បាត់ដំបង៖ ករណីសន្តិសុខថៃនៅផ្សារបានឡែម ប្រើហិង្សាវាយ កម្មករខ្មែរចំនួន៣នាក់ បណ្តាលឲ្យរងរបួស កាលពីចុងសប្តាហ៍កន្លងទៅ អាជ្ញាធរកម្ពុជាបានចាត់វិធានការហើយ ដោយទាមទារឲ្យថៃត្រូវរកដំណោះស្រាយក្នុងរឿងនេះ។
លោក គឹម ពន្លង អធិការស្រុកកំរៀងខេត្តបាត់ដំបង បានថ្លែងប្រាប់បណ្តាញព័តមានក្នុងស្រុកថា ដោយមានបញ្ជា ពីលោកស្នងការខេត្ត ខាងអធិការស្រុកបានធ្វើការប្រជុំរកដំណោះស្រាយមួយ ជាមួយភាគីថៃកាលពីថ្ងៃសៅរ៍ ហើយលោកបានស្នើឲ្យភាគីថៃ ត្រូវដោះស្រាយសំណងជូនជនរងគ្រោះ និងចាប់ជនប្រព្រឹត្តមកទទួលខុសត្រូវចំពោះមុខច្បាប់។
គួររំលឹកថា កាលពីរសៀលថ្ងៃទី១៨ ខែវិច្ឆិកា កន្លងទៅ កម្មករខ្មែរចំនួន៣នាក់ ត្រូវបានសន្តិសុខ នៃផ្សារបានឡែម ដែលមានទីតាំងស្ថិតនៅភូមិបានឡែម ឃុំទេពនិមិត្ត ស្រុកប៉ូងណាមរ៉ន ខេត្តច័ន្ទបុរី ជាប់ព្រុំប្រទល់ស្រុកកំរៀង វាយបណ្តាលឲ្យរងរបួសធ្ងន់ធ្ងរ ហើយត្រូវបានដឹកយកមកព្យាបាល នៅមណ្ឌលសុខភាពស្រុកកំរៀង ក្នុងទឹកដីកម្ពុជា។
តាមរបាយការណ៍ ក្រុមសន្តិសុខថៃទាំងនោះ បានប្រើដំបងព្រួតវាយសំពងមកលើពលករខ្មែរ ក្រោយពីពួកគេប៉ះទង្គិចពាក្យសម្តីគ្នា ខណៈពលករខ្មែរ ឡូឡាក្បែរតូបលក់ដូរមួយកន្លែងក្នុងផ្សារថៃ៕
