កំពង់ចាម៖ ផ្ទះរបស់ប្រជាពលរដ្ឋ ដែលសាងសង់ឡើងអំពីឈើប្រក់គ្បឿងមួយខ្នង ត្រូវបានភ្លើងឆាបឆេះអស់ទាំងស្រុង បង្កឡើងពីភ្លើងចង្ក្រានដាំបាយមិនពន្លត់ នេះបើតាមការឲ្យដឹងពីសមត្ថកិច្ច ។
អគ្គីភ័យនេះបានកើតឡើងកាលពីវេលាម៉ោង១១:៣០នាទីព្រឹក ថ្ងៃទី២៧ តុលា ២០១៦ ស្ថិតក្នុងភូមិព្រែកព្រះអង្គ ឃុំព្រែកបាក់ ស្រុកស្ទឹងត្រង់ ខេត្តកំពង់ចាម ។
ប្រភពពីសមត្ថកិច្ចបានឲ្យដឹងថា ម្ចាស់ផ្ទះដែលត្រូវរងគ្រោះ ដោយអគ្គីភ័យឆាបឆេះខាងលើមានឈ្មោះ វុន វឿន អាយុ៣៩ឆ្នាំ ដែលមានប្រពន្ធឈ្មោះ វ៉ា អាយុ៣៧ឆ្នាំ ដោយផ្ទះមានទំហំ៧ម៉ែត្រ គុណ១២ម៉ែត្រ សាងសង់ឡើងអំពីឈើប្រក់គ្បឿង ។
ប្រភពដដែលឲ្យដឹងទៀតថា៖ មូលហេតុដែលបណ្ដាលឲ្យមានអគ្គីភ័យឆាបឆេះនេះ គឺត្រូវបានសមត្ថកិច្ចអះអាងថា មកពីការដាំបាយហើយភ្លេចពន្លត់ភ្លើងចង្ក្រានបាយ ទោះជាយ៉ាងណា គ្រោះអគ្គីភ័យនេះ មិនបណ្ដាលឲ្យបាត់បង់ទ្រព្យសម្បត្តិនោះទេ ព្រោះជាផ្ទះទើបសាងសង់ថ្មីៗ ហើយក៏គ្មានមនុស្សណាម្នាក់ រងគ្រោះថ្នាក់ដល់អាយុជីវិតនោះទេ ។
សមត្ថកិច្ចបានប្រើប្រាស់រថយន្តពន្លត់អគ្គីភ័យ របស់អធិការដ្ឋាននគរបាលស្រុកស្ទឹងត្រង់ ទៅជួយអន្តរាគមន៍បាញ់ទឹកពន្លត់ ដើម្បីទប់ស្កាត់មិនឲ្យភ្លើងឆេះ រាលដាលដល់លំនៅឋានប្រជាពលរដ្ឋផ្សេងទៀត ដែលមានការចូលរួមជួយពីប្រជាពលរដ្ឋផងដែរ ៕
