ភ្នំពេញ៖ លោកថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ ក្នុងពិធីប្រកាស ការប្រឡងប្រណាំង «ទីក្រុងទេសចរណ៍ស្អាតអាស៊ានលើកទី១» និងការប្រឡងប្រណាំង «ទីក្រុងស្អាតថ្នាក់ជាតិលើកទី២ (២០១៨-២០២១)» នៅថ្ងៃទី២៧ ខែតុលាថានឹងមានគម្រោងបិទផ្លូវតាមមាត់ទន្លេ មិនឲ្យយានយន្តធ្វើដំណើរឆ្លងកាត់ ដោយ ធ្វើឡើងតែនៅថ្ងៃសៅរ៍-អាទិត្យប៉ុណ្ណោះ។
លោករដ្ឋមន្ត្រីបានបន្តថា ក្រសួងទេសចរណ៍បានស្នើឲ្យសាលារាជធានីភ្នំពេញ យកចិត្តទុកដាក់លើការរៀបចំ ផ្លូវថ្មើរជើងនេះ ឲ្យបានឆាប់រហ័សបំផុត។ ទន្ទឹមនឹងនេះ ក៏ត្រូវមានការគិតគូរពីបញ្ហាបង្គន់អនាម័យ កន្លែងផ្ញើយានយន្ត រួមនឹងការរៀបចំ ដាក់ឆ័ត្រសម្រាប់ឲ្យភ្ញៀវទេសចរជ្រកម្លប់ និងបរិភោគអាហារផ្សេងៗ។ ការរៀបចំទាំងនេះ តម្រូវឲ្យរៀបចំដាក់ចាប់ពី ព្រឹកថ្ងៃសៅរ៍ និងត្រូវឲ្យដកវិញនៅយប់ថ្ងៃអាទិត្យ។
ឆាប់ៗនេះ សាលាក្រុង នឹងបិទផ្លូវតាមមាត់ទន្លេពីចំណុចវត្តភ្នំ រហូតដល់មុខព្រះបរមរាជវាំង មិនឲ្យយានយន្តធ្វើដំណើរឆ្លងកាត់ ដើម្បីទុកឲ្យភ្ញៀវទេសចរជាតិ-អន្តរជាតិ ធ្វើដំណើរកម្សាន្តដោយថ្មើរជើង តាមគម្រោងស្នើសុំពីក្រសួងទេសចរណ៍។
ចំពោះគម្រោងនេះ បើសំរេចបាននិងទទួលជោគជ័យ លើវិស័យទេសចរណ៏ តែក៏អាចធ្វើឲ្យស្ទះចរាចណ៏កាន់តែខ្លាំង នៅលើកំណាត់ផ្លូវនរោត្តមជាដើម៕
