រាជធានីភ្នំពេញ ៖ធ្លាយរឿងពុករលួយរបស់ នាយខណ្ឌរដ្ឋបាលព្រៃឈើភ្នំពេញ លោក ច័ន្ទថេត ថានរៈ ដែលត្រូវបានជនអនាមិក ប្តឹងទៅកាន់អង្គភាពប្រឆាំងអំពើពុករលួយ (ACU) នាពេលថ្មីៗនេះដោយចោទប្រកាន់ថា មានភាពមិនប្រក្រតីក្នុងការអនុវត្តតួនាទីចំនួន៤ករណី ដែលក្នុងនោះក៏មានករណីកាងឡានដឹកឈើអត់ច្បាប់ថែមទៀត ។
តាមការផ្សព្វផ្សាយរបស់ ACU លោក ច័ន្ទថេត ថានរៈ ត្រូវបានគេប្តឹងចំនួន៤ករណី ក្នុងនោះរួមមាន៖ទី១/ ដកប្រាក់អប្បហារ ដែលជាប្រាក់រង្វាន់រាប់ពាន់លានរៀល ដោយមិនបានបែងចែកឲ្យមន្ត្រីថ្នាក់ក្រោមឡើយ ទី២/យកកម្រៃសេវាសាធារណៈពីការអនុញ្ញាតច្បាប់សិប្បកម្ម និងដេប៉ូឈើក្នុងមួយទីតាំងចំនួន២៥០០ដុល្លារ លើសពីការកំណត់របស់ក្រសួងសេដ្ឋកិច្ចនិងហិញ្ញវត្ថុ ដែលតម្រូវឲ្យយកតែ១លានរៀលតែប៉ុណ្ណោះ ទី៣/ កាងឡានដឹកឈើអត់ច្បាប់ របស់សិប្បកម្មឈើ និងដេប៉ូឈើអត់ច្បាប់ មិនឲ្យអ្នកណាម្នាក់ទៅសាកសួរឡើយ និងទី៤/ មិនបានបែងចែកភារកិច្ចឲ្យមន្ត្រីថ្នាក់ក្រោមជាដើម ។
រាជធានីភ្នំពេញទោះបីជាពុំមានព្រៃឈើក៏ដោយ តែជាកន្លែងទទួលនិងចែកចាយឈើដ៏ធំ បង្កប់ទៅដោយអំពើពុករលួយយ៉ាងស្ងៀមស្ងាត់ ហើយ ករណីលោកមេព្រៃរូបនោះកាងរថយន្តដឹកឈើល្មើសច្បាប់ គឺល្បីយូរយាណាស់មកហើយ ប៉ុន្តែដោយសារតែល្បិចកលខ្ពស់ ធ្វើឲ្យភាពមិនប្រក្រតីនិងអំពើពុករលួយត្រូវបានបិទបាំងជិតឈឹង ហើយត្រូវបានទម្លាយនៅពេលនេះ សង្ស័យចែកផលប្រយោជ៏នមិនស្មើ ទើបត្រូវបែកការណ៏៕
