កំពង់ចាម៖ ក្មេងស្រីអាយុ១២ឆ្នាំម្នាក់ បានរួមដំណើរជាមួយឪពុករបស់ខ្លួន ទៅរាយមង តែគ្រោះអកុសលជួបនឹងព្យុះភ្លៀងបក់បោក បណ្ដាលឲ្យលេចទូក បុរសជាឪពុកត្រូវបានលង់ទឹកស្លាប់បាត់បង់ជីវិត ចំណែកកូនស្រីអោបប៊ីដុងហែលទឹក ទៅរកគេឲ្យជួយសង្គ្រោះជីវិត ដែលហេតុការណ៍នេះបានកើតមានឡើង កាលពីវេលាម៉ោង៣និង៥៥នាទីល្ងាច ថ្ងៃទី២៦ តុលា ២០១៦ នៅចំណុចបឹងស្យា ស្ថិតក្នុងភូមិសាស្ត្រឃុំព្រែករំដេង ស្រុកស្រីសន្ធរ ខេត្តកំពង់ចាម។
សមត្ថកិច្ចបានឲ្យដឹងថា ជនរងគ្រោះឈ្មោះ មុត ប៊ន់ ភេទប្រុស អាយុ៥៤ឆ្នាំ ត្រូវជាឪពុក និងកូនស្រីឈ្មោះ ប៊ន់ ស្រីនិច្ច អាយុ១២ឆ្នាំ មានទីលំនៅភូមិស្យាបឹងវែង ឃុំបារាយណ៍ ស្រុកស្រីសន្ធរ បានជិះទូកទៅរាយមងជាមួយគ្នា នៅចំណុចកើតហេតុ ហើយក៏ត្រូវបានភ្លៀងខ្យល់បក់បោកមក បណ្តាលឲ្យលេចទូក ហើយបុរសជាឪពុកក៏បានបាត់ខ្លួនក្នុងទឹកបឹង ចំណែកកូនស្រីបានហែលទឹក រកគេជួយ ដោយមានប៊ីដុងមួយជាប់នឹងខ្លួន។
ហើយភ្លាមៗនោះ ក៏មានប្រជាពលរដ្ឋម្នាក់ ដែលកំពុងតែអុំទូកនៅក្បែរកន្លែងកើតហេតុ ក៏បានមកជួយស្រង់នាងចេញពីទឹក បានទាន់ពេលវេលារួចក៏នាំនាងទៅផ្ទះ។
កម្លាំងនគរបាលប៉ុស្តិ៍បារាយណ៍ រួមជាមួយប្រជាពលរដ្ឋបានបន្តស្វែងរក រហូតដល់ម៉ោង៧និង៥៥នាទីព្រឹក ថ្ងៃទី២៧ តុលា ទើបបានរកឃើញ សាកសពជនរងគ្រោះនៅចំណុចបឹងអន្លង់តាអ៊ាង ក្រោយភូមិព្រែកឪជ្រឹង(ក) ឃុំព្រែករំដេង ស្រុកស្រីសន្ធរ។
បច្ចុប្បន្ន សាកសពជនរងគ្រោះត្រូវបានសមត្ថកិច្ចប្រគល់ ឲ្យក្រុមគ្រួសារយកទៅធ្វើបុណ្យតាមប្រពៃណី ៕
