កំពង់ឆ្នាំង៖ វេលាម៉ោង០០និង៤៥នាទី អាធ្រាត្រឈានចូល ថ្ងៃទី២៦ ខែតុលា ឆ្នាំ២០១៦នគរបាលសេដ្ឋកិច្ចសហការជាមួយកម្លាំងរដ្ឋបាលព្រៃឈើធ្វើការប្រដេញបង្ក្រាបបានរថយន្តម៉ាកឡិចស៊ីសRX300 ពណ៍ខ្មៅ ពាក់ស្លាកលេខ2Q-1218 ដឹកឈើប្រភេទគ្រញូងចំនួន១៨១ដុំ ស្មើនិង៥៣១គីឡូក្រាម ស្មើ០,៤៤២ម៉ែត្រត្រីគុណ ខណៈពេលកំពុងធ្វើសកម្មភាពដឹកឆ្លងកាត់ទឹកដីខេត្តកំពង់ឆ្នាំងឆ្ពោះចូលទីក្រុងភ្នំពេញ ។
ករណីប្រដេញបង្ក្រាបរថយន្តដឹកឈើគ្រញូងនេះ បានធ្វើឡើងនៅតាមបណ្តោយផ្លូវជាតិលេខ៥ចំណុចស្ពានសាបអង្កាម ស្ថិតក្នុងភូមិឈើនាគ ឃុំពង្រ ស្រុករលាប្អៀរ ខេត្តកំពង់ឆ្នាំង ។
ប្រភពពីសមត្ថកិច្ចអោយដឹងថា មុនពេលធ្វើការបង្ក្រាបបានរថយន្តដឹកឈើគ្រញូងខាងលើនេះកំលាំងសមត្ថកិច្ចបានទទួលព័ត៌មានថា មានរថយន្តដឹកឈើគ្រញូងឆ្លងកាត់ទឹកដីខេត្តកំពង់ឆ្នាំងឆ្ពោះទៅរាជធានីភ្នំពេញ ក៍ចេញប្រតិបត្តិការ ដាក់កម្លាំងស្ទាក់ដើម្បីធ្វើការបង្ក្រាប ក៍បានប្រទះឃើញនៅចំណុចខាងលើ ក៍ស្ទាក់ចាប់បានតែម្តង ។
ក្នុងប្រតិបត្តិការបង្ក្រាបរថយន្តដឹកឈើគ្រញូងខាងលើនេះមានរថយន្ត២គ្រឿងផ្សេងទៀតបានបើកតាមដើម្បីរំដោះគូកន ដោយគៀរថយន្តសមត្ថកិច្ចបណ្តាលអោយរងការខូចខាតចំនួន២គ្រឿងផងដែរ ។
ក្រោយឃាត់ចាប់រថយន្តដឹកឈើខាងលើនេះបាន អ្នកបើកបររថយន្តបានរត់គេចខ្លួនបាត់ស្រមោលដោយទុកចោលរថយន្តដឹកឈើនៅកន្លែងកើតហេតុ ។
បើតាមការផ្ដល់ប្រភពមួយពីខេត្តឧត្ដរមានជ័យបានអោយដឹងថា រថយន្ដលុចស៊ិសដឹកឈើគ្រញូងគឺជា របស់ថៅកែស្រីម្នាក់ឈ្មោះយាយ ម៉ាយ ជនជាតិយួនរស់នៅស្រុកអន្លុងវែង ដែលជាជើងខ្លាំងឈ្មួញកាងឈើនៅស្រុកអន្លុងវែង ខេត្តឧត្ដរមានជ័យ នឹងធ្លាប់បញ្ជាកូនចៅមកវាយតប់ អ្នកសារព័ត៌មានថែមទៀតផង។
ក្រោយការបង្ក្រាបបាន សមត្ថកិច្ចបានរាយការណ៍ជូនលោកស្នងការនគបាលខេត្តនិងសុំការអនុញ្ញាតិពីលោកព្រះរាជអជ្ញាសាលាដំបូងខេត្តកំពង់ឆ្នាំង នាំយកមករក្សារទុកនៅក្នុងស្នងការនគបាលខេត្តកំពង់ឆ្នាំង រង់ចាំព្រឹកឡើងធ្វើការវាស់វែងឈើ ប្រគល់អោយសមត្ថកិច្ចរដ្ឋបាលព្រៃឈើខេត្ត ដើម្បីកសាងសំណុំរឿងបញ្ជូនទៅ សាលាដំបូងខេត្ត ចាត់ការតាមនិតិវិធី និងវែកមុខជនល្មើសដែលជាម្ចាស់ឈើយកមកផ្ដន្ទាទោស ៕
