ភ្នំពេញ ៖ហេតុការណ៍គួរឲ្យហួសចិត្តមួយបានកើតឡើងកាលពីវេលាម៉ោង12ថ្ងៃត្រង់ថ្ងៃទី22 ខែវិច្ឆិកា ឆ្នាំ2016 នៅចំណុចផ្ទះជួលផ្លូវលំ ក្នុងទឹកដីខណ្ឌចំការមន បុរសម្នាក់បានរងរបួសខ្នងដេរ១៥ថ្នេរ ដោយសារប្រពន្ធកាប់មួយកាំបិតបុ័ងតោ ខណះខឹងប្តីមិនឲ្យឆាតហ្វេសប៊ុកលេងជាមួយប្រុសៗ ហើយមិនត្រឹមតែប៉ុណ្ណោះ ប្រពន្ធចិត្តខ្លាំងបានសុំចែកទ្រព្យសម្បត្តិគ្នា និងចែកផ្លូវគ្នាទៀតផង ។
ជនរងគ្រោះឈ្មោះ ជា ដារ៉ា ភេទប្រុស អាយុ២៥ឆ្នាំ ជនជាតិខ្មែរ មុខរបររត់កង់បី មានទីលំនៅផ្ទះលេខ30 ផ្លូវជាតិលេខ05 ក្រុម14ភូមិផ្សារតូច សង្កាត់ទួលសង្កែ ខណ្ឌឬស្សីកែវ ។ ស្ត្រីចិត្តខ្លាំងមានឈ្មោះ ស៊ិន សុភា ភេទស្រីអាយុ២១ឆ្នាំ ជនជាតិខ្មែរ មុខរបរនៅផ្ទះ មានទីលំនៅផ្ទះលេខ068 ក្រុម07 ភូមិទួលសង្កែ សង្កាត់ទួលសង្កែ ខណ្ឌឬស្សីកែវ ។
ប្រភពព័ត៌មានពីជនរងគ្រោះ បានឲ្យដឹងថា មុនកើតហេតុជនរងគ្រោះ កំពុងរត់កង់បី ស្រាប់តែប្រពន្ធតេហៅឲ្យទៅផ្ទះ លុះមកដល់ចំណុចកើតហេតុខាងលើ ជនរងគ្រោះបានទាញដៃប្រពន្ធឲ្យមកនិយាយខាងក្រៅ តែប្រពន្ធមិនចេញ ហើយជនរងគ្រោះបានដើរចេញ ស្រាប់តែប្រពន្ធទាញកំបិតតាំងតោ មកកាប់ពីក្រោយខ្នងជនរងគ្រោះបណ្តាលឲ្យរបួសហូរឈាម។
ក្រោយពេលកើតហេតុ អ្នកទាំង២បានមកធ្វើលិខិតព្រមព្រៀងលែងលះគ្នា និងប្រគល់ទ្រព្យសម្បត្តិទៅឲ្យជនបង្ក ដូចជាកងដៃ ខ្សែដៃ ហើយនិងសំភារៈមួយចំនួន នៅប៉ុស្តិ៍នគរបាលទួលសង្កែ៕
