ភ្នំពេញ៖អ្នកបឹងកក់ និងអ្នកបុរីកីឡា ប្រមាណ៣០នាក់ប្រមូលផ្ដុំគ្នាធ្វើយុទ្ធនាការ ថ្ងៃច័ន្ទពណ៌ខ្មៅសាជាថ្មី នៅសហគមន៍បឹងកក់ ក្នុងគោលបំណងទាមទារឲ្យតុលាការដោះលែង សកម្មជនដីធ្លី មន្ត្រីការពារសិទ្ធិមនុស្ស និងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ទោះបីជាពន្លឺយុត្តិធម៌សម្រាប់អ្នកជាប់ឃុំ នៅមិនទាន់លេចចេញយ៉ាងណាក្ដី ហើយពួកគេប្ដេជ្ញាថានឹងធ្វើយុទ្ធនាការនេះរៀងរាល់សប្ដាហ៍។
ការប្រកាសជំហរ ធ្វើយុទ្ធនាការថ្ងៃច័ន្ទពណ៌ខ្មៅ សាជាថ្មីដោយអ្នកបឹងកក់នៅថ្ងៃទី ៣១ខែតុលា បន្ទាប់ពីពួកគេខកខាន មិនបានធ្វើយុទ្ធនាការនេះអស់ពីរសប្ដាហ៍ ដោយសារអ្នកបឹងកក់មួយចំនួន ត្រូវតុលាការកោះហៅទៅសាកសួរ ក្នុងនាមជាដើមបណ្ដឹង ពីរឿងហិង្សាក្បែរវត្តភ្នំ បង្កដោយសមត្ថកិច្ចចម្រុះកាលពីឆ្នាំ២០១៣។
គិតមកដល់ពេលនេះ តំណាងសហគមន៍បឹងកក់ អ្នកស្រី ទេព វន្នី ត្រូវបានតុលាការចោទប្រកាន់ និងឃុំខ្លួនក្នុងពន្ធនាគារអស់៧៦ថ្ងៃ ចំណែកមន្ត្រីអាដហុក៤រូប រួមទាំងមន្ត្រី១រូបត្រូវតុលាការ ឃុំខ្លួនបណ្ដោះអាសន្នអស់២៦សប្ដាហ៍។
យុទ្ធនាការថ្ងៃច័ន្ទពណ៌ខ្មៅនៅសប្ដាហ៍ទី២៦ នេះ គឺសហគមន៍មានទំនាស់ដីធ្លីនៅសហគមន៍បុរីកីឡា និងសហគមន៍បឹងកក់ នឹងប្រារព្ធពិធី ដោយមានរូបភាពខុសគ្នាកាលពីសប្ដាហ៍មុនៗ ពួកគេរៀបចំធ្វើនៅសហគមន៍របស់ពួកគេរៀងៗខ្លួន ដើម្បីទាមទារឲ្យតុលាការ ដោះលែងមន្ត្រីសិទ្ធិមនុស្ស មន្ត្រី គ.ជ.ប និងទម្លាក់ចោលបទចោទប្រឆាំងសកម្មជនបឹងកក់ ព្រមទាំងរកយុត្តិធម៌ជូនបណ្ឌិត កែម ឡី។
យុទ្ធនាការ «ថ្ងៃច័ន្ទពណ៌ខ្មៅ» ផ្ដួចផ្ដើមឡើង ដោយក្រុមអង្គការសង្គមស៊ីវិល និងសកម្មជនដីធ្លី ដោយយកថ្ងៃច័ន្ទ ជាថ្ងៃធ្វើយុទ្ធនាការស្លៀកពាក់ពណ៌ខ្មៅ។ ថ្ងៃច័ន្ទតំណាងឲ្យថ្ងៃ ដែលសកម្មជនអង្គការអាដហុក ៤រូប មានអ្នកស្រី លឹម មុន្នី លោក ណៃ វ៉ង់ដា លោក យី សុខសាន្ដ លោក នី សុខា និងអគ្គលេខាធិការរងរបស់ គ.ជ.ប លោក នី ចរិយា ត្រូវបានតុលាការ ចាប់បញ្ជូនទៅឃុំខ្លួននៅពន្ធនាគារ ពីបទសូកប៉ាន់សាក្សី ទាក់ទងនឹងរឿងអាស្រូវស្នេហារវាងអ្នកនាង ខុម ចាន់តារាទី ហៅ ស្រីមុំ ជាមួយលោក កឹម សុខា ហើយពណ៌ខ្មៅ តំណាងឲ្យសញ្ញាប្រកាសអាសន្ននៃ ការរំលោភសិទ្ធិមនុស្សក្នុងប្រទេសកម្ពុជា។
ជារឿយៗ អាជ្ញាធរចាប់ខ្លួនអ្នកចូលរួមយុទ្ធនាការថ្ងៃច័ន្ទពណ៌ខ្មៅ ដោយព្រមានមិនឲ្យចូលរួមសកម្មភាពនេះទៀត។
ក្រុមប្រជាពលរដ្ឋមានទំនាស់ដីធ្លីនៅភ្នំពេញ ប្រកាសថា ពួកគាត់នឹងនៅតែបន្តតវ៉ា ប្រសិនបើអាជ្ញាធរនៅតែមិនដោះស្រាយបញ្ហាដែលពួកគាត់កំពុងទាមទារទេនោះ៕
