ខេត្តពោធិ៍សាត់ ៖ ជនប្រមឹកម្នាក់ដែលជាតៃកុងតាក់ស៊ីបានបើករថយន្តហោះផ្តាច់ព្រលឹងទៅបុកដល់ក្នុងផ្ទះបណ្តាលឲ្យស្លាប់ទាំង៣នាក់ ប្តី ប្រពន្ធ និងកូន យ៉ាងអាណោចអាធ័មបំផុត ខណៈកំពុងតែប្រឡែងលេងជាមួយកូនស្រីដ៏តូចច្រឡឹងរបស់ខ្លួននៅក្នុងផ្ទះ។
យោងតាមរបាយការណ៍ ការិយាល័យនគបាលចរាចរណ៍ផ្លូវគោក នៃស្នងការដ្ឋាននគបាលខេត្តពោធិសាត់ បានប្រាប់ថា ហេតុការណ៍គ្រោះថ្នាក់ចរាចរណ៍ដ៍រន្ធត់ខាងលើនេះ កើតឡើងនៅម៉ោងប្រមាណ៩ និង៣០នាទី យប់ថ្ងៃទី១៣ ខែតុលា ឆ្នាំ២០១៦នេះ នៅចំណុចផ្ទះជនរងគ្រោះ តាមបណ្តាលផ្លូវជាតិលេខ៥ ក្នុងភូមិស្ពានថ្ម សង្កាត់ព្រៃញី ក្រុងពោធិ៍សាត់ ខេត្តពោធិសាត់ ។
របាយការណ៍នៅមិនទាន់បញ្ជាក់អត្តសញ្ញាណជនរងគ្រោះទាំង៣នាក់ឪពុក ម្តាយ និងកូនតូច រួមនិងសម្ភារះខូចខាតនៅឡើយទេ។
ដោយឡែកខាងរថយន្តបង្ករម៉ាកកាម៉ារីបាឡែន ពាក់ផ្លាកលេខ ភ្នំពេញ 2W-8415 បើកបរដោយជនសង្ស័យ ឈ្មោះ ជឿន ជាម្ចាស់រថយន្ត និងជាអ្នកបើកបរ មានទីលំនៅក្នុងភូមិកើតហេតុខាងលើ មានមុខរបរបើករថយន្ត រត់តាក់ស៊ី។
សាក្សីជាច្រើននាក់បានឲ្យដឹងថា មុនកើតហេតុគេឃើញ ជនសង្ស័យត្រូវគេស្គាល់ថា.ជាមនុស្សម្នាក់ប្រើប្រាស់ថ្នាំញៀន ហើយបូកផ្សំជាមួយស្រា ដែលផឹកស្រវឹងដាបបើករថយន្តបង្ករដឹកស្រីស្នេហ៍ លឿនដូចហោះ ពីលិចទៅកើតលុះដល់កន្លែងកើតហេតុ រថយន្តរេចង្កូត បុកចូលក្នុងផ្ទះជនរងគ្រោះលាន់ស្នូរគក្រើកក្រុងពោធិសាត់ បង្ករការភ្ញាក់ផ្អើលតែម្តង។
ក្រោយគ្រោះថ្នាក់ចរាចរណ៍ភ្លាមៗនោះ គេឃើញមានការចូលរួម អន្តរាគមន៍ពី ឯកឧត្ត ម៉ៅ ធនិន អភិបាលខេត្តពោធិសាត់ និងនគបាលចរាចរណ៍ រួមនិងសមត្ថកិច្ចពាក់ព័ន្ធបានចុះទៅដល់កន្លែងកើតហេតុរីជនល្មើសត្រូវបានឃាត់ខ្លួន។
បច្ចុប្បន្នជនល្មើសត្រូវបានសមត្ថកិច្ច ឃុំខ្លួន និងកសាងសុំណុំរឿងចាត់ការបន្ត៕
