ខេត្តកំពង់ធំ៖ នៅរសៀលថ្ងៃទី១ ខែធ្នូ ឆ្នាំ២០១៦ ជនសង្ស័យ៣នាក់ ដែលបាននាំគ្នាចូលទៅអារឈើខុសច្បាប់ នៅក្នុងតំបន់ដែនជម្រកសត្វព្រៃ ព្រៃឡង់ ត្រូវបានកម្លាំងមន្ត្រីបរិស្ថានប្រចាំការនៅទីនោះ ឃាត់ខ្លួន ពាក់ព័ន្ធលួចអារឈើក្នុងតំបន់ដែនជម្រកសត្វព្រៃនៅព្រៃឡង់ ត្រូវបានបញ្ជូនទៅតុលាការ ។
ប្រធានមន្ទីបរិស្ថានខេត្តកំពង់ធំ បានប្រាប់នៅព្រឹកថ្ងៃទី០១ ខែធ្នូ ឆ្នាំ២០១៦ នេះថា៖ ជនសង្ស័យ៣នាក់ ដែលបាននាំគ្នាចូលទៅអារឈើខុសច្បាប់នៅក្នុងតំបន់ដែនជម្រកសត្វព្រៃ ព្រៃឡង់ ហើយ ត្រូវបានកម្លាំងរបស់លោកឃាត់ខ្លួន កំពុងតែធ្វើសកម្មភាពអារឈើ កាលពីវេលាម៉ោង៣:១៥នាទីរសៀលថ្ងៃទី៣០ ខែវិច្ឆិកា ឆ្នាំ២០១៦ នៅក្នុងតំបន់ពោធិរោងចំនុចវាលត្រពាំងជ្រៃ ឃុំមានរិទ្ធ ស្រុកសណ្តាន់ នោះ មានឈ្មោះ ទី១.ឈ្មោះ ស៊ិត មុំ ភេទប្រុសអាយុ៣២ឆ្នាំ រស់នៅភូមិកុំពោតឈូក ឃុំខ្លែង ស្រុកសណ្តាន់ ទី២.ឈ្មោះ ប៉ោក ឌួង ភេទប្រុសអាយុ២៤ឆ្នាំ រស់នៅភូមិទំអរ ឃុំទំរីង ស្រុកសណ្តាន់ និង ទី៣ឈ្មោះ ទុយ តឿ ភេទប្រុសអាយុ៣២ឆ្នាំរស់នៅភូមិសំឱង ឃុំមានរិទ្ធ ស្រុកសណ្តាន់ រួមជាមួយ នូវវត្ថុតាងរួមមានម៉ាស៊ីនត្រង់ស៊ីន័រចំនួន៤គ្រឿង ដងឡាម៤ និងច្រវ៉ាក់៤ខ្សែរ ។
លោក កក្កដាបានប្រាប់ឲ្យដឹងថា៖ នៅចំពោះមុខសមត្ថកិច្ចជនសង្ស័យ២នាក់ទី១.ឈ្មោះ ស៊ិត មុំ និងទី២.ឈ្មោះ ប៉ោក ឌួង បានសារភាពថា ពួកគេគ្រាន់តែជាអ្នកស៊ីឈ្នួលអារឈើឲ្យលោកថៅកែម្នាក់ ឈ្មោះ តាំង ភេទប្រុស រស់នៅភូមិទំអរ ឃុំទំរីង ស្រុកសណ្តាន់ ឲ្យម៉ាស៊ីនត្រង់ស៊ីន័រ២គ្រឿង ចូលទៅអារឈើក្នុងតំបន់ព្រៃឡង់ ដោយឲ្យឈ្នួលក្នុង១ម៉ែត្រគូបថ្លៃ៧ម៉ឺនរៀល កំពុងតែអារឈើបានមួយសន្ទុះធំ ក៏ត្រូវសមត្ថកិច្ចចាប់ខ្លួនបានតែម្តង ចំណែកជនសង្ស័យម្នាក់ទៀតឈ្មោះ ទុយ តឿ បានសារភាពថា ខ្លួនគឺជាអ្នកប្រកបរបរដងជ័រដើម្បីចិញ្ចឹមជីវិត នៅពេលដើរដងជ័រ បានប្រទះឃើញដើមឈើតាត្រាវ ដែលដួលកប់នៅក្នុងដីជាយូរឆ្នាំមកហើយនោះ ក៏បានទៅខ្ចីរណារ យន្តពីបង មកអារឈើតាត្រាវដែលដួលនោះ ក្នុងគោលបំណងយកមកធ្វើជាក្តាមឈូស ទុកសម្រាប់លោកយាយចាស់ជរា ទើបតែអារបានបន្តិច ក៏ត្រូវឃាត់បញ្ជូនមកកាន់មន្ទីរបរិស្ថានខេត្ត។
លោក តុប កក្កដា បញ្ជាក់ថា៖ ចំពោះច្បាប់កុំថាឡើយកំពុងតែធ្វើសកម្មភាពអារឈើ នៅក្នុងតំបន់ដែន ជម្រកសត្វព្រៃព្រៃឡង់នោះ សម្បីតែការប្រើប្រាស់ម៉ាស៊ីនត្រង់ស៊ីន័រគ្មានច្បាប់អនុញ្ញាតិ ក៏ខុសច្បាប់ដែរ ហេតុដូច្នេះហើយ អ្នកទាំង៣នាក់ ខាងជំនាញរបស់លោកនឹងកសាងសំនុំរឿង ដើម្បីបញ្ជូនជនសង្ស័យទៅកាន់សាលាតំបូងខេត្តកំពង់ធំ នៅរសៀលថ្ងៃទី០១ ខែធ្នូ ឆ្នាំ២០១៦នេះ ដើម្បីចាត់ការតាមនិតិវិធីច្បាប់៕
