រាជធានីភ្នំពេញ ៖ យោងតាមមន្ត្រីអ្នកនាំពាក្យក្រសួងការបរទេសកម្ពុជាបានឲ្យដឹងថា លោក Daniel Russel ឧបការីរដ្ឋមន្ត្រីការបរទេសអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក បានទទូចឲ្យ គណបក្សសង្គ្រោះជាតិ វិលចូលរួមប្រជុំនៅក្នុងសភាវិញ ដើម្បីបន្តការចរចានយោបាយជាមួយ គណបក្សកាន់អំណាច ដោយលោកថា ការធ្វើដូច្នេះ បានស្ថានការណ៍នយោបាយនៅកម្ពុជា នឹងមានភាពល្អប្រសើរឡើងវិញ។
ការថ្លែងបែបនេះរបស់លោក Daniel Russel បានធ្វើឡើងក្នុងពេលជួបពិភាក្សាការងារ ជាមួយទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា និងកិច្ចសហការអន្តរជាតិ នៅថ្ងៃទី២៧ ខែតុលា ឆ្នាំ២០១៦នេះ ។
លោក ជុំ សន្ទរី អ្នកនាំពាក្យក្រសួងការបរទេសថ្លែងឲ្យដឹងថា លោក Daniel Russel ក៏បានសម្តែងការស្វាគមន៍ចំពោះការវិវត្តន៍ថ្មីៗនេះ នឹងមានការផ្លាស់ប្តូរជាវិជ្ជមាន ដើម្បីធ្វើយ៉ាងណាឲ្យការបោះឆ្នោតនៅកម្ពុជា នាពេលខាងមុខនេះ ដំណើរការទៅបានដោយរលូន។
ទន្ទឹមនោះភាគីកម្ពុជា-អាមេរិក មិនបានមើលរំលងពីការរឹតចំណងមិត្តភាពល្អ នឹងគ្នាទៅវិញទៅមកនោះទេ។ ទាំងកម្ពុជា និង អាមេរិក អះអាងថា នឹងរឹតចំណងមិត្តភាពលើកិច្ចសហប្រតិបត្តិការជាតិ និងអន្តរជាតិ ឲ្យបានស៊ីជំរៅជាងនេះបន្ថែមទៀត ៕
