ភ្នំពេញ: តុលាការក្រុងភ្នំពេញ នឹងប្រកាសសាលក្រមផ្តន្ទាទោសលោកស្រី ថាក់ ឡានី អតីតសមាជិកព្រឹទ្ធសភា គណបក្សសម រង្ស៊ី ដែលបានចោទប្រកាន់លើ សម្តេចតេជោ ហ៊ុន សែន នាយករដ្ឋមន្ត្រី ថាបានសម្លាប់លោកបណ្ឌិត កែម ឡី នៅថ្ងៃទី០២ ខែវិច្ឆិកា ឆ្នាំ២០១៦ ខាងមុខនេះ។
សូមបញ្ជាក់ថា សាលាដំបូងរាជធានីភ្នំពេញ នៅរសៀលថ្ងៃទី២៨ ខែតុលា ឆ្នាំ២០១៦នេះ បានបើកសវនាការជំនុំជម្រះលើសំណុំរឿង អតីតសមាជិកព្រឹទ្ធសភាគណបក្ស សម រង្ស៊ី លោកស្រី ថាក់ ឡានី ដែលបានធ្វើការចោទប្រកាន់ត្រង់ៗ លើសម្តេច ហ៊ុន សែន ក្នុងការសម្លាប់ លោក កែម ឡី ។
លោកស្រី ថាក់ ឡានី ត្រូវបានសមាជិកព្រឹទ្ធសភា សម្រេចបោះឆ្នោតដកអភ័យឯកសិទ្ធិ កាលពីថ្ងៃទី៣១ ខែសីហា ឆ្នាំ២០១៦ ដើម្បីឱ្យតុលាការបន្តនីតិវិធីរបស់ខ្លួន ដោយគ្មានការរាំងស្ទះ ។
បន្ទាប់មក អយ្យការអមសាលាដំបូងរាជធានីភ្នំពេញ បានសម្រេចបញ្ជូនសំណុំរឿង លោកស្រី ថាក់ ឡានី ទៅជំនុំជម្រះដោយចោទប្រកាន់ពីបទ បរិហាកេរ្តិ៍ជាសាធារណៈ និងបទញុះញង់ ឲ្យប្រព្រឹត្តអំពើបង្កឲ្យមានភាពវិកវរធ្ងន់ធ្ងរ ដល់សន្តិសុខសង្គម។
លោកគី តិច មេធាវីតំណាងឲ្យ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី បានដាក់ពាក្យបណ្តឹងប្តឹងលោកសម រង្ស៊ី ប្រធានគណបក្សសង្គ្រោះជាតិ និងលោកស្រី ថាក់ ឡានី សមាជិកព្រឹទ្ធសភា របស់គណបក្សសម រង្ស៊ី ទៅតុលាការ កាលពីថ្ងៃទី១ ខែសីហា ឆ្នាំ២០១៦។ ការប្តឹងនេះ គឺបន្ទាប់ពីលោកសម រង្ស៊ី បានចោទប្រកាន់ ទៅលើរាជរដ្ឋាភិបាលថា ជាអ្នករៀបចំផែនការ បាញ់សម្លាប់លោក កែម ឡី និងលោកស្រី ថាក់ ឡានី បានចោទសម្តេចតេជោ ហ៊ុន សែន ថា ជាអ្នកសម្លាប់លោកកែម ឡី។
ចំពោះបណ្តឹងប្តឹង លោកសម រង្ស៊ី គឺដោយសារ បានបង្ហោះសារ នៅលើផេកហ្វេសប៊ុក របស់គាត់ថា ការស្លាប់របស់លោក កែម ឡី គឺជាអំពើភេរវកម្មមួយ ដែលរៀបចំដោយរដ្ឋអំណាច។ ហើយចំពោះបទចោទ គឺលោកមិនបានដាក់ បទចោទទេ គឺជាសិទ្ធិ និងសមត្ថកិច្ចរបស់ព្រះរាជអាជ្ញា នៅពេលដែល ពិនិត្យឃើញថា បទល្មើសនោះ ផ្ទុយពីមាត្រាណា ច្បាប់ណា នឹងធ្វើការចោទប្រកាន់។
លោកបានបញ្ជាក់ថា សម្តេចតេជោ ហ៊ុន សែន បានឲ្យលោកទាមទារ សំណងតែ ១០០ រៀលទេ ក្នុងបណ្តឹងមួយទាមទារតែ ១០០រៀល ចំពោះជំងឺចិត្តគឺទាមទារ ១០០រៀល ដូចគ្នា។ សំខាន់សម្តេច បានមានប្រសាសន៍ថា ចង់បានភាពស្អាតស្អំ និងចង់បានកិត្តិយសដែលលោកស្រី ថាក់ ឡានី និងលោកសម រង្ស៊ី បានបំផ្លើសការពិត ធ្វើឲ្បប៉ះពាល់ដល់កិត្តិយស របស់សម្តេច ក៏ដូចជា កិត្តិយសរបស់រាជរដ្ឋាភិបាល ហើយសម្តេច សូមឲ្យអនុវត្តតាមច្បាប់។
ចំណែកមតិជាតិនិងអន្តរជាតិ ចង់ឃើញអ្នកនយោបាយខ្មែរ វិលមករកតុចចារវិញ៕
