នេហាជាតិរបស់កម្ពុជាជាច្រើនរូប ដែលដឹកនាំដោយសម្តេច ហេង សំរិន សម្តេច ជា ស៊ីម និង សម្តេច តេជោ ហ៊ុន សែន ក្រោមការជួយជ្រោមជ្រែងពីក្រោយដោយកងទ័ពវៀតណាម បានម្រមូលផ្តុំគ្នានៅក្នុងស្រុកស្នួល ខេត្តក្រចេះ ដើម្បីធ្វើចលនាតស៊ូវាយផ្តួលរំលំរបប វាលពិឃាតកម្ពុជា ប្រជាធិបតេយ្យរបស់ បនប្រល័យពូជសាសន៍ ប៉ុល ពត ទទួលបានជោគជ័យនៅថ្ងៃ ៧មករា ឆ្នាំ១៩៧៩ រំដោះប្រជាពលរដ្ឋ និងកសាងមាតុភូមិឡើងវិញ។
