ភ្នំពេញ ៖ បន្ទាប់ពីព្រះមហាក្សត្រ ព្រះរាជទានការលើកលែងទោស លោក កឹម សុខា ប្រធានស្តីទីគណបក្សសង្គ្រោះជាតិ បានសរសេរលិខិតថ្លែងអំណរគុណជូនសម្តេច ហ៊ុន សែន នាយករដ្ឋមន្ត្រី ដែលបានស្នើព្រះមហាក្សត្រ លើកលែងទោសដល់រូបលោក។
នៅថ្ងៃទី០២ ខែធ្នូ ឆ្នាំ២០១៦នេះ ព្រះមហាក្សត្រ បានចេញព្រះរាជក្រឹត្យ លើកលែងទោស លោកកឹម សុខា ប្រធានស្តីទីគណបក្សសង្គ្រោះជាតិ ដែលត្រូវបានតុលាការសម្រេចផ្តន្ទាទោស ដាក់ពន្ធនាគារពីបទបដិសេធក្នុងការចូលខ្លួន បន្ទាប់ពីមានសំណើរបស់សម្តេចនាយករដ្ឋមន្ត្រី ហ៊ុន សែន នៅថ្ងៃទី០២ ខែធ្នូ នេះ។
យោងតាមព្រះរាជក្រឹត្យរបស់ព្រះមហាក្សត្រ បានឲ្យដឹងថា ត្រាស់បង្គាប់លើកលែងទោសឲ្យទណ្ឌិត កឹម សុខា ភេទប្រុស អាយុ៦៣ឆ្នាំ ដែលត្រូវបានតុលាការ សម្រេចផ្តន្ទាទោសដាក់ពន្ធនាគារ ពីបទបដិសេធមិនចូលខ្លួន តាមអំណាចសាលដីកាព្រហ្មទណ្ឌលេខ ១៣០ “ក្រI.សវ” ចុះថ្ងៃទី០៤ ខែវិច្ឆិកា ឆ្នាំ២០១៦ របស់សាលាឧទ្ធរណ៍ ដោយនៅក្នុងព្រះរាជក្រឹត្យបានបញ្ជាក់ថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្តឲ្យបានសម្រេចតាមព្រះរាជក្រឹត្យនេះ។
កាលពីថ្ងៃទី០៩ ខែកញ្ញា ឆ្នាំ២០១៦ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសលោកកឹម សុខា រយៈពេល៥ខែ និងពិន័យជាប្រាក់៨សែនរៀល ពាក់ព័ន្ធការបដិសេធមិនចូលខ្លួននិងបើកផ្លូវប្តឹងឧទ្ធរណ៍។
លោកកឹម សុខា មិនបានចូលខ្លួនឆ្លើយបំភ្លឺចំនួនពីរលើក ដោយលើកទី១ កាលពីថ្ងៃទី១៧ ខែឧសភា ពាក់ព័ន្ធអំពើពេស្យាចារ និងលើកទី២ នៅថ្ងៃទី២៦ ខែឧសភា ពាក់ព័ន្ធអំពើសញ្ចរកម្ម។
គេពុំទាន់ដឹងថាលោក កឹម សុខា នឹងចេញពីស្នាក់ការគណបក្ស ទៅជួបសកម្មជននៅមូលដ្ឋាន ក្រោយពីមានការលើកលែងទោស រឺយ៉ាងណានៅឡើយ៕
